អ្នកនាំពាក្យក្រសួងយុត្តិធម៌ លោក គឹម សន្តិភាព បញ្ជាក់ថា អ្នករស់នៅតំបន់ក្រហមដែលត្រូវបិទខ្ទប់ដោយសារការឆ្លងរាលដាលនៃជំងឺកូវីដ-១៩នោះ មិនត្រូវបានអនុញ្ញាតឱ្យចេញទៅផ្សារឡើយ ហើយក៏មិនមានការចែកបណ្ណសម្រាប់ពួកគាត់ដែរ។
លោក គឹម សន្តិភាព បានសរសេរលើទំព័រហ្វេសប៊ុករបស់លោកថា ពលរដ្ឋក្នុង«តំបន់ក្រហម»មិនអនុញ្ញាតឱ្យទៅផ្សារទេ ហេតុនេះក៏មិនមានការចែកបណ្ណសម្រាប់ទៅផ្សារដែរ។ លោកថា មានតែមូលហេតុសុខភាពបន្ទាន់ យកសំណាក និងចាក់វ៉ាក់សាំងប៉ុណ្ណោះ ដែលអាចអនុញ្ញាតឱ្យចេញពីផ្ទះបានសម្រាប់តំបន់ក្រហម។ លោកបន្តថា ការដោះស្រាយស្បៀងដល់មុខផ្ទះ គឺជាតួនាទីរបស់ក្រសួងពាណិជ្ជកម្ម និងអាជ្ញាធរមូលដ្ឋាននីមួយៗ។
លោក គឹម សន្តិភាព បានគូសបញ្ជាក់បន្ថែមនៅថ្ងៃសុក្រដូច្នេះថា៖ «ខ្ញុំសូមជម្រាបជូនថា បណ្ណដែលសាលាក្រុងសម្រាប់ចែកជូនប្រជាពលរដ្ឋ គឺសម្រាប់នៅតំបន់មិនក្រហម មានន័យថា តំបន់ត្រូវបិទខ្ទប់! តែដោយឡែក តំបន់ក្រហមមិនមែនជាតំបន់ដែលត្រូវចែកបណ្ណហ្នឹងទេ ពីព្រោះអីបណ្ណចែកឱ្យសម្រាប់ទៅផ្សារ។ តំបន់ក្រហម គេមិនឱ្យចេញពីផ្ទះដើម្បីមូលហេតុទៅផ្សារឯណា»។
អភិបាលរាជធានីភ្នំពេញ លោក ឃួង ស្រេង បញ្ជាក់ដែរថា ផ្សារនៅក្នុងតំបន់ក្រហមត្រូវបានបិទទាំងស្រុង ដូច្នេះពលរដ្ឋដែលរស់នៅក្នុងតំបន់នោះ ក៏មិនអនុញ្ញាតឱ្យចេញពីផ្ទះដែរ ហើយបណ្ណនេះសម្រាប់តែពលរដ្ឋរស់នៅតំបន់បិទខ្ទប់តែប៉ុណ្ណោះ។
លោកថា៖ «តំបន់ក្រហម យើងអត់ចែកទេ! យើងសុខចិត្តរៀបចំឡានទៅលក់ស្បៀងឱ្យគាត់។ ឥលូវយើងមានឡានលក់បន្លែហ្នឹងដល់ទៅ ៣៤! លក់បន្លែនិងសាច់ ក្រសួងពាណិជ្ជកម្មក៏មាន ហើយយើងបោះទីតាំងលក់នៅជិតគាត់ហ្នឹង ប៉ុន្តែបើគាត់ទៅរកសេវាសុខភាព យើងអនុញ្ញាត»។
អ្នកស្រី ហួ ស្រីមុំ រស់នៅតំបន់ក្រហម ក្នុងសង្កាត់បឹងសាឡាង ខណ្ឌទួលគោក បាននិយាយថា គាត់បារម្ភពីការផ្តល់សេវាលក់ដូរម្ហូបអាហារនេះមិនទាន់តម្រូវការ ដោយថា ជាង២សប្តាហ៍បន្ទាប់ពីចាត់វិធានការបិទខ្ទប់និងដាក់តំបន់គាត់រស់នៅ ក្នុងតំបន់ក្រហមមក មិនទាន់ឃើញរថយន្តដឹកទំនិញចូលលក់ដល់មុខផ្ទះនៅឡើយទេ។
អ្នកស្រីថា៖ «ខ្ញុំបន់ឱ្យតែមានអ៊ីចឹងដែរហ្នឹង ព្រោះពួកខ្ញុំអត់អាចចេញទៅណាបាន ព្រោះម្នាក់ៗចេះតែខ្លាច ព្រោះអត់ដែលឃើញឡានអីបើកមកលក់ផង»។
កាលពីថ្ងៃទី១៧ ខែមេសា ឆ្នាំ២០២១ រដ្ឋាភិបាលបានចេញសេចក្តីសម្រេចថ្មីមួយទៀតឱ្យបន្តអនុវត្តវិធានការបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ជាបណ្តោះអាសន្ន រយៈពេល១៤ថ្ងៃបន្ថែមទៀត ដែលនឹងដល់ដំណាច់ខែនេះ ដោយបញ្ជាក់ថា «យោងតាមតម្រូវការចាំបាច់ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩»។
សម្រាប់រាជធានីភ្នំពេញ តំបន់ត្រូវប្រកាសជាតំបន់ក្រហមនោះ រួមមាន សង្កាត់ស្ទឹងមានជ័យ១ ស្ទឹងមានជ័យ២ ស្ទឹងមានជ័យ៣ តំបន់មួយចំនួននៃខណ្ឌមានជ័យ រួមទាំងតំបន់មួយចំនួនទៀតក្នុងខណ្ឌពោធិ៍សែនជ័យនិងខណ្ឌសែនសុខ៕