ធនាគារជាតិនៃកម្ពុជា បន្តលើកទឹកចិត្តដល់ប្រជាពលរដ្ឋទូទាត់ប្រាក់តាមប្រព័ន្ធអេឡិចត្រូនិច ដោយកាត់បន្ថយការប្រើប្រាស់ក្រដាសប្រាក់ ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ-១៩។
សេចក្ដីជូនដំណឹងរបស់ធនាគារជាតិនៃកម្ពុជា ចុះថ្ងៃទី២០ ខែមេសា បានលើកឡើងថា ធនាគារនេះកំពុងបន្តអនុវត្តវិធានការការពារហានិភ័យដែលអាចកើតឡើងជាយថាហេតុដោយសារការប្រើប្រាស់ក្រដាសប្រាក់ តាមរយៈការសម្លាប់មេរោគនៅលើក្រដាសប្រាក់ដែលចូលទៅធនាគារ និងបញ្ចេញក្រដាសប្រាក់ដែលសម្លាប់មេរោគរួចទៅក្នុងទីផ្សារវិញ ដើម្បីចូលរួមបង្ការនិងទប់ស្កាត់ការឆ្លងរាលដាលជំងឺកូវីដ-១៩។
ទន្ទឹមនឹងនេះ ធនាគារជាតិនៃកម្ពុជា ក៏បានលើកទឹកចិត្តដល់ប្រជាពលរដ្ឋឱ្យកាត់បន្ថយការប្រើប្រាស់ក្រដាសប្រាក់ ក៏ដូចជាការចេញមូលប្បទានបត្រសម្រាប់ធ្វើការទូទាត់នានា ដោយជំនួសមកវិញនូវការប្រើប្រាស់ការទូទាត់ដោយប្រព័ន្ធអេឡិចត្រូនិចតាមលទ្ធភាពដែលអាចធ្វើបានវិញ។
ធនាគារនេះបញ្ជាក់ថា៖ «ការប្រើប្រាស់សេវាទូទាត់អេឡិចត្រូនិច ដូចជា សេវាធនាគារតាមកម្មវិធីទូរសព្ទចល័ត ក៏ដូចជាកម្មវិធីបាគង ដែលជាប្រព័ន្ធទូទាត់បែបទំនើបថ្មីមួយ នឹងផ្ដល់សុវត្ថិភាពខ្ពស់ ភាពងាយស្រួល ឆាប់រហ័ស និងចំណាយតិចផងដែរ»។