មន្ត្រីជាន់ខ្ពស់សាលាដំបូងខេត្តកំពត បានអះអាងថា តុលាការខេត្តនេះបានសម្រេចឃុំខ្លួនជនជាតិចិនចំនួន១៦នាក់នៅពន្ធនាគារជាបណ្តោះអាសន្ន ដោយចោទប្រកាន់ពីបទមិនគោរពតាមវិធានការរដ្ឋបាល និងបានរារាំងដល់ការអនុវត្តវិធានការផងដែរ។
កាលពីថ្ងៃទី៦ ខែមេសា ឆ្នាំ២០២១នេះ រដ្ឋាភិបាលបានសម្រេចផ្អាកការធ្វើដំណើរចេញ-ចូលពីខេត្តមួយទៅខេត្តមួយទៀតជាបណ្តោះអាសន្ន ក្រោមហេតុផលដើម្បីទប់ស្កាត់ការឆ្លងរាលដាលជំងឺកូវីដ-១៩។
ប្រធានលេខាធិការដ្ឋាន និងជាអ្នកនាំពាក្យសាលាដំបូងខេត្តកំពត លោក ម៉ាន់ បូរេត ប្រាប់ វីអូឌី នៅរសៀលថ្ងៃទី២២ ខែមេសា ថាគិតតឹ្រមថ្ងៃនេះ តុលាការបានសម្រេចឃុំខ្លួនជនជាតិចិនចំនួន១៦នាក់នៅពន្ធនាគារជាបណ្ដោះអាសន្ន។
លោកបន្ថែមថា ក្នុងនោះជនជាតិចិន២នាក់បានបន្លំខ្លួនធ្វើជាគ្រូពេទ្យ ហើយបើករថយន្តសង្គ្រោះបន្ទាន់ពីរាជធានីភ្នំពេញទៅខេត្តកំពត និងជនជាតិចិនចំនួន១៤នាក់ទៀតត្រូវតុលាការសម្រេចឃុំខ្លួននៅថ្ងៃព្រហស្បតិ៍នេះ។
លោកបញ្ជាក់ថា ជនជាតិចិនទាំង១៤នាក់ត្រូវបានសមត្ថកិច្ចឃាត់ខ្លួនកាលពីថ្ងៃទី២០ ខែមេសា បន្ទាប់ពីពួកគេលួចធ្វើដំណើរចេញពីខេត្តព្រះសីហនុមកខេត្តកំពត តាមរថយន្តដឹកគ្រឿងសមុទ្រ ក្នុងគោលដៅមករាជធានីភ្នំពេញ។
អ្នកនាំពាក្យរូបនេះបញ្ជាក់ថា ជនជាតិចិនទាំង១៦នាក់នោះត្រូវបានតុលាការចោទប្រកាន់តាមមាត្រា១០និង១១ នៃច្បាប់ថ្មីស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩។
លោកថា៖ «មកដល់ថ្ងៃនេះ ចៅក្រមសាលាដំបូងសម្រេចឃុំជនជាតិចិន១៦នាក់ហើយ ដោយរឿងពីមុន ពាក់ព័ន្ធចិន២នាក់ និងរឿងទី២ ពាក់ព័ន្ធចិន១៤នាក់។ សម្រេចឃុំដោយចោទប្រកាន់តាមមាត្រា១០និងមាត្រា១១ ច្បាប់ថ្មីស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩»។
ករណីស្រដៀងគ្នានេះ សមត្ថកិច្ចខេត្តកែបនិងកំពត គ្រោងបញ្ជូនបុរសជនជាតិខ្មែរពីរនាក់ទៅតុលាការខេត្តកំពត នៅថ្ងៃទី២៣ ខែមេសា ក្រោយពីបុរសទាំងពីររូបនោះបានលួចដឹកជនជាតិវៀតណាមចំនួន៧នាក់ឆ្លងខេត្តកែបនិងកំពតបម្រុងចេញទៅវៀតណាមល្មើសបម្រាម។
