សមាគមបណ្ដាញយុវជនកម្ពុជា (CYN) និងសកម្មជនបរិស្ថាន បានបង្ហាញការប្ដេជ្ញាចិត្តការពារធនធានធម្មជាតិនិងព្រៃឈើ ដើម្បីបន្តបេសកកម្មរបស់លោក ឈុត វុទ្ធី ស្ថាបនិក និងជាប្រធានអង្គការការពារធនធានធម្មជាតិ ដែលត្រូវបានបាញ់សម្លាប់កាលពីឆ្នាំ២០១២។
ការប្តេជ្ញាចិត្តនេះធ្វើឡើងក្នុងខួប៩ឆ្នាំនៃការបាញ់សម្លាប់ស្ថាបនិកនិងជាប្រធានអង្គការការពារធនធានធម្មជាតិ លោក ឈុត វុទ្ធី។
លោក ឈុត វុទ្ធី ដែលជាសកម្មជនបរិស្ថានប្រឆាំងនឹងការកាប់បំផ្លាញព្រៃឈើដ៏លេចធ្លោម្នាក់នៅកម្ពុជា ត្រូវបានគេបាញ់សម្លាប់កាលពីថ្ងៃទី២៦ ខែមេសា ឆ្នាំ២០១២ នៅពេលដែលលោកចុះស៊ើបអង្កេតករណីរំលោភយកដីនិងការកាប់ឈើខុសច្បាប់ក្នុងខេត្តកោះកុង។
ក្នុងលិខិតចំហរបស់សមាគមបណ្ដាញយុវជនកម្ពុជា ចេញផ្សាយនៅថ្ងៃទី២៦ ខែមេសា ឆ្នាំ២០២១ ឱ្យដឹងថា ការបាត់បង់ជីវិតលោក ឈុត វុទ្ធី បានបន្សល់ទុកនូវវីរភាពសម្រាប់ប្រជាពលរដ្ឋ យុវជន ដើម្បីបន្តការចូលរួមកិច្ចការពារបរិស្ថាននិងធនធានធម្មជាតិ ក្នុងនោះមាននៅតំបន់ព្រៃឡង់ ព្រៃព្រះរការ តំបន់ជួរភ្នំក្រវាញ និងព្រៃឈើដទៃទៀតនៅជុំវិញប្រទេសកម្ពុជា បើទោះបីជាត្រូវរងការគំរាមកំហែងនិងការយាយីជាប្រចាំពីក្រុមជនទុច្ចរិតក៏ដោយ។
លិខិតចំហដដែលបន្តថា ក្រៅពីរងការគំរាមកំហែងពីក្រុមជនទុច្ចរិតនោះ សកម្មជនការពារធនធានធម្មជាតិនិងបរិស្ថាន មួយចំនួនត្រូវចាប់ខ្លួន និងរងការរឹតត្បិតពីសំណាក់អាជ្ញាធរដែលមិនឱ្យពួកគេចុះល្បាតព្រៃនៅតំបន់ការពារ ប៉ុន្តែក្រុមយុវជនជំនាន់ក្រោយនៅតែបន្តខិតខំ ដើម្បីការពារធនធានធម្មជាតិនិងព្រៃឈើដែលកំពុងរងការកាប់បំផ្លាញ។
ប្រធានកម្មវិធីផ្នែកស្រាវជ្រាវ និងតស៊ូមតិរបស់សមាគមបណ្ដាញយុវជនកម្ពុជា លោក ហេង គឹមហុង បន្ថែមថា បច្ចុប្បន្ន ក្រុមយុវជននិងប្រជាពលរដ្ឋបាននិងកំពុងបន្តវេនពីលោក ឈុត វុទ្ធី ក្នុងការការពារធនធានធម្មជាតិនៅកម្ពុជា។ លោកបន្តថា ការបាត់បង់ជីវិតរបស់លោក ឈុត វុទ្ធី ដោយការពារធនធានធម្មជាតិ គឺជាគំរូសម្រាប់យុវជនជំនាន់ក្រោយ។
