ប្រជាពលរដ្ឋមួយចំនួននៅក្នុងតំបន់បិទខ្ទប់រាជធានីភ្នំពេញ បានបង្ហាញការព្រួយបារម្ភពីការដាច់ស្បៀង ប្រសិនបើកិច្ចអន្តរាគមន៍ជួយឧបត្ថម្ភស្បៀងអាហារពីអាជ្ញាធរនៅបន្តយឺតពេល ក្នុងអំឡុងពេលរដ្ឋាភិបាលបន្តអនុវត្តវិធានការបិទខ្ទប់ ដើម្បីទប់ស្កាត់ជំងឺកូវីដ-១៩។
ពលរដ្ឋជាច្រើនរយនាក់ ត្រឹមរយៈពេល២ថ្ងៃមកនេះ បានផ្ញើសារទៅកាន់ក្រុមមួយក្នុងបណ្តាញសង្គមតេឡេក្រាម (Telegram Group) របស់រដ្ឋបាលរាជធានីភ្នំពេញ ដើម្បីសុំជំនួយស្បៀងអាហារបន្ទាន់ ក្រោយពីក្រុមនេះបានបង្កើតឡើងកាលពីថ្ងៃអាទិត្យ។
ពលរដ្ឋជាច្រើនរយនាក់ដែលកំពុងរស់នៅក្នុងរាជធានីភ្នំពេញ បានផ្ញើសារស្នើសុំស្បៀងចូលក្នុងក្រុមតេឡេក្រាមឈ្មោះ «តម្រូវការបន្ទាន់នូវជំនួយស្បៀងចាំបាច់»។ ក្រុមតេឡេក្រាមនេះត្រូវបានបង្កើតឡើងដោយ «គណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់» កាលពីថ្ងៃទី១៨ ខែមេសា។ អ្នកខ្វះខាតស្បៀងអំឡុងពេលនៃការបិទខ្ទប់ សូមជូនដំណឹងមកគណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ (គ.ប.ខ.) តាមរយៈក្រុមតេឡេក្រាមនេះ។ អាជ្ញាធរបានតម្រូវឱ្យពលរដ្ឋដែលខ្វះស្បៀង បញ្ជាក់ពីចំនួនគ្រួសារ រូបថត ទីតាំងស្នាក់នៅ និងលេខទំនាក់ទំនង។
គណៈកម្មការនេះមានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជាប្រធាន អភិបាលរាជធានីភ្នំពេញ លោក ឃួង ស្រេង ជាអនុប្រធាន។
គិតចាប់ពីម៉ោង១០ព្រឹក ថ្ងៃទី១៩ ខែមេសា មកដល់ម៉ោង៤រសៀលថ្ងៃនេះ មានសារចំនួនជាង ៣ ៤០០ ត្រូវបានប្រជាពលរដ្ឋរស់នៅតំបន់ផ្សេងក្នុងរាជធានីភ្នំពេញ ផ្ញើចូលក្នុងក្រុមតេឡេក្រាម «តម្រូវការបន្ទាន់នូវជំនួយស្បៀងចាំបាច់» ដើម្បីសុំជំនួយជាស្បៀងអាហារ។
លោក អ៊ឺន ប៊ុនសេត រស់នៅបន្ទប់ជួលក្នុងសង្កាត់ចាក់អង្រែក្រោម ខណ្ឌមានជ័យ ដែលជាតំបន់បិទខ្ទប់ ឱ្យដឹងនៅថ្ងៃអង្គារនេះថា ស្បៀងរបស់គាត់នៅសល់ត្រឹម៣ថ្ងៃទៀតប៉ុណ្ណោះ ខណៈគាត់បានផ្ញើសារសុំជំនួយបន្ទាន់រួចហើយ មិនទាន់មានការឆ្លើយតប។
