ប្រជាកសិករជាអ្នកដាំបន្លែមួយចំនួននៅខេត្តកណ្តាល បង្ហាញក្តីបារម្ភថា បន្លែរបស់ពួកគាត់អាចនឹងមិនមានទីផ្សារដោយសារតែផ្សារមួយចំនួននៅរាជធានីភ្នំពេញ ត្រូវបានបិទជាបន្តបន្ទាប់ ដើម្បីទប់ស្កាត់ការរីករាលដាលនៃជំងឺកូវីដ-១៩។
លោក តៃ សុង កសិករដាំបន្លែនៅឃុំទឹកវិល ស្រុកស្អាង ប្រាប់ វីអូឌី នៅថ្ងៃពុធនេះថា រូបលោកនិងកសិករផ្សេងទៀតនៅក្នុងឃុំ កំពុងមានក្តីបារម្ភជាខ្លាំង ដោយសារតែដំណាំបន្លែដែលពួកគាត់ដាំបានហើយនោះ ពុំមានទីផ្សារសម្រាប់លក់។
កសិកររូបនេះឱ្យដឹងថា ដំណាំបន្លែគ្រប់មុខដែលកសិករដាំបាននៅពេលនេះ គឺមិនអាចនាំយកទៅលក់នៅតាមផ្សារនានាក្នុងរាជធានីភ្នំពេញបានទេ ដោយសារក្រុងមួយនេះត្រូវបានអាជ្ញាធរបិទខ្ទប់ទាំងស្រុង។ លោកអះអាងថា បន្លែសាឡាត់ប្រហែល១០តោនរបស់លោក និងបន្លែសាឡាត់ជាង២០០តោនរបស់អ្នកភូមិ កំពុងខូចចោលជាបណ្តើរៗហើយ។
លោកបន្ថែមថា៖ «ធ្លាប់តែខែហ្នឹងបន្លែត្រូវមានហាងឆេង ប៉ុន្តែដោយសារមានវិបត្តិជំងឺកូវីដ គេបិទផ្សារ អត់មានកន្លែងសម្រាប់លក់ដូរ។ អ៊ីចឹងកសិករខាតទាំងស្រុង ទឹកភ្នែកលាយបាយហើយ។ ហើយអាជីវករដែលមកប្រមូលទិញទៅលក់បន្ត គេចាប់យកទៅធ្វើចត្តាឡីស័កអស់ទៀត។ ខ្ញុំចង់ឱ្យក្រសួងកសិកម្មជួយរៀបចំកន្លែងឱ្យបានសមស្រប សម្រាប់កសិករយកបន្លែទៅលក់ក្នុងសម័យជំងឺកូវីដនេះ ដើម្បីជួយដោះស្រាយដល់កសិករដែលដាំបន្លែបានហើយ [គ្មានទីផ្សារ]»។
កសិករម្នាក់ទៀតនៅឃុំព្រែកស្តី ស្រុកកោះធំ អ្នកស្រី សែម ភា និយាយថា ប្រជាកសិករនៅខាងស្រុកកោះធំ ក៏ជួបបញ្ហារឿងគ្មានទីផ្សារសម្រាប់លក់បន្លែនេះដែរ ខណៈក្រុងភ្នំពេញ និងក្រុងតាខ្មៅ ត្រូវបានរាំងខ្ទប់។ អ្នកស្រីថា កសិករទាំងនោះមួយចំនួនប្រឈមជំពាក់បំណុល ដោយសារពួកគាត់បានខ្ចីលុយនិងចងការប្រាក់គេ ដើម្បីធ្វើដើមទុនដាំបន្លែ។
