អាជីវករផ្សារកសិផលជ្រោយចង្វារ ស្នើសុំអន្តរាគមន៍ពីរដ្ឋបាលខណ្ឌជួយសម្របសម្រួលជាមួយម្ចាស់ផ្សារឱ្យបញ្ចុះថ្លៃឈ្នួលតូបដល់ពួកគេ ៥០ភាគរយ ខណៈចំណូលរបស់ពួកគេត្រូវបាត់បង់ ដោយសារបញ្ហារីករាលដាលនៃជំងឺកូវីដ-១៩ និងវិធានការបិទខ្ទប់ទីក្រុងរបស់អាជ្ញាធរ។
អាជីវករលក់គ្រឿងទេសនៅផ្សារកសិផលជ្រោយចង្វារ អ្នកស្រី ទុយ ណារី លើកឡើងនៅថ្ងៃទី២២ ខែមេសា ឆ្នាំ២០២១នេះថា អ្នកស្រីនិងអាជីវករដទៃទៀត ជាពិសេសអ្នកលក់អីវ៉ាន់មិនចាំបាច់ដូចជា ខោអាវ អ៊ុតសក់ និងគ្រឿងសម្អាងជាដើម បានស្នើទៅម្ចាស់ផ្សារឱ្យជួយបញ្ចុះថ្លៃឈ្នួលតូប ៥០ភាគរយ ប៉ុន្តែម្ចាស់ផ្សារបានបញ្ចុះតម្លៃតូបត្រឹម៥ដុល្លារប៉ុណ្ណោះ ក្រោមការសម្របសម្រួលពីរដ្ឋបាលសង្កាត់។
ស្រ្តីជាម្តាយរបស់កូនតូច២នាក់ វ័យ៤០ឆ្នាំរូបនេះ បន្ថែមថា អ្នកស្រីគ្មានលទ្ធភាពបង់ថ្លៃឈ្នួលតូបពេញបាន ដោយសារខ្លួនបានផ្អាកលក់១សប្តាហ៍មកហើយ ដោយសារបារម្ភខ្លាចឆ្លងជំងឺកូវីដ-១៩ និងបញ្ហាខ្សត់អតិថិជនមកផ្សារ ចាប់តាំងពីពេលផ្ទុះព្រឹត្តិការណ៍២០កុម្ភៈ។
អ្នកស្រី ទុយ ណារី និយាយថា៖ «សុំឱ្យខាងអាជ្ញាធរខណ្ឌឱ្យគាត់ជួយអាជីវករពួកខ្ញុំផង ដោយសារពួកខ្ញុំគ្មានសមត្ថភាពនឹងបង់ទេ តម្លៃពេញណា! ខ្ញុំសូមបញ្ជាក់ តម្លៃពេញគឺខ្ញុំអត់មានលទ្ធភាពបង់ទេ។ អ្នកខ្លះក៏គាត់ដេកផ្ទះ អ្នកខ្លះក៏គាត់លក់អត់បានដែរ ដល់អញ្ចឹងពួកអាជីវករខ្ញុំ រួមមតិជាមួយហ្នឹង សុំឱ្យបញ្ចុះតម្លៃ៥០ភាគរយទៅដល់អ្នកគ្រប់គ្រងផ្សារហ្នឹង»។
អាជីវករអ៊ុតសក់ក្នុងផ្សារមួយរូបវ័យ៤០ឆ្នាំ បានប្រាប់ វីអូឌី ក្នុងលក្ខខណ្ឌសុំមិនបញ្ចេញឈ្មោះថា ចាប់តាំងពីផ្ទុះជំងឺកូវីដ-១៩ជាថ្មីមក ភ្ញៀវរបស់អ្នកស្រីបានធ្លាក់ចុះដល់៩០ភាគរយ ហើយអ្នកស្រីសម្រេចបិទតូបចាប់ពីថ្ងៃចូលឆ្នាំខ្មែរមក ដើម្បីចូលរួមប្រឆាំងជំងឺកូវីដ-១៩ តាមការណែនាំរបស់រដ្ឋាភិបាល។
អ្នកស្រីថា ផ្សារកសិផលជ្រោយចង្វារ មានអាជីវករជាង១០០នាក់ និងតូបជាង៣០០ ហើយថា ការដែលម្ចាស់ផ្សារចុះថ្លៃតូបត្រឹម៥ដុល្លារនោះ គឺមិនអាចទទួលយកបានទេ ខណៈអ្នកស្រីត្រូវរ៉ាប់រងការបង់ថ្លៃឈ្នួលផ្ទះជួល ដែលអ្នកស្រីថា ខាងម្ចាស់ផ្ទះក៏មិនព្រមបញ្ចុះថ្លៃ និងមិនអាចធ្វើដំណើរទៅណាឆ្ងាយដើម្បីរកប្រាក់ចំណូល ដោយសារវិធានការបិទខ្ទប់ដែលកំពុងបង្កើនការរឹតបន្តឹង។
អាជីវកររូបនេះនិយាយថា៖ «៥ដុល្លារហ្នឹង គឺពួកខ្ញុំទទួលយកវាមិនបាន គឺដូចជាវាតិចពេក។ ពួកខ្ញុំវាអត់មានលទ្ធភាពបង់ បងដឹងហើយក្នុងខែហ្នឹងពួកខ្ញុំទៅ [លក់ដូរ] គឺអត់មានអតិថិជនចូលក្នុងផ្សារហ្នឹងទេ គឺស្ងាត់! លក់ម្ហូប បន្លែ ត្រីសាច់អីគឺនៅសល់តែទាំងអស់។ ទើបតែពីមួយរយៈប៉ុន្មានថ្ងៃនេះ បន្លែ ត្រី សាច់ គ្នាលក់បាន ហើយដូចជាមុខរបរផ្សេងៗគឺបិទទាំងអស់»។