លោកថា៖ «សល់អង្ករប្រហែល៤កំប៉ុង ពងទា១០គ្រាប់ ត្រីខ២កំប៉ុង។ ខ្ញុំចង់ឱ្យគេពន្លឿន កុំឱ្យដាច់ស្បៀង បង! កូវីដក៏បារម្ភ តែយើងនៅផ្ទះបាន! តែដាច់ស្បៀង យើងនៅក្នុងផ្ទះអត់បាន»។
លោកបានគូសបញ្ជាក់ថា បញ្ហារបស់លោកនៅពេលនេះ គឺដោយសារតែរោងចក្រកាត់ដេរដែលគាត់ធ្វើការ បានផ្អាកដំណើរការជាបណ្តោះអាសន្នតាំងពីមុនចូលឆ្នាំខ្មែរ ទាំងមិនបានទូរទាត់ប្រាក់ឈ្នួលឱ្យ ហើយពេលនេះរោងចក្រនៅតែបន្តផ្អាកដំណើរការ ព្រោះតែវិធានការបិទខ្ទប់របស់រដ្ឋាភិបាល។
អ្នកស្រី ចាន់ ស្រីលក្ខណ៍ រស់នៅសង្កាត់ទឹកថ្លា បាននិយាយថា គ្រួសាររបស់គាត់មានសមាជិក៥នាក់ កំពុងប្រឈមនឹងការដាច់ស្បៀងដូចគ្នា ក្រោយពីអាជ្ញាធរដាក់ចេញវិធានការបិទខ្ទប់។ ស្ត្រីវ័យ៤១ឆ្នាំរូបនេះ បន្តថា កាលពីថ្ងៃម្សិលមិញ កូនរបស់គាត់បានផ្ញើសារទៅកាន់ក្រុមតេឡេក្រាមរបស់គណៈកម្មការនោះ ដើម្បីសុំជំនួយជាស្បៀងដែរ តែមិនទាន់ទទួលបានការឆ្លើយតប។
អ្នកស្រីគូសបញ្ជាក់ថា អំឡុងនៃការបិទខ្ទប់នេះ គ្រួសារគាត់បាត់បង់ប្រាក់ចំណូល ចំណែកអង្ករដែលធ្លាប់ផ្ញើពីស្រុកមក ក៏មិនអាចនាំចូលបាន ដោយសារតែអាជ្ញាធរមិនឱ្យចូល ព្រោះតំបន់ដែលគាត់រស់នៅជាទីតាំងត្រូវបិទខ្ទប់។
អ្នកស្រីថា៖ «កូនដល់៣នាក់ ហើយប្តីខ្ញុំទៅ [ធ្វើសំណង់] នៅខេត្តកំពត ជាប់នៅហ្នឹង អត់មានការងារ! ហើយខ្ញុំអត់មានអីធ្វើ នៅតែផ្ទះ។ [អង្ករនៅសល់ប៉ុន្មាន] នៅសល់ប្រហែលជា១០គីឡូដែរ តែមួយពេល៣កំប៉ុង បើមានអីផ្ញើពីខេត្តមក ចេះតែផ្ញើហើយ តែមានអីចេញចូលកើតឥលូវ»។
កម្មការិនីធ្វើការនៅរោងចក្រកាត់ដេរមួយក្នុងសង្កាត់ទឹកថ្លា កញ្ញា សៀង ស្រីពៅ បាននិយាយប្រហាក់ប្រហែលដែរថា ស្បៀងអាហារនៅផ្ទះរបស់គាត់អាចទប់ទល់បានត្រឹម៤ថ្ងៃទៀតប៉ុណ្ណោះ។
ស្ត្រីរូបនេះបញ្ជាក់ថា បញ្ហាប្រឈមនឹងដាច់ស្បៀង វាបានកើតឡើងក្រោយពីរោងចក្រផ្អាកដំណើរការ ទាំងមិនទាន់បានបើកប្រាក់ឈ្នួល ហើយការចំណាយបច្ចុប្បន្នមានការកើនឡើង ដោយសារទំនិញឡើងថ្លៃទ្វេដង។
