អាជ្ញាធររាជធានីភ្នំពេញ បង្កើតក្រុមការងារជួយបញ្ជូនស្បៀងដល់ប្រជាពលរដ្ឋដែលរងផលប៉ះពាល់ពីជំងឺកូវីដ-១៩ ក្នុងខណ្ឌដែលត្រូវបន្តបិទខ្ទប់ ខណៈអាជ្ញាធរបន្តអនុវត្តវិធានសុខាភិបាល ដើម្បីទប់ស្កាត់ជំងឺឆ្លងជាសកលនេះ។
ភូមិសាស្ត្ររាជធានីភ្នំពេញ ត្រូវបានរដ្ឋាភិបាលចេញបញ្ជាទៅអាជ្ញាធរមានសមត្ថកិច្ចឱ្យអនុវត្តវិធានការបិទខ្ទប់ចាប់ពីមុនចូលឆ្នាំ ដែលវិធានការនេះនៅបន្តមិនអនុញ្ញាតឱ្យចេញពីផ្ទះមួយទៅផ្ទះមួយ ឬធ្វើដំណើរឆ្លងកាត់ពីតំបន់មួយទៅតំបន់មួយ រួមទាំងការធ្វើអាជីវកម្មមួយចំនួនផងដែរ លើកលែងតែករណីចាំបាច់សម្រាប់បុគ្គលមួយចំនួន ក្រោយពីជំងឺកូវីដ-១៩ បន្តឆ្លងរាលដាលដល់អាជីវករលក់ដូរនៅផ្សារ និងរោងចក្រដែលជាបណ្តុំមនុស្សច្រើន។
អភិបាលរាជធានីភ្នំពេញ លោក ឃួង ស្រេង បាននិយាយតាមរយៈសារជាសំឡេងកាលពីម្សិលមិញថា រដ្ឋាភិបាលបានផ្តល់អង្ករចំនួន១៤០តោន និងគ្រឿងឧបភោគបរិភោគមួយចំនួនទៀតសម្រាប់រាជធានីភ្នំពេញ ដែលខណ្ឌនីមួយៗត្រូវទទួលបានអង្ករ១០តោន សម្រាប់ជួយសង្គ្រោះបន្ទាន់ដល់ពលរដ្ឋដែលដាច់ស្បៀង។
លោកបានគូសបញ្ជាក់ថា ក្រុមការងាររបស់អាជ្ញាធរខណ្ឌត្រូវតាមដានលើបណ្តាញសង្គម ដើម្បីឆ្លើយតបទៅនឹងសំណូមពររបស់ពលរដ្ឋ ក្នុងការនាំស្បៀងទាំងនោះទៅចែកជូនពួកគេដល់លំនៅឋាន។
លោកថា៖ «សូមអភិបាលខណ្ឌទាំងអស់រៀបចំស្បៀង អង្ករ មី ត្រូវចុះដល់ផ្ទះគាត់ជាបន្ទាន់ ដើម្បីឆ្លើយតបឱ្យទាន់ពេលវេលា។ ខ្ញុំនឹងដាក់អង្ករគ្រប់ខណ្ឌទាំងអស់ដល់អភិបាលខណ្ឌ ដើម្បីធ្វើការទាន់ហេតុការណ៍ជូនដល់ប្រជាពលរដ្ឋដែលខ្វះខាតស្បៀងអាហារ»។
អភិបាលខណ្ឌពោធិ៍សែនជ័យ លោក ហែម ដារិទ្ធ មានប្រសាសន៍ថា សម្រាប់ពលរដ្ឋដែលបានស្នើសុំ នឹងមិនតម្រូវឱ្យមានលក្ខខណ្ឌអ្វីនោះទេ បើពួកគេពិតជាគ្មានស្បៀងមែននោះ។
លោកថា៖ «សម្រាប់ខណ្ឌពោធិ៍សែនជ័យយើង មិនមានលក្ខខណ្ឌអីទេ សម្រាប់ពលរដ្ឋណាដាច់ស្បៀង រដ្ឋបាលខណ្ឌ-សង្កាត់ ត្រូវតែផ្តល់អំណោយជូនពួកគាត់ ហើយបើពាក់ព័ន្ធនឹងជំងឺកូវីដ ដូចជា កម្មករយកសំណាកដែលយើងឱ្យគាត់ធ្វើចត្តាឡីស័ក យើងផ្តល់អំណោយជូនពួកគាត់មួយគ្រួសារអង្ករមួយបេ មានមី មានត្រីខ [អង្ករមួយបេទម្ងន់ប៉ុន្មាន] ពី២៥ ទៅ៣០គីឡូ»។
លោកបន្តថា ការស្នើសុំស្បៀងបន្ទាន់នេះ ពលរដ្ឋអាចធ្វើតាមរយៈការបង្ហោះសារលើបណ្តាញសង្គមហ្វេសប៊ុក តាមរយៈអាជ្ញាធរភូមិ-សង្កាត់ ឬតាមបណ្តាញផ្សព្វផ្សាយ ដោយឡែក អ្នកដែលបានធ្វើចត្តាឡីស័ក អាជ្ញាធរមានរបាយការណ៍នៅក្នុងដៃហើយក្នុងការផ្គត់ផ្គង់ស្បៀងនេះ។