អ្នកស្រីបន្ថែមថា៖ «ដល់ពេលយកទៅភ្នំពេញអត់រួច បន្លែត្រូវគរចោលនៅស្រុក។ អ្នកដែលជួបបញ្ហាខ្លាំងជាងគេ គឺម៉ូយអ្នកយកទៅលក់ភ្នំពេញ ដោយសារគាត់ត្រូវចំណាយលុយឱ្យកសិករខ្ចីធ្វើទ្រើង ទិញជី ទិញថ្នាំ និងឧបករណ៍ផ្សេងៗជាដើមហ្នឹង។ ហើយដល់ពេលដាំបានផល បានលុយសងគេវិញ ប៉ុន្តែឥលូវផលដំណាំគាត់លក់អត់ចេញ អ៊ីចឹងគាត់ជួបបញ្ហាជំពាក់គេហើយ»។
អនុប្រធានមន្ទីរកសិកម្ម រុក្ខាប្រមាញ់ និងនេសាទ លោក ហ៊ សុផល សុំមិនឆ្លើយតបពាក់ព័ន្ធករណីនេះ ដោយបង្វែរឱ្យទៅសួរប្រធានមន្ទីរ លោក ប៊ុន ទួនស៊ីម៉ូណា និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន វិញ ប៉ុន្តែ វីអូឌី មិនអាចសុំការឆ្លើយតបពីអ្នកទាំង២នេះបានឡើយ ដោយទូរសព្ទចូលគ្មានអ្នកទទួល។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា កាលណាផលិតផលកសិកម្មរបស់កសិករគ្មានទីផ្សារ លក់មិនដាច់ ឬលក់មិនចេញ នឹងធ្វើឱ្យពួកគេជួបបញ្ហាប្រឈមជាច្រើន ដូចជា បញ្ហាជីវភាព និងបំណុល ជាដើម។ លោកថា ដើម្បីដោះស្រាយបញ្ហាប្រឈមក្នុងស្ថានភាពនេះ រដ្ឋាភិបាលគួររៀបចំឱ្យមានការដើរប្រមូលទិញបន្លែពីប្រជាកសិករយកទៅលក់នៅតំបន់បិទខ្ទប់។
លោកបន្ថែមថា៖ «ពួកគាត់អាចនឹងមានបញ្ហាខ្លាំងផងដែរទៅលើការផ្គត់ផ្គង់ចំណូលរបស់ពួកគាត់ ប្រសិនបើអាជ្ញាធរមិនរកវិធីសាស្ត្រក្នុងការដោះស្រាយ ឬក៏ប្រមូលទិញនូវផលិតផលកសិកម្មរបស់ពួកគាត់មកកាន់ទីផ្សារ។ ហើយករណីនេះគួរសម្របសម្រួលឱ្យមានអ្នកដើរប្រមូលទិញកសិផលរបស់កសិករ មកចូលលក់ក្នុងតំបន់បិទខ្ទប់ក្នុងរាជធានីភ្នំពេញដោយមានដាក់តាំងរៀបចំកន្លែងដែលរក្សាគម្លាតពីគ្នាធំទូលាយ។ ខ្ញុំលើកឧទាហរណ៍ ដូចជា រៀបចំនៅតំបន់ដីឡូត៍ ឬតំបន់ដីវាល ជាដើមហ្នឹង»។
រដ្ឋាភិបាលបានចេញបទបញ្ជាបិទខ្ទប់ភូមិសាស្ត្រនៅរាជធានីភ្នំពេញ និងក្រុងតាខ្មៅ ចាប់ពីថ្ងៃទី១៥ ដល់ថ្ងៃទី២៨ ខែមេសា ឆ្នាំ២០២១នេះ ដើម្បីគ្រប់គ្រងការរាលដាលនៃជំងឺកូវីដ-១៩។ ស្របពេលការបិទខ្ទប់នេះ ផ្សារមួយចំនួនក្នុងរាជធានីភ្នំពេញ ក៏បានបិទជាបន្តបន្ទាប់ផងដែរ ហើយប្រជាពលរដ្ឋតម្រូវឱ្យនៅតែក្នុងផ្ទះ ប៉ុន្តែអាចចេញក្រៅបានលុះត្រាតែមានករណីបន្ទាន់ឬចាំបាច់បំផុតប៉ុណ្ណោះ៕