ប្រជាពលរដ្ឋមួយចំនួននៅរាជធានីភ្នំពេញ អំពាវនាវទៅរដ្ឋាភិបាលបញ្ចេញរថយន្តចល័តដែលលក់អង្ករ បន្លែ ត្រី សាច់ និងគ្រឿងបរិភោគបន្ថែមទៀត ក្នុងអំឡុងពេលមានការបិទខ្ទប់ និងស្របពេលដែលផ្សារជាច្រើនបានផ្អាកដំណើរការជាបណ្តោះអាសន្ន ដោយសារតែវិបត្តិជំងឺកូវីដ-១៩។
ការអំពាវនាវនេះធ្វើឡើងបន្ទាប់ពីរដ្ឋាភិបាល កាលពីថ្ងៃទី១៩ ខែមេសា បានបញ្ជាទៅក្រសួងពាណិជ្ជកម្មបញ្ចេញរថយន្តចល័តជិត១០គ្រឿង ដើម្បីជួយសម្រួលជាបន្ទាន់ឱ្យមានការផ្គត់ផ្គង់ ដឹកជញ្ជូន និងចែកចាយស្បៀង រួមមាន លក់អង្ករ ទឹកសុទ្ធ ទឹកស៊ីអ៊ីវ ទឹកត្រី មី និងត្រីខកំប៉ុង ជូនប្រជាពលរដ្ឋនៅក្នុងតំបន់ក្រហម ឬអនុវត្តសេវាលក់តាមប្រព័ន្ធទូរសព្ទ ឬអនឡាញ រួមទាំងដឹកជញ្ជូនចែកចាយដល់មុខផ្ទះ ជាដើម។
អ្នកស្រី ចាន់ ស្រីណែត រស់នៅម្តុំខណ្ឌពោធិ៍សែនជ័យ រាជធានីភ្នំពេញ មានប្រសាសន៍នៅថ្ងៃទី២១ ខែមេសា ឆ្នាំ២០២១នេះថា តំបន់ដែលគាត់រស់នៅមិនទាន់មានរថយន្តចល័តរបស់ក្រសួងពាណិជ្ជកម្ម លក់អង្ករ ទឹកសុទ្ធ ទឹកស៊ីអ៊ីវ ទឹកត្រី មី និងត្រីខកំប៉ុង នៅឡើយ។ ករណីនេះធ្វើឱ្យគាត់ពិបាកទៅទិញម្ហូបនៅផ្សារ ព្រោះខ្លាចឆ្លងជំងឺកូវីដ-១៩ និងល្មើសបម្រាមរបស់រដ្ឋាភិបាល។
អ្នកស្រីនិយាយថា៖ «នៅពេលយើងទៅផ្សារទិញអីវ៉ាន់ យកម្ហូប យើងមើលមិនឃើញទេ ខ្លាចវាឆ្លងតាមខ្យល់ ដូចថាយើងប៉ះដៃគ្នាក៏ឆ្លង វាពិបាក ដូចថាខ្លាចឆ្លងរោគមកដល់ផ្ទះយើង មកដល់ក្រុមគ្រួសារយើង»។
អ្នកនាង ភារម្យ វត្តី ដែលអះអាងថា រស់នៅខណ្ឌឫស្សីកែវ រាជធានីភ្នំពេញ និយាយប្រហាក់ប្រហែលគ្នាដែរថា បើរដ្ឋាភិបាលមិនបញ្ចេញរថយន្តចល័តបន្ថែមដែលមានលក់គ្រឿងឧបភោគបរិភោគ និងបន្លែ ត្រី សាច់ ទៅតាមផ្ទះប្រជាពលរដ្ឋទេ នឹងធ្វើឱ្យពួកគេជួបបញ្ហាប្រឈមច្រើន ជាពិសេសបញ្ហាសុខភាព ដោយសារបរិភោគតែមីនិងត្រីខកំប៉ុងស្ទើរជារៀងរាល់ថ្ងៃ។
អ្នកនាងនិយាយថា៖ «ដូចថារាល់ថ្ងៃហូបតែត្រីខ ហូបតែមី! រាល់ថ្ងៃមិនមានជាតិបន្លែ ចេញទៅណាក៏មិនកើត។ ចេញទៅខ្លាចឆ្លងជំងឺកូវីដ ញ៉ាំតែមី ត្រីខ រាល់ថ្ងៃ ព្រោះញ៉ាំមីខ្លាចស្អិតពោះវៀនទៀត មីហ្នឹងវាមានជាតិគីមីច្រើន ប៉ះពាល់សុខភាព»។