ស្នងការរងទទួលផែនអន្តោប្រវេសន៍នៃស្នងការដ្ឋាននគរបាលខេត្តកែប លោក សូ ហុនឌី ប្រាប់ វីអូឌី នៅថ្ងៃនេះថា សមត្ថកិច្ចបានឃាត់ខ្លួនជនជាតិវៀតណាម៧នាក់ និងខ្មែរម្នាក់ កាលពីថ្ងៃទី២១ ខែមេសា បន្ទាប់ពីពួកគេលួចរត់គេចពីខេត្តព្រះសីហនុ ឆ្លងកាត់ខេត្តកំពត និងខេត្តកែប ដើម្បីចេញទៅប្រទេសវៀតណាម។
លោកបន្តថា ជនជាតិវៀតណាមទាំង៧នាក់នោះ រួមមាន ស្រ្តី៥នាក់ និងបុរស២នាក់ ត្រូវបានសមត្ថកិច្ចបញ្ជូនខ្លួនទៅធ្វើចត្តាឡីស័ក មុននឹងធ្វើការផាកពិន័យ បន្ទាប់មកនឹងបញ្ជូនចេញទៅប្រទេសវៀតណាមវិញ។
លោកថា៖ «ព្រះរាជអាជ្ញា ស្នងការខេត្ត សម្រេចឱ្យធ្វើការផាកពិន័យអន្តរកាលចំពោះជនជាតិវៀតណាមទាំង៧នាក់ តាមមាត្រា១០ ដែលមិនគោរពតាមវិធានរដ្ឋបាលនៃច្បាប់ស្ដីពីការទប់ស្កាត់នៃការឆ្លងរីករាលដាលជំងឺកូវីដ-១៩»។
ចំណែកបុរសជនជាតិខ្មែរម្នាក់ដែលដឹកជនជាតិវៀតណាមទាំង៧នាក់នោះ លោក សូ ហុនឌី អះអាងថា សមត្ថកិច្ចកំពុងរៀបចំឯកសារបញ្ជូនទៅតុលាការដើម្បីចាត់ការតាមនីតិវិធីច្បាប់។
លោកថា៖ «ពាក់ព័ន្ធជនជាតិខ្មែរ កម្លាំងជំនាញព្រហ្មទណ្ឌ គាត់កសាងសំណុំរឿងបញ្ជូនទៅតុលាការ ដោយអនុវត្តតាមរបស់ព្រះរាជអាជ្ញាដែរ ដើម្បីយកទៅវិនិច្ឆ័យទោសតាមច្បាប់។ ពាក់ព័ន្ធនឹងជនជាតិខ្មែរហ្នឹង គាត់ជាអ្នកស៊ីឈ្នួលរត់ឌុបឆ្លងកាត់ពីខេត្តកែប និងកំពត»។
ពាក់ព័ន្ធនឹងការលួចដឹកជនជាតិវៀតណាមទាំង៧នាក់នេះដែរ ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ លើកឡើងថា សមត្ថកិច្ចក៏បានឃាត់ខ្លួនបុរសជនជាតិខ្មែរម្នាក់ទៀត បន្ទាប់ពីបុរសរូបនោះដឹកជនជាតិវៀតណាមពីខេត្តព្រះសីហនុ ចូលមកខេត្តកំពត ល្មើសបម្រាមរដ្ឋាភិបាល។ លោកបន្តថា សមត្ថកិច្ចកំពុងកសាងសំណុំរឿងបញ្ជូនបុរសនោះទៅតុលាការនៅថ្ងៃស្អែកនេះ។
លោក ម៉ៅ ច័ន្ទមធុរិទ្ធ បន្តថា៖ «ទី១ ពាក់ព័ន្ធនឹងរត់ពន្ធមនុស្ស ទី២ ល្មើសបម្រាមគោចររបស់រាជរដ្ឋាភិបាល។ យើងនឹងបញ្ជូនទៅតុលាការ ប្រហែលស្អែក ព្រោះថ្ងៃនេះធ្វើឯកសារមិនទាន់ហើយ»។
