សហរដ្ឋអាមេរិកបានចេញសេចក្តីណែនាំមួយដោយដាក់ចំណាត់ថ្នាក់ប្រទេសកម្ពុជាជាប្រទេសមួយក្នុងចំណោមប្រទេសផ្សេងទៀត ដែលពលរដ្ឋរបស់ខ្លួនត្រូវពិចារណាឡើងវិញមុនសម្រេចចិត្តធ្វើដំណើរមក ដោយសារការរីករាលដាលជំងឺកូវីដ-១៩ កាន់តែខ្លាំង។
កាលពីថ្ងៃទី២០ និងទី២១ ខែមេសា ឆ្នាំ២០២១ ក្រសួងការបរទេសអាមេរិកបានដាក់ប្រទេសជិត១០០ក្នុងចំណាត់ថ្នាក់លេខ៤ ឬកម្រិត៤ ដែលជាប្រទេសពលរដ្ឋមិនត្រូវធ្វើដំណើរទៅបានឡើយ។
ដោយឡែក សម្រាប់កម្ពុជា ដែលត្រូវបានក្រសួងការបរទេសអាមេរិកដាក់ក្នុងកម្រិត៣ ដែលពលរដ្ឋរបស់ខ្លួនត្រូវពិចារណាឡើងវិញមុននឹងសម្រេចចិត្តធ្វើដំណើរមកកាន់ប្រទេសមួយនេះ ដោយសារតែស្ថានភាពជំងឺកូវីដ-១៩ កាន់តែធ្ងន់ធ្ងរ។
ជាមួយគ្នានេះ ស្ថានទូតអាមេរិកប្រចាំកម្ពុជា ក្រើនរំឭកដល់ប្រជាពលរដ្ឋអាមេរិក អំពីការបិទខ្ទប់ និងបម្រាមគោរចរ និងតំបន់ក្រហម ក្នុងរាជធានីភ្នំពេញ។
ក្រសួងការបរទេសសហរដ្ឋអាមេរិក បានបន្តថា ប្រសិនបើប្រជាពលរដ្ឋអាមេរិកចង់ធ្វើដំណើរទៅកាន់ប្រទេសកម្ពុជា គប្បីចូលអានព័ត៌មានស្ថានទូតអាមេរិកប្រចាំកម្ពុជា អំពីការវិវត្តនៃជំងឺកូវីដ-១៩ និងចូលមើលគេហទំព័ររបស់ ស៊ីឌីស៊ី ស្តីពីការធ្វើដំណើរ និងជំងឺកូវីដ-១៩។ បន្ថែមពីនេះ ត្រូវចុះឈ្មោះចូលក្នុងកម្មវិធីអ្នកធ្វើដំណើរឆ្លាត (STEP) ដើម្បីទទួលបានការដាស់តឿន និងធ្វើឱ្យមានភាពងាយស្រួលក្នុងការកំណត់ទីតាំងរបស់ប្រជាពលរដ្ឋអាមេរិកនៅពេលមានអាសន្ន និងត្រូវប្រាកដថាបានដាក់កាលបរិច្ឆេទនៅពេលបញ្ចប់ដំណើរកម្សាន្តអំឡុងពេលចុះឈ្មោះ។
ជាងនេះទៀត ត្រូវតាមដានព័ត៌មានក្រសួងការបរទេសអាមេរិកតាមហ្វេសប៊ុកនិងធ្វីតធឺ។ ពលរដ្ឋអាមេរិកដែលធ្វើដំណើរទៅបរទេស គួរតែមានផែនការអ្វីមួយសម្រាប់ស្ថានភាពអាសន្ន និងពិនិត្យបញ្ជីផ្ទៀងផ្ទាត់របស់អ្នកដំណើរ ជាដើម។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ជា អូន បានចាត់ទុកការរឹតបន្តឹងរបស់សហរដ្ឋអាមេរិកនេះ មិនមានឥទ្ធិពលអ្វីដល់កម្ពុជាឡើយ ខណៈការធ្វើដំណើរតាមផ្លូវអាកាសនៅកម្ពុជាក៏មិនសូវមានការមមាញឹកឡើយ ចាប់តាំងពីកម្ពុជាតម្រូវឱ្យភ្ញៀវអន្តរជាតិដែលចូលមកត្រូវធ្វើចត្តាឡីស័កចំនួន១៤ថ្ងៃនោះ។
