គណៈកម្មាធិការជាតិរៀបចំការបោះឆ្នោត (គ.ជ.ប) សម្រេចលើកពេលអនុវត្តដំណើរការនៃការបោះឆ្នោតសាកល្បង សម្រាប់ជ្រើសរើសក្រុមប្រឹក្សាឃុំ-សង្កាត់ឆ្នាំ២០២១ ដោយសារស្ថានភាពជំងឺកូវីដ-១៩ នៅតែបន្តវាយលុកកាន់តែធ្ងន់ធ្ងរ។
ក្នុងសេចក្តីប្រកាសព័ត៌មានរបស់ គ.ជ.ប បានឱ្យដឹងនៅថ្ងៃនេះថា តាមគម្រោងការបោះឆ្នោតសាកល្បងសម្រាប់ជ្រើសរើសក្រុមប្រឹក្សាឃុំ-សង្កាត់ឆ្នាំ២០២១ នៅទូទាំង២៥រាជធានី-ខេត្ត នឹងប្រព្រឹត្តទៅនៅថ្ងៃទី២៣ ខែឧសភា ឆ្នាំ២០២១ ខាងមុខនេះ។
ប៉ុន្តែ គ.ជ.ប បញ្ជាក់ថា ការបោះឆ្នោតសាកល្បងនោះនឹងត្រូវលើកពេលវិញ ដោយសារស្ថានភាពកូវីដ-១៩ នាពេលបច្ចុប្បន្ននេះកាន់តែមានសភាពធ្ងន់ធ្ងរឡើងៗ។
សេចក្តីប្រកាសព័ត៌មានដដែលឱ្យដឹងទៀតថា កាលបរិច្ឆេទនៃការអនុវត្តការបោះឆ្នោតសាកល្បងជ្រើសរើសក្រុមប្រឹក្សាឃុំ-សង្កាត់ឆ្នាំ២០២១ នឹងត្រូវកំណត់ជាថ្មី តាមលទ្ធភាពដែល គ.ជ.ប អាចធ្វើបាន បន្ទាប់ពីស្ថានភាពនៃការឆ្លងជំងឺកូវីដ-១៩ ត្រូវបានគ្រប់គ្រងទាំងស្រុងដោយរាជរដ្ឋាភិបាល៕
