រដ្ឋាភិបាលណែនាំទៅគណៈអភិបាលខេត្តទាំងអស់ត្រូវយកសំណាកធ្វើតេស្តរហ័សលើអ្នកដំណើរឆ្លងកាត់ឬវិល ត្រឡប់មករស់នៅ និងស្នាក់នៅរយៈពេលវែងឬរយៈពេលខ្លី ក្នុងភូមិសាស្ត្ររបស់ខ្លួន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
ការណែនាំនេះធ្វើឡើងស្របពេលដែលរដ្ឋាភិបាលចេញសេចក្តីសម្រេចកាលពីថ្ងៃទី២៥ ខែមេសា ម្សិលមិញ ស្តីពីការពង្រឹងការអនុវត្តវិធានការ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងការពង្រឹងការអនុវត្តវិធានការនៅក្នុងភូមិសាស្ត្រដែលត្រូវបានបិទខ្ទប់នៅតាមបណ្តារាជធានី-ខេត្ត។
នៅក្នុងសេចក្តីណែនាំនោះបានបញ្ជាក់ថា គណៈអភិបាលខេត្តទាំងអស់ត្រូវអនុវត្តវិធានការធ្វើចត្តាឡីស័កចំពោះអ្នកដំណើរដែលវិលត្រឡប់មករស់នៅឬស្នាក់នៅរយៈពេលវែង នៅក្នុងភូមិសាស្ត្រស្ថិតក្នុងដែនសមត្ថកិច្ចរបស់ខ្លួន។
ដោយឡែក អ្នកដែលធ្វើដំណើរដែលមានលិខិតបញ្ជាបេសកកម្មរបស់ស្ថាប័នសាធារណៈ ឬអ្នកធ្វើដំណើរឆ្លងកាត់ ឬអ្នកដំណើរស្នាក់នៅរយៈពេលខ្លី (តិចជាង១សប្តាហ៍) រដ្ឋាភិបាលបានណែនាំទៅគណៈអភិបាលខេត្ត ត្រូវសហការជាមួយមន្ត្រីសុខាភិបាល យកសំណាកពួកគេទៅវិភាគរហ័សរកមេរោគកូវីដ-១៩។
សេចក្តីសម្រេចដដែលឱ្យដឹងទៀតថា ករណីរកឃើញអ្នកដំណើរនោះមានជំងឺកូវីដ-១៩ គណៈអភិបាលខេត្តត្រូវសហការជាមួយមន្ត្រីសុខាភិបាល អនុវត្តនីតិវិធីបន្តផ្នែកសុខាភិបាល ប៉ុន្តែបើពុំរកឃើញមានមេរោគកូវីដ-១៩ទេ គឺអ្នកដំណើរនោះ ត្រូវអនុញាតឱ្យចូលទៅនិងបំពេញការងារ ព្រមទាំងជូនដំណឹងពីកន្លែងស្នាក់នៅរបស់ខ្លួនទៅសមត្ថកិច្ចមូលដ្ឋាន ហើយត្រូវអនុវត្តតាមវិធានរបស់សុខាភិបាលឱ្យបានតឹងរ៉ឹងនិងខ្ជាប់ខ្ជួន។
បន្ថែមពីនេះ ក្នុងករណីដែលមានផ្ទុះការឆ្លងរាលដាលនៃជំងឺកូវីដ-១៩ នៅក្នុងខេត្តដែលមានព្រំប្រទល់ជាប់នឹងខេត្តដែលស្ថិតនៅក្នុងដែនសមត្ថកិច្ចរបស់ខ្លួន គណៈអភិបាលខេត្តពាក់ព័ន្ធអាចសហការគ្នា ដើម្បីដាក់ចេញនូវវិធានការរឹតត្បិតឬហាមឃាត់ការធ្វើដំណើរចេញ-ចូលឆ្លងកាត់ភូមិសាស្ត្រខេត្ត ដែលស្ថិតនៅក្នុងដែនសមត្ថកិច្ចរៀងៗខ្លួនជាបណ្តោះអាសន្ន ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ ឱ្យមានប្រសិទ្ធភាព។