លោកមានប្រសាសន៍ថា៖ «ធម្មតាទាំងយើងទាំងគេ កន្លែងហានិភ័យ គេហាមឃាត់និងរឹតបន្តឹងហើយ ដោយយើងឃើញវាផ្ទុះខ្លាំង ប្រយ័ត្នប្រយែងអញ្ចឹង វាដូចតែគ្នាទេហ្នុង»។
បើតាមអ្នកនាំពាក្យរូបនេះបានឱ្យដឹងទៀតថា មកដល់ពេលបច្ចុប្បន្ននៅមិនទាន់មានប្រទេសណាមួយផ្អាក ការហោះហើរមកកម្ពុជាឡើយ ដោយគ្រាន់តែចំនួនជើងហោះហើរធ្លាក់ចុះត្រឹម៤ទៅ៥ជើង និងនាំភ្ញៀវទេសចរចូលមក ប្រហែល១០០នាក់ប៉ុណ្ណោះក្នុងមួយថ្ងៃ។
លោកថា ក្នុងចំណោមក្រុមហ៊ុនអាកាសចរណ៍ ៤៤ មានតែក្រុមហ៊ុន ៣ ប៉ុណ្ណោះនៅបន្តសកម្មភាព រួមមាន ក្រុមហ៊ុន Lanmei airline និង JC Airlines និងក្រុមហ៊ុន Cambodia Angkor Air ប៉ុន្តែក្រុមហ៊ុនទាំងនោះភាគច្រើនប្ដូរទៅដឹកទំនិញជំនួសវិញ។
អ្នកស្រាវជ្រាវពីការអភិវឌ្ឍសង្គម លោកបណ្ឌិត សេង សារី បានឱ្យដឹងថា កត្តាជំរុញឱ្យអាមេរិករឹតបន្តឹងការធ្វើដំណើរមកកម្ពុជា ប្រហែលជាស្ថានទូតអាមេរិកប្រចាំកម្ពុជា បញ្ជូនព័ត៌មានអំពីស្ថានភាពនៃការរីករាលដាលជំងឺកូវីដ-១៩ នៅកម្ពុជា ទៅរដ្ឋាភិបាលអាមេរិក។
លោកមានប្រសាសន៍ថា៖ «ប្រហែលជាស្ថានទូតអាមេរិកប្រចាំនៅកម្ពុជាហ្នឹង មានព័ត៌មានដែលការរីករាលដាលនៃកូវីដ នៅកម្ពុជា គឺជាស្ថានភាពដែលមិនអាចគ្រប់គ្រងបាន លើសពីអីដែលរដ្ឋាភិបាលមិនអាចគ្រប់គ្រងបាន។ ដូច្នេះហើយ មានន័យថា មិនអាចកំណត់អត្តសញ្ញាណដែលឆ្លងបានហ្នឹងណា ដូច្នេះហើយបានជាអាចទិន្នន័យដែលចេញពីកម្ពុជាទៅសហរដ្ឋអាមេរិក បានសហរដ្ឋអាមេរិកសម្រេចដាក់យើងទៅក្នុងប្រទេសមួយដែលត្រូវហាមឃាត់តឹងរ៉ឹងមួយក្នុងកម្រិត ៣»។
លោក សេង សារី មិនយល់ស្របឱ្យមានការបិទជើងហោះហើរនៅកម្ពុជាឡើយ ព្រោះការបិទនេះអាចបណ្ដាលឱ្យប៉ះពាល់ដល់សេដ្ឋកិច្ចជាតិទាំងមូល ខណៈកម្ពុជាអាចគ្រប់គ្រងការឆ្លងជំងឺកូវីដ-១៩ តាមជើងហោះហើរបាន ប្រសិនបើអ្នកដំណើរចូលមកកម្ពុជាត្រូវបានធ្វើចត្តាឡីស័កត្រឹមត្រូវ។
ក្រសួងសុខាភិបាលនៅថ្ងៃសុក្រនេះ បានអះអាងពីការរកឃើញអ្នកឆ្លងកូវីដ-១៩ថ្មី ចំនួន៦៥៥នាក់បន្ថែមទៀត ហើយអ្នកស្លាប់កើនដល់៦១នាក់។ ចំនួនឆ្លងថ្មីជាង៦០០នាក់នេះធ្វើឱ្យចំនួនអ្នកឆ្លងជំងឺកូវីដ-១៩ នៅទូទាំងប្រទេសសរុបកើនដល់៨ ៨៤៨នាក់ ក្នុងនោះព្យាបាលជាសះស្បើយចំនួន៣ ១៤៨នាក់ និងកំពុងសម្រាកព្យាបាលមានចំនួន៥ ៦៣៣នាក់៕
