អាជ្ញាធរបន្តផ្តល់សុពលភាពលិខិតអនុញ្ញាតធ្វើដំណើរក្នុងតំបន់បិទខ្ទប់នៃភូមិសាស្រ្តរាជធានីភ្នំពេញ រហូតដល់ថ្ងៃពុធសប្តាហ៍ក្រោយ។
សេចក្តីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី២៧ ខែមេសា ឆ្នាំ២០២១ បានលើកឡើងថា ការបន្តសុពលភាពនេះធ្វើឡើងបន្ទាប់ពីរដ្ឋាភិបាលបន្តការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ ខេត្តកណ្ដាល រយៈពេល៧ថ្ងៃបន្តទៀត រហូតដល់ថ្ងៃទី០៥ ខែឧសភា ឆ្នាំ២០២១។
ករណីនេះ រដ្ឋបាលរាជធានីភ្នំពេញ នឹងបន្តសុពលភាពលើលិខិតអនុញ្ញាតធ្វើដំណើរក្នុងតំបន់បិទខ្ទប់ រហូតដល់ថ្ងៃទី០៥ ខែឧសភា ដល់ក្រុមហ៊ុននិងម្ចាស់អាជីវកម្មទាំងឡាយដែលបានទទួលលិខិតអនុញ្ញាតធ្វើដំណើរឬធ្វើចរាចរណ៍ពីរដ្ឋបាលរាជធានីភ្នំពេញ និងរដ្ឋបាលខណ្ឌទាំង១៤។
កាលពីថ្ងៃទី១៨ ខែមេសា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្ដីណែនាំឱ្យម្ចាស់អាជីវកម្មទាំងឡាយ ត្រូវស្នើសុំទៅអង្គភាពច្រកចេញចូលតែមួយនៃរដ្ឋបាលរាជធានីភ្នំពេញ ឬនៅការិយាល័យច្រកចេញចូលតែមួយនៃរដ្ឋបាលខណ្ឌទាំង១៤ ដើម្បីចេញលិខិតបញ្ជាក់ក្នុងការធ្វើដំណើរក្នុងភូមិសាស្រ្តរាជធានីភ្នំពេញ៕
