ក្រសួងព័ត៌មានណែនាំឱ្យម្ចាស់ស្ថានីយវិទ្យុ ទូរទស្សន៍គ្រប់ប្រព័ន្ធ និងប្រព័ន្ធផ្សព្វផ្សាយតាមអនឡាញទាំងអស់ផ្អាកការផ្សាយពាណិជ្ជកម្មគ្រឿងស្រវឹងគ្រប់ប្រភេទ ចាប់ពីថ្ងៃនេះរហូតដល់ថ្ងៃទី៣០ ខែមេសា។
សេចក្ដីប្រកាសរបស់ក្រសួងព័ត៌មានចេញផ្សាយនៅថ្ងៃទី១៩ ខែមេសា ឆ្នាំ២០២១ ឱ្យដឹងថា ក្រសួងបានណែនាំទៅម្ចាស់ស្ថានីយវិទ្យុ ទូរទស្សន៍ និងប្រព័ន្ធផ្សព្វផ្សាយតាមអនឡាញទាំងអស់ត្រូវផ្អាកផ្សព្វផ្សាយគ្រឿងស្រវឹងគ្រប់ប្រភេទ អំឡុងពេលដែលរដ្ឋាភិបាលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល ចាប់ពីថ្ងៃទី១៤ ដល់ថ្ងៃទី២៨ ខែមេសា ឆ្នាំ២០២១។
ក្រសួងព័ត៌មានបន្តថា ការណែនាំនេះធ្វើឡើងតាមអនុសាសន៍របស់ប្រមុខរដ្ឋាភិបាលដែលបានឱ្យផ្អាកលក់គ្រឿងស្រវឹងទូទាំងប្រទេស ដើម្បីការពារអាយុជីវិតរបស់ប្រជាពលរដ្ឋ សុខភាពសាធារណៈ និងថែរក្សាឱ្យបាននូវសណ្ដាប់ធ្នាប់សាធារណៈ ហើយទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ និងឈានទៅបិទបញ្ចប់ព្រឹត្តិការណ៍នេះនាពេលឆាប់ៗខាងមុខ។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់ វីអូឌី នៅថ្ងៃនេះថា ម្ចាស់ស្ថានីយទាំងអស់ដែលបានចុះបញ្ជីនៅក្រសួងព័ត៌មាន ត្រូវធ្វើការផ្អាកការផ្សព្វផ្សាយគ្រឿងស្រវឹង ប៉ុន្តែប្រសិនម្ចាស់ស្ថានីយទាំងនោះមិនអនុវត្តតាមការណែនាំ ក្រសួងនឹងចាត់វិធានការតាមច្បាប់។
លោកថា៖ «ក្រសួងបានជូនដំណឹងហើយ ហើយកន្លងមកនេះ ម្ចាស់ប្រព័ន្ធផ្សព្វផ្សាយភាគច្រើនលោកបានចូលរួមសហការគោរពទៅតាមសេចក្ដីជូនដំណឹងរបស់ក្រសួង។ អ៊ីចឹងក្នុងករណីប្រព័ន្ធផ្សព្វផ្សាយផ្សេងៗទទួលសេចក្ដីជូនដំណឹង ហើយគាត់មិនអនុវត្តទៅតាមនីតិវិធី ដោយក្រសួងនឹងពិនិត្យមើលស្ថានភាពទូរទស្សន៍ និងវិទ្យុនីមួយៗសិន។ យើងនឹងអនុវត្តទៅតាមនីតិវិធីច្បាប់ជាធរមាន»។
អគ្គនាយករងស្ថានីយទូរទស្សន៍ហង្សមាស ទទួលបន្ទុកផ្នែកព័ត៌មាន លោក មាស រិទ្ធី លើកឡើងថា ស្ថានីយលោកបានទទួលហើយ នឹងអនុវត្តតាមសេចក្ដីណែនាំរបស់ក្រសួងព័ត៌មាន។
លោកថា៖ «សម្ដេចលោកប្រកាសបម្រាមនោះត្រឹមកម្រិតមិនឱ្យលក់គ្រឿងស្រវឹងទេ ប៉ុន្តែការផ្សព្វផ្សាយ លោកមិនបានចេញបម្រាមទេ។ អ៊ីចឹងយើងនៅបន្តផ្សព្វផ្សាយ ព្រោះយើងរស់ដោយសារការផ្សាយពាណិជ្ជកម្ម ប៉ុន្តែដោយសារក្រសួងព័ត៌មានលោកចេញក្រោយនេះទៀត អាហ្នឹងបិទការផ្សព្វផ្សាយពាណិជ្ជកម្ម យើងក៏អនុវត្តភ្លាមៗចាប់ពីថ្ងៃជូនដំណឹងនេះតទៅ»។
នាយកប្រតិបត្តិនៃអង្គការចលនាដើម្បីសុខភាពកម្ពុជា លោក មុំ គង់ សាទរចំពោះវិធានការរបស់រដ្ឋាភិបាល ដោយលោកមើលឃើញថា ការជួបជុំភាគច្រើនដោយសារគ្រឿងស្រវឹង។ លោកបន្តថា ប្រសិនបើរដ្ឋាភិបាលឱ្យស្ថានីយទាំងអស់ផ្អាកការផ្សព្វផ្សាយគ្រឿងស្រវឹងរហូតតែម្ដង ជារឿងល្អ ដោយថា ការផ្សព្វផ្សាយគ្រឿងស្រវឹងនេះ គឺជាមធ្យោបាយមួយទាក់ទាញឱ្យមានការប្រើប្រាស់គ្រឿងស្រវឹងកាន់តែច្រើននៅកម្ពុជា ដែលបង្កទៅជាបញ្ហាផ្សេងៗផងដែរ។
លោកថា៖ «ការប្រើប្រាស់គ្រឿងស្រវឹងហ្នឹងផ្ដល់ផលប៉ះពាល់៤ មានប៉ះពាល់សុខភាព ភាពក្រីក្រ អំពើហិង្សា គ្រោះថ្នាក់ចរាចរណ៍ ជាពិសេសយើងកំពុងប្រយុទ្ធប្រឆាំងនឹងកូវីដផង ទោះបីជាយើងបិទបញ្ចប់ការបិទខ្ទប់ក៏ដោយ យើងគិតថា យើងនៅតែប្រឈមនឹងជំងឺកូវីដក្នុងកម្រិតណាមួយ។ អ៊ីចឹងការផ្សាយពាណិជ្ជកម្មគ្រឿងស្រវឹង គួរតែបន្តផ្អាកទៅទៀត»។
កាលពីថ្ងៃទី១៤ ខែមេសា ឆ្នាំ២០២១ លោកនាយករដ្ឋមន្ត្រី ហ៊ុន សែន បានថ្លែងសារបន្ទាន់មួយស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ។ ក្រៅពីប្រកាសបិទ លោក ហ៊ុន សែន បានហាមមិនឱ្យមានការលក់ដូរគ្រឿងស្រវឹងរយៈពេល១៤ថ្ងៃបន្ថែមទៀត ពីថ្ងៃទី១៥ ខែមេសា រហូតដល់ថ្ងៃទី២៨ ខែមេសា ក្នុងគោលបំណងកាត់បន្ថយការជួបជុំក្នុងឱកាសបុណ្យចូលឆ្នាំខ្មែរ និងក្រោយពេលបុណ្យចូលឆ្នាំ ដើម្បីទប់ស្កាត់ការឆ្លងរីករាលដាលជំងឺកូវីដ-១៩៕