កញ្ញាថា៖ «ខ្ញុំភ័យដែរហ្នឹង! ព្រោះអីនៅក្នុងផ្ទះមានគ្នា៣នាក់ ហើយសុទ្ធតែអត់ចំណូលដូចគ្នា។ ចុងក្រោយ ខ្ញុំសំណូមពរឱ្យថ្នាក់លើជួយពន្លឿនរឿងហ្នឹង ព្រោះអីវាយូរថ្ងៃដែរហើយ»។
កាលពីថ្ងៃសៅរ៍ រដ្ឋាភិបាលបានចេញសេចក្តីសម្រេចថ្មីមួយទៀតណែនាំទៅអាជ្ញាធរមានសមត្ថកិច្ច ឱ្យបន្តអនុវត្តវិធានការបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ជាបណ្តោះអាសន្ន រយៈពេល១៤ថ្ងៃបន្ថែមទៀត ដោយបញ្ជាក់ថា «យោងតាមតម្រូវការចាំបាច់ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩»។
អភិបាលរាជធានីភ្នំពេញ និងជាអនុប្រធាន គ.ប.ខ លោក ឃួង ស្រេង មិនអាចទាក់ទងបានទេ នៅថ្ងៃនេះ។
ប៉ុន្តែលោកធ្លាប់ណែនាំទៅអភិបាលខណ្ឌ ឱ្យឆ្លើយតបបន្ទាន់ទៅនឹងការដង្ហោយរកជំនួយស្បៀងបន្ទាន់ពីប្រជាពលរដ្ឋនៅក្នុងតំបន់បិទខ្ទប់ ខណៈរដ្ឋាភិបាលបានឧបត្ថម្ភអង្ករចំនួន១៤០តោន សម្រាប់ដោះស្រាយបញ្ហាស្បៀងជូនប្រជាពលរដ្ឋក្នុងរាជធានីភ្នំពេញ ដែលក្នុងមួយខណ្ឌទទួលបានអង្ករចំនួន១០តោន។
អភិបាលរងខណ្ឌមានជ័យ លោក ឌី រ័ត្នខេមរុណ បញ្ជាក់ថា អាជ្ញាធរខណ្ឌកំពុងចែកអំណោយដល់ប្រជាពលរដ្ឋនៅក្នុងខណ្ឌនេះដែលបានទទូចសុំជំនួយស្បៀងអាហារ។
លោកថា៖ «ខ្ញុំរវល់បន្តិច រវល់ចែកអំណោយ»។
ប្រធានផ្នែកសិទ្ធិមនុស្សសមាគមអាដហុក លោក នី សុខា បង្ហាញការព្រួយបារម្ភថា ការបិទខ្ទប់ដើម្បីទប់ស្កាត់ជំងឺឆ្លងសកលនេះ នឹងមិនជោគជ័យទេបើខ្វះស្បៀង ដោយថា បញ្ហាក្រពះនិងការឆ្លងជំងឺ វាប្រឈមនឹងការស្លាប់ដូចគ្នា។
លោកថា៖ «ដូច្នេះដើម្បីឱ្យការបិទខ្ទប់ហ្នឹងមានប្រសិទ្ធភាព គឺចាំបាច់ណាស់ត្រូវតែដោះស្រាយបញ្ហាជីវភាព»។
ទោះយ៉ាងណា ក្រៅពីបញ្ជូនស្បៀងទៅកាន់តំបន់បិទខ្ទប់ រដ្ឋាភិបាលក៏បានប្រកាសរួចហើយដែរពីគោលនយោបាយសង្គមសម្រាប់ជួយឧបត្ថម្ភដល់អ្នករស់នៅក្នុងតំបន់បិទខ្ទប់រយៈពេលពីរខែ ដែលក្នុងនោះ រដ្ឋនឹងចេញថ្លៃទឹក ថ្លៃភ្លើង អង្ករ២៥គីឡូ និងប្រាក់៣០ម៉ឺនរៀលមួយខែ ក្នុងមួយគ្រួសារ៕