អ្នកនាង ចាន់ សុថុន ជាពលរដ្ឋម្នាក់ទៀតរស់នៅម្តុំខណ្ឌចំការមន រាជធានីភ្នំពេញ អំពាវនាវទៅរដ្ឋាភិបាលជួយឱ្យ រថយន្តចល័តដឹកអង្ករ ទឹកសុទ្ធ បន្លែ ត្រី និងសាច់ រួមទាំងគ្រឿងឧបភោគបរិភោគគ្រប់មុខ យកទៅលក់តាមផ្ទះប្រជាពលរដ្ឋទូទាំងរាជធានីភ្នំពេញ ដើម្បីងាយស្រួលពួកគេទៅទិញយកមកបរិភោគ ដើម្បីកុំឱ្យមានបញ្ហាសុខភាពក្នុងអំឡុងពេលបិទខ្ទប់។
អ្នកនាងនិយាយថា៖ «បើសិនជាក្រសួងពាណិជ្ជកម្មលក់ចល័ត យើងអាចទិញនៅមុខផ្ទះរបស់យើងបាន។ យើងមិនបាច់ដើរចេញទៅក្រៅ បើសិនជារដ្ឋលក់អញ្ចឹងតែម្នាក់ យើងទិញគឺថាអាចទប់ស្កាត់ជំងឺកូវីដ ដើម្បីងាយស្រួលឱ្យយើងបានហូបបន្លែឱ្យមានសុខភាពល្អ ពេលនេះជំងឺច្រើនអញ្ចឹង បើយើងអត់បានហូបបន្លែ វាពិបាកក្នុងខ្លួន»។
វីអូឌី មិនអាចសុំការអត្ថាធិប្បាយបន្ថែមពីអ្នកនាំពាក្យក្រសួងពាណិជ្ជកម្ម លោក ស៊ាង ថៃ បានទេនៅថ្ងៃនេះ ដោយលោកថាជាប់រវល់ប្រជុំ។
កាលពីថ្ងៃទី១៤ ខែមេសា ឆ្នាំ២០២១ រដ្ឋាភិបាលសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល រយៈពេល១៤ថ្ងៃ ដោយអនុវត្តចាប់ពីម៉ោងសូន្យ ថ្ងៃទី១៥ ខែឆ្នាំដដែល។
ស្របពេលគ្នានេះដែរ ផ្សារមួយចំនួនក្នុងរាជធានីភ្នំពេញ ដូចជា ផ្សារអូរឫស្សី ផ្សារអូរឡាំពិក ផ្សារដើមគរ ផ្សារកណ្តាល ផ្សារត្រពាំងថ្លឹង ផ្សារឯករាជ្យ៣ ផ្សារដេប៉ូ ផ្សារបឹងត្របែកផ្លាហ្សា និងផ្សារទួលសង្កែ ជាដើម បានបិទជាបណ្តោះអាសន្នជាបន្តបន្ទាប់ ក្រោយពីបានរកឃើញអាជីវករនិងពលរដ្ឋមួយចំនួនដែលវិជ្ជមានវីរុសកូវីដ-១៩ បានទៅទីនោះ។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា បច្ចុប្បន្ននេះ រដ្ឋបានបញ្ចេញរថយន្តចល័តចំនួន៧គ្រឿង ដើម្បីលក់អង្ករ ទឹកសុទ្ធ ទឹកស៊ីអ៊ីវ ទឹកត្រី មី និងត្រីខកំប៉ុង ជូនប្រជាពលរដ្ឋនៅក្នុងតំបន់ក្រហម។
លោក ឃួង ស្រេង បន្តថា ក្រុមការងារជំនាញកំពុងពិនិត្យនិងត្រៀមបញ្ចេញរថយន្តបន្ថែមសម្រាប់លក់បន្លែ ត្រី សាច់ និងគ្រឿងទេសមួយចំនួនទៀតជូនប្រជាពលរដ្ឋផងដែរ។