ទាក់ទិននឹងបញ្ហានេះ អ្នកនាំពាក្យក្រសួងយុត្តិធម៌ លោក គឹម សន្តិភាព នៅថ្ងៃទី២៦ ខែមេសានេះ បានពន្យល់ពាក់ព័ន្ធនឹងការយកសំណាកវិភាគវហ័សនិងការធ្វើចត្តាឡីស័ក ចំពោះអ្នកធ្វើដំណើរទៅពីខេត្តមួយទៅខេត្តមួយថា ការយកសំណាកនិងធ្វើចត្តាឡីស័កនេះ នឹងធ្វើឡើងចំពោះអ្នកធ្វើដំណើរដែលវិលត្រឡប់មករស់នៅ ឬស្នាក់នៅរយៈពេលវែង ចាប់ពី១សប្តាហ៍ឡើងទៅ។
ដោយឡែក ការយកសំណាកអ្នកធ្វើដំណើរបំពេញការងារ អ្នកធ្វើដំណើរឆ្លងកាត់ ឬអ្នកធ្វើដំណើរស្នាក់នៅរយៈពេលខ្លីតិចជាង១សប្តាហ៍ លោកថា ត្រូវរាយការណ៍អំពីទីកន្លែងស្នាក់នៅជូនអាជ្ញាធរមានសមត្ថកិច្ចដែលខ្លួនបាននិងកំពុងស្នាក់នៅបណ្តោះអាសន្ននោះ។
អ្នកនាង ផែង ស្រីលក្ខណ៍ អះអាងថា គាត់បានធ្វើការងារនៅក្រុមហ៊ុនឯកជនមួយនៅក្នុងខេត្តស្វាយរៀង ប៉ុន្តែកន្លងមកគាត់ស្នាក់នៅផ្ទះឯខេត្តព្រៃវែង និងខកខានទៅធ្វើការងារមួយរយៈ ដោយសាររដ្ឋាភិបាលបិទមិនឱ្យធ្វើដំណើរឆ្លងខេត្ត។
ទោះជាយ៉ាងណា នៅថ្ងៃនេះ អ្នកនាងបង្ហាញក្តីរីករាយនៅពេលដែលទទួលបានព័ត៌មានថា រដ្ឋាភិបាលអនុញ្ញាតឱ្យអ្នកដែលមានលិខិតបំពេញបេសកកម្មកាងារ អាចចុះទៅធ្វើការងារឆ្លងខេត្តវិញបាន។
អ្នកនាងបន្ថែមថា នៅពេលចុះទៅបំពេញការងារនោះ គាត់នឹងស្នើទៅក្រុមហ៊ុនធ្វើលិខិតបំពេញបេសកកម្មការងារ ដើម្បីយកទៅបង្ហាញសមត្ថកិច្ច ដើម្បីបានទៅធ្វើការងារឡើងវិញ និងខិតខំអនុវត្តតាមវិធានការរបស់ក្រសួងសុខាភិបាល ឬតាមពាក្យស្លោកថា «៣ការពារ ៣កុំ» ជាដើម ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩។
អ្នកនាងនិយាយថា៖ «ខ្ញុំសំណូមពរឱ្យប្រជាជនទាំងអស់គ្នា គាត់ធ្វើលិខិតបេសកកម្មការងារទាំងអស់គ្នា វាមានប្រយោជន៍ យើងស្រួលធ្វើដំណើរពីខេត្តមួយទៅខេត្ត និងការពារកុំឱ្យយើងឆ្លងជំងឺកូវីដ-១៩»។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា លោកស្រីគាំទ្រនឹងវិធានការរបស់រដ្ឋាភិបាលក្នុងការធ្វើតេស្តរហ័សសម្រាប់អ្នកដំណើរឆ្លងកាត់ពីខេត្តមួយទៅខេត្តមួយនេះ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ លោកស្រីផ្តល់ជាអនុសាសន៍ថា ការធ្វើតេស្តរហ័សនោះ សមត្ថកិច្ចត្រូវធ្វើដោយគោលការណ៍សមធម៌ និងមានភាពស្មោះត្រង់ ទើបទប់ស្កាត់ការឆ្លងរាលដាលជំងឺកូវីដ-១៩ បានប្រសិទ្ធភាពខ្ពស់។
លោកស្រីផ្តល់ជាអនុសាសន៍ថា៖ «យើងកំពុងតែស្ថិតនៅក្នុងស្ថានភាពមួយដែលគ្រោះហានិភ័យសុខភាព សម្រាប់អាជ្ញាធរត្រូវប្រកាន់ខ្ជាប់នូវវិជ្ជាជីវៈនូវការអនុវត្តប្រកបដោយអហិង្សា ហើយដើម្បីបង្កបរិយាកាសអំណោយផលឱ្យគ្នាទៅវិញទៅមក»៕