អភិបាលរាជធានីភ្នំពេញ បានឱ្យដឹងថា អាជ្ញាធរនឹងពិចារណាពន្យារពេលក្នុងការបិទខ្ទប់ភូមិសាស្រ្តក្រុងភ្នំពេញបន្ថែមទៀត ប្រសិនបើចំនួនអ្នកឆ្លងកូវីដ-១៩ នាពេលបច្ចុប្បន្ននៅតែមិនថយចុះនោះ។
អភិបាលរាជធានីភ្នំពេញ លោក ឃួង ស្រេង ប្រាប់ វីអូឌី នៅថ្ងៃទី២៤ ខែមេសានេះថា ប្រសិនបើស្ថានភាពជំងឺកូវីដ-១៩ នៅតែឆ្លងរីករាលដាលធ្ងន់ធ្ងរនោះ លោកថា អាជ្ញាធរនឹងពន្យារការបិទរាជធានីភំ្នពេញបន្តទៀត រហូតដល់ស្ថានភាពវិលមកធូរស្រាលឡើងវិញ។
លោក ឃួង ស្រេង បន្តថា អាជ្ញាធរអាចទប់ស្កាត់ឬក៏អាចកាត់ផ្ដាច់ការចម្លងជំងឺកូវីដ-១៩បាន លុះត្រាតែប្រជាពលរដ្ឋចូលរួមសហការជាមួយគ្នា ដោយត្រូវអនុវត្តទៅតាមវិធានការរបស់រដ្ឋាភិបាលដែលបានដាក់ចេញកន្លងមកឱ្យបានខ្ជាប់ខ្ជួន។
លោកថា៖ «យើងកំពុងពិចារណាមើល វាមិនអាស្រ័យនឹងខ្ញុំចង់បិទទេ វាអាស្រ័យមេរោគហ្នឹង តើវាឆ្លងរាលដាលទៀតអត់! បើយើងគ្រប់គ្រងបាន យើងនឹងបើកឱ្យបានលឿន។ ប៉ុន្តែបើបងប្អូនមិនសហការជាមួយអាជ្ញាធរទេ ការរាលដាលនេះវានៅតែមាន អ៊ីចឹងការពន្យារពេលបិទភ្នំពេញវានៅតែមាន»។
កាលពីថ្ងៃទី១៤ ខែមេសា រាជរដ្ឋាភិបាលបានសម្រេចបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ រយៈពេល១៤ថ្ងៃ ដោយអនុវត្តពីថ្ងៃទី១៥ ដល់ថ្ងៃទី២៨ ខែមេសា ឆ្នាំ២០២១។
បើតាមសារសំឡេងរបស់លោកនាយករដ្ឋមន្ត្រី ហ៊ុន សែន នៅមុនពេលចេញសេចក្តីសម្រេចជាផ្លូវការនោះ ឱ្យដឹងថាការបិទខ្ទប់ក្រុងភ្នំពេញ និងក្រុងតាខ្មៅ ដោយសារស្ថានភាពនៃការរីករាលដាលជំងឺកូវីដ-១៩កាន់តែធ្ងន់ធ្ងរ ហើយវិធានការនេះគឺដើម្បីកាត់ផ្តាច់ខ្សែចម្លងនិងបង្ការការឆ្លងរាលដាលជំងឺនេះឱ្យមានប្រសិទ្ធភាពផងដែរ។
ទន្ទឹមវិធានការបិទខ្ទប់នេះ រដ្ឋាភិបាលក៏បានដាក់ចេញនូវយន្តការមួយចំនួន ដើម្បីឆ្លើយតបទៅនឹងតម្រូវការប្រចាំថ្ងៃរបស់ពលរដ្ឋ ដោយធានាអះអាងពីស្ថិរភាពសន្តិសុខស្បៀង បញ្ហាទឹក ភ្លើង ជូនពលរដ្ឋទៀតផង។