អាជីវករលក់គ្រឿងសមុទ្រមួយរូបវ័យ២៨ឆ្នាំ អ្នកស្រី ឡុង ស្រីនីច ឱ្យដឹងថា គាត់បានបិទតូបនិងជញ្ជូនអីវ៉ាន់ចាំបាច់ផ្សេងៗមកស្តុកទុកនៅផ្ទះ បន្ទាប់ពីលេចឮព័ត៌មានអ្នកជំងឺកូវីដ-១៩ បានចូលមកផ្សារ។ អ្នកស្រីថា ខាងផ្សារបានមកទារលុយថ្លៃឈ្នួលជាញឹកញាប់ ប៉ុន្តែអ្នកស្រីបដិសេធ ដោយសារមុខរបរអ្នកស្រីធ្លាក់ចុះខ្លាំងខុសពីអាជីវករដែលលក់បន្លែ ត្រីសាច់ ដែលគេអាចទិញយកទៅស្តុកទុកបាន។
អ្នកស្រី ឡុង ស្រីនីច និយាយថា៖ «បើខ្ញុំ ខ្ញុំគិតថា បើគាត់ចុះតម្លៃ អាហ្នឹងបានខ្ញុំព្រមបង់។ គ្រាន់ខ្ញុំសុំត្រឹម៥០ភាគរយហ្នឹង។ ខ្ញុំនិយាយអញ្ចឹង ព្រោះអីពួកខ្ញុំតស៊ូទៅសង្កាត់២[ទៅ]៣ដងហើយ ហើយទៅខណ្ឌក៏២[ទៅ]៣ដងដែរ ដល់ពេលអញ្ចឹង ខ្ញុំអត់ទាន់បង់ទេ ទាល់តែមានដំណោះស្រាយឱ្យខ្ញុំ បានខ្ញុំបង់»។
ចៅសង្កាត់ជ្រោយចង្វារ លោក ម៉ៅ ប៊ុនថា ទទួលស្គាល់ពីផលប៉ះពាល់ចំពោះមុខរបររបស់អាជីវករ ហើយអាជ្ញាធរក៏បានព្យាយាមសម្របសម្រួលជាមួយម្ចាស់ផ្សារចំនួនពីរលើកមកហើយ ប៉ុន្តែខាងផ្សារមិនយល់ព្រមក្រោមហេតុផលថា ថ្លៃឈ្នួលតូបដែលពួកគេបានដាក់ឱ្យនោះ គឺមានទាបស្រាប់ទៅហើយ។
លោកថា៖ «យើងស្នើបញ្ចេញមតិទៅថ្នាក់លើបន្តបន្ទាប់ទៀតទៅ។ ប៉ុន្តែអាជ្ញាធរធ្វើបានតែប៉ុណ្ណឹង អាជ្ញាធរពុំមានសិទ្ធិទៅចាប់គាត់ចងទេ»។
អភិបាលខណ្ឌជ្រោយចង្វារ លោក ឃ្លាំង ហួត លើកឡើងថា លោកនឹងជួយសម្របសម្រួលបញ្ហាជាមួយភាគីម្ចាស់ផ្សារ។
លោកមានប្រសាសន៍យ៉ាងខ្លីថា៖ «ចាំមើលខ្ញុំហៅខាងផ្សារ ព្រោះផ្សារ [ជា] ផ្សារឯកជន។ ចាំមើលខ្ញុំហៅខាងផ្សារមកសួរនាំ»។
វីអូឌី មិនអាចទាក់ទងសុំការអធិប្បាយពីម្ចាស់ផ្សារកសិផលជ្រោយចង្វារ លោក តាំង ប៊ុនតិច បានទេ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជឿថា អាជ្ញាធរពិតជាអាចសម្របសម្រួលឱ្យម្ចាស់ផ្សារបញ្ចុះថ្លៃឈ្នួលតូបបានក្នុងកាលៈទេសៈនៃការរាតត្បាតជំងឺកូវីដ-១៩ ដែលអាជ្ញាធរចេញបម្រាមមិនឱ្យពលរដ្ឋដើរហើរដោយសេរី បើទោះផ្សារនោះជាផ្សារឯកជន។
លោកបន្តថា៖ «ចំពោះតម្លៃពេញនៃតូបម្ចាស់ផ្សារ គួរតែពិចារណាដែរ ពីព្រោះគួរតែចែកគ្នារស់ដែរ។ អាហ្នឹងរឿងម្ចាស់ផ្សារទៅលើចិត្តសប្បុរស រឿងអី! ចុះបើសិនជាអាជីវករមិនបានលក់ មិនបានអី ហើយនៅតែទាមទារលុយពេញ ដោយគាត់មិនអាចនឹងលក់ដូរបាន អាហ្នឹងវាដូចជាមិនមានសមភាពនឹងគ្នាដែរ»។
ចាប់តាំងពីយប់ថ្ងៃទី១៥ ខែមេសាមក រដ្ឋាភិបាលកម្ពុជាបានសម្រេចបិទខ្ទប់ (Lockdown) ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល រយៈពេលពីរសប្តាហ៍ ដើម្បីទប់ស្កាត់ការឆ្លងជំងឺកូវីដ-១៩។ វិធានការបិទខ្ទប់នេះ ការធ្វើដំណើរចេញពីផ្ទះឬទីសំណាក់បច្ចុប្បន្នរបស់ពលរដ្ឋ ត្រូវបានហាមឃាត់ទាំងស្រុង លើកលែងតែមានការចាំបាច់៕