កាលពីថ្ងៃសៅរ៍ រដ្ឋាភិបាលបានចេញសេចក្តីសម្រេចថ្មីមួយទៀតណែនាំទៅអាជ្ញាធរមានសមត្ថកិច្ច ឱ្យបន្តអនុវត្តវិធានការបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ជាបណ្តោះអាសន្នរយៈពេល១៤ថ្ងៃបន្ថែមទៀត ដោយបញ្ជាក់ថា «យោងតាមតម្រូវការចាំបាច់ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩»។
អ្នករត់កង់បីម្នាក់នៅភូមិ១ ក្រុម២ សង្កាត់បឹងសាឡាង ខណ្ឌមានជ័យ លោក ហេង សុភក្ត្រា និយាយថា ការបិទខ្ទប់មួយរយៈមកនេះ ធ្វើឱ្យជីវភាពគ្រួសារគាត់ប្រឈមនឹងការខ្វះស្បៀង ព្រោះមិនអាចចេញទៅប្រកបមុខរបរបាន ខណៈការរកទទួលទានកន្លងមក បានសម្រាប់តែការហូបប្រចាំថ្ងៃ និងសងទៅធនាគារ ។
បុរសវ័យ៤១ឆ្នាំរូបនេះបន្ថែមថា កាលពីម្សិលមិញ គាត់បានសុំជំនួយស្បៀងពីមេភូមិដែរ ប៉ុន្តែថា មកដល់ថ្ងៃនេះនៅមិនទាន់ទទួលបាននៅឡើយ ។
លោកថា៖ «៦នាក់ក្នុងបន្ទុកគ្រួសារ បង! ទប់អត់ជាប់ទេ ហូបផងអីផង ទប់អត់ជាប់ទេដល់១៤ថ្ងៃ! ឥលូវទើបបាន៣ថ្ងៃ ៤ថ្ងៃហ្នឹង។ ដូចយប់មិញអី មានតែឪឡឹកនិងទឹកត្រីទេ ហូបជាមួយបាយបន្លប់ៗ ឱ្យតែឆ្អែត ហូបទឹកហើយដេកទៅ សន្សំសំចៃទៅ ព្រោះយើងអត់បានរកអីទេ ពិតជាកំពុងពិបាកមែនទែន»។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា ពលរដ្ឋដែលប្រឈមនឹងបញ្ហាស្បៀង ពិតជាសាទរចំពោះវិធានការជួយឧបត្ថម្ភស្បៀងបន្ទាន់ អំឡុងនៃវិធានការបិទខ្ទប់នេះ។
ប៉ុន្តែលោកជំរុញឱ្យអាជ្ញាធរពន្លឿនវិធានការនេះ ដើម្បីឱ្យពលរដ្ឋខ្លះខ្វះស្បៀង និងមិនសូវចេះប្រើបណ្តាញទំនាក់ទំនងសង្គម អាចទទួលបានស្បៀងសង្គ្រោះបន្ទាន់ពីរដ្ឋាភិបាលនេះបានស្មើៗគ្នា។
លោកថា៖ «បើសិនជាធ្វើឱ្យទាន់ពេលវេលា ដើម្បីឆ្លើយតបបន្ទាន់ទៅនឹងតម្រូវការ វាជារឿងសំខាន់។ តែបើសិនជាអាជ្ញាធរមូលដ្ឋានមានការយឺតយ៉ាវទាក់ទងនឹងប្រព័ន្ធជំនួយសង្គមហ្នឹងទេ ពលរដ្ឋនឹងជួបការលំបាក។ ហើយមួយទៀត រដ្ឋគួរអន្តរាគមន៍រឿងថ្លៃទឹក ថ្លៃភ្លើង ថ្លៃផ្ទះជួលអីហ្នឹង រដ្ឋគួរអន្តរាគមន៍បន្ថែមទៀត ព្រោះឥលូវហ្នឹងមិនទាន់មាននរណាគិតថ្លៃទឹកថ្លៃភ្លើងអីយ៉ាងម៉េចទេ»៕
យ៉ាងណា ក្រៅពីបញ្ជូនស្បៀងទៅកាន់តំបន់បិទខ្ទប់នេះ រដ្ឋាភិបាលក៏បានប្រកាសរួចហើយដែរពីវិធានការជួយឧបត្ថម្ភអ្នកដែលរស់នៅក្នុងតំបន់បិទខ្ទប់រយៈពេលពីរខែ ដែលនោះគឺ រដ្ឋចេញថ្លៃទឹក ថ្លៃភ្លើង អង្ករ២៥គីឡូ និងប្រាក់៣០ម៉ឺនរៀលមួយខែ ក្នុងមួយគ្រួសារ៕