លោកបន្តថា៖ «យើងមិនព្រួយបារម្ភទេ [ពីសកម្មភាព]របស់ក្រុមណាមួយដែលចង់រឹតត្បិតសិទ្ធិសេរីភាពរបស់យើង មានតែយើងយកច្បាប់ជាគោលហើយ យើងធ្វើទៅតាមច្បាប់។ ចំពោះការរឹតត្បិត ការធ្វើទុក្ខបុកម្នេញ ចំពោះអ្នកស្រឡាញ់ការពារព្រៃឈើ អានោះជាការទទួលខុសត្រូវក្រុមទាំងអស់នោះ គឺពួកគាត់ក៏ត្រូវទទួលខុសត្រូវចំពោះខ្លួនឯងនិងចំពោះមុខច្បាប់។ យើងទាំងអស់គ្នាត្រូវតែបន្តស្របទៅតាមច្បាប់»។
សកម្មជនបរិស្ថានម្នាក់ដែលធ្លាប់រងការចាប់ខ្លួនកាលពីថ្ងៃទី៥ ខែមីនា ឆ្នាំ២០២១ អំឡុងពេលចុះស៊ើបអង្កេតករណីកាប់បំផ្លាញព្រៃឈើនៅតំបន់ព្រៃឡង់ លោក ហេង ស្រស់ ឱ្យដឹងថា រូបលោកនិងយុវជនដទៃទៀតមានការសោកស្ដាយចំពោះការបាត់បង់លោក ឈុត វុទ្ធី។
លោកបន្តថា ទោះបីជាលោក ឈុត វុទ្ធី បានបាត់បង់ជីវិតក្ដី ប៉ុន្តែសម្រាប់លោកជាយុវជននៅតែបន្តចូលរួមការពារធនធានធម្មជាតិ ដោយចុះស៊ើបអង្កេតបទល្មើស ដើម្បីស្វែងរកភស្តុតាងដាក់ទៅរដ្ឋាភិបាល បើទោះមានការរារាំង រងការគំរាមកំហែង និងរងការធ្វើទុក្ខបុកម្នេញក៏ដោយ។
លោកថា៖ «យើងនៅតែបន្តរុករក ស្វែងរកភស្តុតាង ដើម្បីដាក់ជូនទៅរាជរដ្ឋាភិបាលក្នុងការទប់ស្កាត់កុំឱ្យមានការកាប់បំផ្លាញព្រៃឈើនៅកម្ពុជា ដូចដែលលោកពូ ឈុត វុទ្ធី បានលើកឡើង ដូចជាគាត់បានធ្វើកន្លងមកអ៊ីចឹង គឺគាត់ព្យាយាមប្រមូលភស្តុតាងគ្រប់ក្រុមហ៊ុនទាំងអស់ គាត់ព្យាយាមប្រមូលឯកសារគ្រប់ក្រុមហ៊ុនទាំងអស់ ដើម្បីធ្វើការបិទអាជីវកម្មក្រុមហ៊ុនទាំងនោះ កុំឱ្យមានការកាប់បំផ្លាញព្រៃឈើនៅក្នុងតំបន់ព្រៃការពារបន្តទៀត»។
លោកបន្ថែមថា៖ «យើងក៏ដូចគ្នា យើងក៏ធ្វើការប្រមូលភស្តុតាង ឯកសារ ភស្តុតាងផ្សេងៗ ដើម្បីដាក់ជូនរាជរដ្ឋាភិបាល ដើម្បីបិទកុំឱ្យមានក្រុមហ៊ុនអារឈើនៅក្នុងប្រទេសកម្ពុជា»។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យក្រសួងបរិស្ថាន លោក នេត្រ ភក្ត្រា បានទេនៅថ្ងៃនេះ៕