យ៉ាងណា ការបិទខ្ទប់ក្រុងមិនបានប៉ុន្មានថ្ងៃផង មានពលរដ្ឋមួយចំនួន ដូចជា ក្រុមកម្មកររោងចក្រ កម្មករសំណង់ អ្នកប្រកបរបរក្រៅប្រព័ន្ធ និងប្រជាសហគមន៍តំបន់ក្រីក្រនៅរាជធានីភ្នំពេញ បានចេញមុខអំពាវនាវរកជំនួយមនុស្សធម៌ពីសប្បុរសជននិងរដ្ឋាភិបាល ដោយសារភាពខ្វះខាតនិងបញ្ហាប្រឈមផ្សេងៗរបស់ពួកគាត់អំឡុងពេលបិទខ្ទប់នោះ។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី សង្កេតឃើញថា រដ្ឋាភិបាលបានដាក់ចេញនូវវិធានការជាបន្តបន្ទាប់ ដើម្បីទប់ស្កាត់ការឆ្លងរាលដាលជំងឺកូវីដ-១៩នេះ ប៉ុន្តែរដ្ឋហាក់នៅខ្វះខាតការជួយគាំទ្រពលរដ្ឋក្នុងពេលអនុវត្តវិធានការទាំងនោះ។
លោកបន្តថា បញ្ហានេះអាចដោយសាររដ្ឋាភិបាលមិនបានគិតគូរពីគម្រោងការនានាឱ្យបានស៊ីជម្រៅជាមុន ម៉្យាងអាចដោយសារភាពខ្វះខាតរបស់រដ្ឋាភិបាលផងដែរ។
បណ្ឌិត មាស នី បន្ថែមថា មកទល់ពេលនេះ រដ្ឋាភិបាលគប្បីរៀបចំផែនការរយៈពេលវែង ដើម្បីឆ្លើយតបបញ្ហាប្រឈមរបស់ពលរដ្ឋ ប្រសិនបើការបិទខ្ទប់ក្រុងភ្នំពេញនេះនៅបន្តអូសបន្លាយបន្ថែមទៀត។
លោកមានប្រសាសន៍ថា៖ «រដ្ឋាភិបាលគួរតែមានការផ្តល់ជំនួយបែបណា ដើម្បីឱ្យពលរដ្ឋទទួលបាននូវការជួយគាំទ្រហ្នឹងស្មើៗគ្នា ដើម្បីអាចរស់បានដោយមិនមានការខ្វល់ខ្វាយពីរឿងការអត់ឃ្លានអំឡុងពេលនៃការរាំងខ្ទប់ បាទ! បើនៅស្រុកគេ គឺមិនពិបាកទេ គេចង់បិទមួយខែក៏បានដែរ ដូចជានៅអូស្ត្រាលី បើតាមខ្ញុំដឹង គេបិទមួយខែ ឬមួយខែជាងឯណោះ។ ប៉ុន្តែរដ្ឋាភិបាលគេៗបានផ្តល់លុយទៅតាមផ្ទះនីមួយៗហ្នឹង អាចល្មមម៉ារស់បាន ហើយគេអាចធ្វើដំណើរទៅកាន់ទីផ្សារទំនើបទៅទិញអីវ៉ាន់អីបាន តាមរយៈការគ្រប់គ្រងត្រឹមត្រូវមិនឱ្យមានភាពរហេតរហូតដើម្បីការពារការឆ្លង។ អ៊ីចឹងទៅ ជីវិតរស់នៅរបស់ពលរដ្ឋគេមិនសូវទទួលរងផលប៉ះពាល់ទេ»។
អ្នកស្រាវជ្រាការអភិវឌ្ឍសង្គមរូបនេះ លើកឡើងទៀតថា សម្រាប់នៅកម្ពុជាវិញ កន្លងមក ដោយសារតែរដ្ឋមិនមានលទ្ធភាព ធ្វើឱ្យការផ្តល់នូវអ្វីដែលជាមូលដ្ឋានគ្រឹះចាំបាច់សម្រាប់តម្រូវការជូនពលរដ្ឋនៅមានកម្រិត។
លោក មាស នី ផ្តល់យោបល់ថា ជាការដោះស្រាយរយៈពេលវែង ប្រសិនបើការបិទខ្ទប់ត្រូវបានអូសបន្លាយពេលយូរទៀតនោះ រដ្ឋាភិបាលត្រូវមានកាតព្វកិច្ចធ្វើយ៉ាងណាកុំឱ្យពលរដ្ឋណាម្នាក់ត្រូវទទួលរងគ្រោះដោយសារការអត់ឃ្លានក្នុងស្ថានភាពរាំងខ្ទប់ដែលបង្កឡើងពីវិបត្តិកូវីដ-១៩។
លោកថា ការគិតគូរដល់ជីវភាពរបស់ពលរដ្ឋជាចាំបាច់អំឡុងពេលបិទខ្ទប់នេះ គឺជាសិទ្ធិពិសេសមួយដែលលើកឡើងដោយអ្នកជំនាញរបស់អង្គការសហប្រជាជាតិផ្នែកសិទ្ធិមនុស្សផងដែរ៕