លោកមានប្រសាសន៍ថា៖ «យើងមិនអាចជប់កើតទេ! ឥលូវរថយន្តកំពុងចេញទៅ! ហើយបន្លែ យើងកំពុងរៀបចំឱ្យគាត់ យើងកំពុងធ្វើហើយ មិនមែនមានតែរថយន្តទេ កន្លែងដាក់ស្នាក់ការលក់ យើងមានទៀត»។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានឱ្យដឹងថា គាត់ក៏ជាអ្នករងគ្រោះក្នុងការបិទខ្ទប់នៅក្នុងតំបន់ក្រហម ដូចប្រជាពលរដ្ឋមួយចំនួនទៀតដែរ។ លោកស្រីបន្តថា ពួកគាត់ពិបាកធ្វើដំណើរទៅក្រៅទិញម្ហូបអាហារ ហើយអ្នកដែលរងគ្រោះជាងគេគឺពលរដ្ឋដែលមានជីវភាពទ័លក្រ។
ករណីនេះ លោកស្រីអំពាវនាវទៅរដ្ឋាភិបាលពន្លឿនការយកចិត្តទុកដាក់ និងបញ្ចេញរថយន្តចល័តនៅទូទាំងរាជធានីភ្នំពេញ ជាពិសេសនៅតំបន់ក្រហម ឬតំបន់ដែលងាយរងគ្រោះដោយសារជំងឺកូវីដ-១៩ ដើម្បីឆ្លើយតបឱ្យបានទាន់ពេល ក្នុងការលក់បន្លែ ត្រី សាច់ និងគ្រឿងទេសគ្រប់ប្រភេទជូនដល់ពលរដ្ឋ ទើបទប់ស្កាត់ការឆ្លងរាលដាលនៃជំងឺកូវីដបានប្រសិទ្ធភាពខ្ពស់។
លោកស្រីអំពាវនាវដូច្នេះថា៖ «សម្រាប់អ្នករៀបចំក៏មានផលលំបាក មិនខុសពីយើងទាមទារហ្នឹងទេ មានតែការអធ្យាស្រ័យ ហើយធ្វើយ៉ាងម៉េចផ្តល់ជាមតិជាស្ថាបនា ដើម្បីឱ្យមានការរៀបចំឱ្យមានការប្រសើរនៅក្នុងកាលៈទេសៈនេះ។ អញ្ចឹងមានតែធ្វើយ៉ាងម៉េចឱ្យខាងក្រសួងគាត់ឆ្លើយតបចំពោះតម្រូវការនេះឱ្យបានទាន់ពេល និងរៀបចំដំណើរការឱ្យបានងាយស្រួល ដើម្បីអាចឱ្យពលរដ្ឋគាត់ចូលរួមសហការឱ្យបានពេញលេញ ដើម្បីសុវត្ថិភាពទាំងអស់គ្នា»។
ក្រសួងពាណិជ្ជកម្ម បានឱ្យដឹងថា ចាប់ពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០២១ គឺមានរយៈពេល៥ថ្ងៃហើយដែលរថយន្ដចល័តរបស់ក្រសួងពាណិជ្ជកម្ម បានលក់អង្ករសរុបចំនួន២៩៧បេ មីជាតិចំនួន១ ៩៧៥ កេស ទឹកត្រីទឹកស៊ីអ៊ីវសរុបចំនួន១៣៦យួរ ជូនប្រជាពលរដ្ឋក្នុងភូមិសាស្ត្របិទខ្ទប់នៃរាជធានីភ្នំពេញ និងក្រុងតាខ្មៅ (ខេត្តកណ្តាល)។
ក្រោយមក នៅថ្ងៃទី២០ ខែមេសា ក្រសួងពាណិជ្ជកម្ម បានបញ្ចេញរថយន្តចល័ត៥គ្រឿង ដើម្បីបន្តដឹកស្បៀងលក់ជូនប្រជាជននៅតំបន់ក្រហមចំនួន៧ទីតាំងបន្ថែមទៀត ស្ថិតនៅក្នុងខណ្ឌចំនួន៣ រួមមាន ខណ្ឌមានជ័យ ខណ្ឌពោធិ៍សែនជ័យ និងខណ្ឌទួលគោក ដែលស្បៀងទាំងនោះស្ថិតក្រោមតម្លៃក្នុងទីផ្សារ ដើម្បីសម្រួលជីវភាពប្រជាពលរដ្ឋក្នុងអំឡុងពេលបិទខ្ទប់នៅទីក្រុងភ្នំពេញ និងក្រុងតាខ្មៅ (ខេត្តកណ្តាល) ទៀតផង៕