ស្នងការនគរបាលខេត្តកំពតដដែល អះអាងថា ចាប់តាំងពីប្រមុខរដ្ឋាភិបាលដាក់ចេញបម្រាមគោចរមកដល់ថ្ងៃទី២២ ខែមេសានេះ សមត្ថកិច្ចបានឃាត់ខ្លួនជនបរទេសចំនួន១៧នាក់។ ក្នុងនោះមានជនជាតិចិនពីរនាក់បន្លំបើករថយន្តសង្គ្រោះបន្ទាន់ពីភ្នំពេញទៅខេត្តកំពត។ ជនជាតិអាល្លឺម៉ង់ម្នាក់ល្មើសបម្រាមផឹកស៊ី ព្រមទាំងជនជាតិចិន១៤នាក់ដែលលួចរត់មកពីខេត្តព្រះសីហនុផងដែរ។
លោកថា ក្រៅពីជនបរទេសទាំងជាង១០នាក់នេះ កន្លងមក មានជនជាតិខ្មែរចំនួន២នាក់ហើយដែលត្រូវបានតុលាការសម្រេចឃុំខ្លួនពាក់ព័ន្ធករណីល្មើសបម្រាមនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ជំរុញឱ្យរដ្ឋាភិបាលចាត់វិធានទៅលើមន្ត្រីនិងជនបរទេសដែលបានល្មើសច្បាប់ ដើម្បីកុំឱ្យករណីនេះកើតឡើងដដែលៗ។
លោកថា៖ «អ៊ីចឹងខ្ញុំយល់ថា គួរចាត់វិធានការឱ្យធ្ងន់ធ្ងរ ដោយសារខ្លួនដឹងពីវិធានការហ្នឹងហើយ តែល្មើសវិធានការរដ្ឋាភិបាល រួមទាំងជនជាតិចិន ព្រោះគេឆ្លងចុះឡើងក្នុងន័យចេតនារបស់ខ្លួនពាក់ព័ន្ធផលប្រយោជន៍និងជំនួញរបស់ខ្លួន ផ្ទុយពីការដោះស្រាយជីវភាព»។
ច្បាប់ថ្មីស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀត» មាត្រា១០ បានចែងពីបទមិនគោរពតាមវិធានការរដ្ឋបាល។ មាត្រានេះចែងថា អំពើដោយចេតនាមិនគោរពចំពោះវិធានការរដ្ឋបាលដែលដាក់ចេញស្របតាមច្បាប់ ត្រូវពិន័យអន្តរការណ៍ពី១លានរៀល ដល់៥លានរៀល និងដាក់ពន្ធនាគារពី៦ខែ ទៅ៣ឆ្នាំ។ ក្នុងករណីអំពើល្មើសនេះបណ្តាលឱ្យឆ្លងកូវីដ-១៩ទៅអ្នកដទៃ ត្រូវផ្តន្ទាទោសពី២ឆ្នាំ ទៅ៥ឆ្នាំ និងពិន័យជាប្រាក់ពី៥លានរៀល ទៅ២០លានរៀល។
ដោយឡែក មាត្រា១១ ដែលចែងអំពីការរារាំងដល់ការអនុវត្តវិធានការរដ្ឋបាលវិញ បញ្ជាក់ថា អំពើរារាំងឬបង្កឧបសគ្គដោយចេតនាដល់ការអនុវត្តវិធានការដែលដាក់ចេញដោយស្របច្បាប់ ត្រូវពិន័យពី២លានរៀល ដល់១០លានរៀល និងដាក់ពន្ធនាគារពី៦ខែ ទៅ៣ឆ្នាំ។ ក្នុងករណីអំពើល្មើសនេះបង្កការឆ្លងកូវីដ-១៩ទៅអ្នកដទៃ ឬប៉ះពាល់ធ្ងន់ធ្ងរដល់សុខភាពសាធារណៈ ត្រូវជាប់គុកពី២ឆ្នាំ ទៅ៥ឆ្នាំ និងពិន័យជាប្រាក់ពី៥លានរៀល ទៅ២០លានរៀល៕
