អាជ្ញាធរក្រុងប៉ោយប៉ែត ផ្អាកមិនឱ្យពលរដ្ឋធ្វើដំណើរចេញ-ចូលជាបណ្តោះអាសន្ននៅក្នុងបុរី «រស្មីដួងច័ន្ទ» ស្ថិតនៅក្នុងភូមិសាមគ្គីមានជ័យ ក្រោយពីរកឃើញមនុស្ស៣នាក់មានវិជ្ជមានកូវីដ-១៩ ក្នុងនោះមានជនជាតិឥណ្ឌូនេស៊ីម្នាក់ផងដែរ។
ក្នុងសេចក្តីជូនដំណឹងរបស់រដ្ឋបាលក្រុងប៉ោយប៉ែត ខេត្តបន្ទាយមានជ័យ បានឱ្យដឹងនៅថ្ងៃនេះថា កាលពីថ្ងៃទី២១ ខែមេសា បុរសជនជាតិឥណ្ឌូនេស៊ីឈ្មោះ ជូហាន សូសាន់តូ ដែលស្នាក់នៅផ្ទះមួយក្នុងបុរីដួងច័ន្ទ មានអាការមិនស្រួលខ្លួន ក៏ទៅពិនិត្យសុខភាពនៅមន្ទីរពេទ្យបង្អែកប៉ោយប៉ែត ហើយគ្រូពេទ្យក៏បានយកសំណាកទៅពិនិត្យ ក្នុងនោះលទ្ធផលបានបញ្ជាក់នៅថ្ងៃនេះថា «វិជ្ជមានកូវីដ-១៩»។
សេចក្តីជូនដំណឹងបន្តថា ចំណែកអ្នកដែលប៉ះពាល់ដោយផ្ទាល់ជាមួយជនជាតិឥណ្ឌូនេស៊ីនោះ ចំនួន២នាក់ផ្សេងទៀត ត្រូវបានរកឃើញវិជ្ជមានកូវីដ-១៩ នៅថ្ងៃនេះផងដែរ ហើយពួកគេត្រូវបានដាក់ឱ្យសម្រាកព្យាបាលនៅមណ្ឌលសុខភាពប៉ោយប៉ែត១ ខណៈអ្នកពាក់ព័ន្ធ៧នាក់ទៀតកំពុងយកសំណាកទៅពិនិត្យ តែមិនទាន់ទទួលបានលទ្ធផលនៅឡើយ។
ករណីនេះ រដ្ឋបាលក្រុងប៉ោយប៉ែត សម្រេចផ្អាកការធ្វើដំណើរចេញ-ចូលក្នុងបុរីរស្មីដួងច័ន្ទជាបណ្តោះអាសន្ន ចាប់ពីថ្ងៃជូនដំណឹងនេះ រហូតដល់មានការជូនដំណឹងសារជាថ្មី។
គិតមកដល់ថ្ងៃទី២២ ខែមេសា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ នៅទូទាំងប្រទេសសរុប៨ ៨៤៨នាក់ ក្នុងនោះព្យាបាលជាសះស្បើយចំនួន៣ ១៤៨នាក់ និងកំពុងសម្រាកព្យាបាលមានចំនួន៥ ៦៣៣នាក់៕