រដ្ឋាភិបាលឯកភាពផ្តល់ដីទំហំជាង២ហិកតាសម្រាប់រដ្ឋបាលខេត្តតាកែវ សាងសង់ឈាបនដ្ឋានបូជាសពអ្នកដែលស្លាប់ដោយសារជំងឺកូវីដ-១៩។
ក្នុងលិខិតរបស់ទីស្ដីការគណៈរដ្ឋមន្រ្តី ចុះថ្ងៃទី២២ ខែមេសា ឆ្នាំ២០២១ ផ្ញើជូនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលខេត្តតាកែវ បានលើកឡើងថា រដ្ឋាភិបាលយល់ព្រមផ្តល់ដីមួយកន្លែងទំហំ ២ហិកតា ៣ ០៣៣ម៉ែត្រការ៉េ ស្ថិតនៅស្ថានីយផ្សព្វផ្សាយនិងស្តារព្រៃឈើត្រពាំងធំ ក្នុងភូមិតាស្រែន ឃុំខ្វាវ ស្រុកទ្រាំង ខេត្តតាកែវ ដើម្បីសាងសង់ឈាបនដ្ឋានបូជាសពអ្នកកើតជំងឺកូវីដ-១៩ តាមការស្នើសុំ។
អភិបាលរងខេត្តតាកែវ លោក លី សាវ៉េត មានប្រសាសន៍នៅថ្ងៃទី២៣ ខែមេសា ឆ្នាំ២០២១នេះថា ក្រោយពីរដ្ឋាភិបាល បានអនុញ្ញាត អាជ្ញាធរខេត្តបាននិងកំពុងរៀបចំទីតាំងនោះសម្រាប់ទុកបូជាសពអ្នកស្លាប់ដោយសារជំងឺកូវីដ-១៩ បើទោះជាមកដល់បច្ចុប្បន្ននេះ ខេត្តតាកែវនៅមិនទាន់មានអ្នកស្លាប់ដោយសារជំងឺនេះក៏ដោយ។
ទោះជាយ៉ាងណា លោកថា ខេត្តនេះនៅមិនទាន់មានឡជាប៉ាឆាបច្ចេកទេសស្តង់ដារសម្រាប់បូជាសពដែលបានស្លាប់ដោយជំងឺកូវីដ-១៩ នៅឡើយ។
លោកបន្តថា៖ «ពេលយើងបានដីហ្នឹងពីរដ្ឋាភិបាលសម្រេចមក យើងនឹងរៀបចំជាប៉ាឆាសម្រាប់បូជាសពអ្នកកើតកូវីដនេះ។ យើងគ្រាន់តែត្រៀមទេ ព្រោះអ្វីៗក៏យើងមើលមិនឃើញដែរ ហើយម៉្យាងខេត្តយើងនេះវាកើនច្រើនដែរ មួយរយៈនេះដូចមានច្រើនគ្នា»។
បើតាមអភិបាលរងខេត្តរូបនេះ គិតមកដល់ថ្ងៃទី២២ ខែមេសា ម្សិលមិញ អ្នកឆ្លងជំងឺកូវីដ-១៩ ក្នុងខេត្តនេះមានចំនួន៦៨នាក់។
គិតត្រឹមព្រឹកថ្ងៃទី២៣ ខែមេសានេះ អ្នកជំងឺកូវីដ-១៩ សរុបមានចំនួន៨ ៨៤៨នាក់ ក្នុងនោះអ្នកជំងឺពាក់ព័ន្ធព្រឹត្តិការណ៍សហគមន៍២០កុម្ភៈ មានចំនួន៨ ៣០១នាក់ និងបណ្តាលឱ្យមានអ្នកស្លាប់ចំនួន៦១នាក់។ ដោយឡែក អ្នកជំងឺដែលព្យាបាលជាសះស្បើយមានចំនួន៣ ១៤៨នាក់ និងកំពុងសម្រាកព្យាបាលចំនួន៥ ៦៣៣នាក់៕
