គណៈកម្មការចំពោះកិច្ចចាក់វ៉ាក់សាំងកូវីដ-១៩ ស្នើសុំការយោគយល់ពីប្រជាពលរដ្ឋ ជុំវិញការរអាក់រអួលនៃប្រព័ន្ធស្កេន QR Code ដើម្បីស្វែងរកទិន្នន័យនៃការចាក់វ៉ាក់សាំងការពារជំងឺកូវីដ-១៩ ក្រោយពីប្រព័ន្ធនេះត្រូវបាន Hack ពីជនអនាមិក។
ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ លោកស្រី ឱ វណ្ណឌីន មានប្រសាសន៍នៅថ្ងៃព្រហស្បតិ៍នេះថា គណៈកម្មការបានទទួលយកប្រព័ន្ធស្កេន QR Code ដើម្បីស្វែងរកទិន្នន័យនៃការចាក់វ៉ាក់សាំងការពារជំងឺកូវីដ-១៩ មកដំណើរការ កាលពីយប់ថ្ងៃទី៣១ ខែមីនា ហើយត្រូវបានធ្វើយុទ្ធនាការថ្ងៃទី១ ខែមេសាមក ដោយប្រើប្រាស់បណ្តើរនិងដោះស្រាយបញ្ហាជាច្រើនបណ្តើរ ខណៈប្រព័ន្ធនេះក៏មានការលួច Hack ពីជនអានាមិកផងដែរ។
ករណីនេះ លោកស្រីថ្លែងថា៖ «សូមអធ្យាស្រ័យនូវភាពរអាក់រអួលទាំងនេះ តែ គ.វ.ក-១៩ [គណៈកម្មការចំពោះកិច្ចចាក់វ៉ាក់សាំងកូវីដ-១៩] បាននិងកំពុងខិតខំប្រឹងប្រែងធ្វើ តែតម្រូវពេលវេលាយូរបន្តិចដើម្បីដោះស្រាយភាពសាំញ៉ាំមួយចំនួនធំនេះ តែក៏បានរិះរកមធ្យោបាយដើម្បីបានប្រើ [ប្រព័ន្ធ QR Code] ជាបណ្តោះអាសន្នសិន ទោះជាមានភាពគាំងខ្លះ ដើរខ្លះក៏ដោយ តែយើងនៅតែរកវិធីដោះស្រាយជាបន្តបន្ទាប់»។
បើតាមលោកស្រី ឱ វណ្ណឌីន ការដោះស្រាយប្រព័ន្ធ QR Code នេះ អាចនឹងត្រូវប្រើរយៈពេលយូរ ហើយក្រុមការងារកំពុងរកមធ្យោបាយផ្សេងដើម្បីបានប្រើប្រាស់ប្រព័ន្ធនេះជាបណ្ដោះអាសន្ន ខណៈប្រព័ន្ធថ្មីមួយទៀតនឹងអាចរៀបចំដំណើរការក្នុងពេលខាងមុខជំនួសឱ្យប្រព័ន្ធកំពុងប្រើបច្ចុប្បន្ននេះ៕