ប្រជាកសិករមួយចំនួននៅស្រុកស្អាង ខេត្តកណ្តាល បានឈូសបន្លែសាឡាត់ចោលក្រោយគ្មានទីផ្សារសម្រាប់លក់ ស្របពេលដែលរដ្ឋាភិបាលបាននិងកំពុងបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដើម្បីទប់ស្កាត់ការឆ្លងរាលដាលជំងឺកូវីដ-១៩។
លោក តៃ សុង អះអាងថាជាកសិករជួលដីដាំបន្លែនៅឃុំព្រែកគយ និងឃុំទឹកវិល ស្រុកស្អាង ប្រាប់ វីអូឌី នៅថ្ងៃអង្គារនេះថា រូបលោកសម្រេចឈូសបន្លែសាឡាត់ដែលដាំលើដីទំហំកន្លះហិកតាចោល និងត្រៀមឈូសចោលកន្លះហិកតាទៀត ប្រសិនបើនៅតែអត់មានទីផ្សារសម្រាប់លក់។ លោកបន្តថា សាឡាត់ដែលដាំលើដីទំហំកន្លះហិកតានោះ បើសិនប្រមូលផលបានប្រហែល១០តោន។
កសិកររូបនេះឱ្យដឹងថា បន្លែសាឡាត់ទាំង២កន្លែងដែលបានឈូលចោល និងត្រៀមឈូសចោលទៀតនោះ គឺលោកបានចំណាយដើមទុនប្រហែល២០លានរៀល ដើម្បីជួលកម្មករ ទិញជី ថ្នាំ ប្រេង និងឧបករណ៍ប្រើប្រាស់ផ្សេងៗទៀត ដើម្បីដាំ។
លោកបន្ថែមថា៖ «ងាប់ហើយឆ្នាំនេះ លែងនិយាយហើយ! យើងដាំ អត់ដឹងគេបិទខ្ទប់អញ្ចឹង។ រាល់ដងកូវីដអញ្ចឹង យើងចេញ-ចូលលក់បន្លែធម្មតាបាន តែពេលគេបិទខ្ទប់អញ្ចឹងទៅ ខាតបង់ទាំងអស់គ្នា។ បន្លែសាឡាត់១ហិកតាហ្នឹងចំណាយដើមអស់២០លានរៀល ហើយអត់បានដើមមកវិញទេ ចោលទាំងអស់»។
លោក តៃ សុង បន្តថា ក្រៅពីបន្លែសាឡាត់ដែលបានខាតបង់នោះ ខ្ទឹមស្លឹកនិងដំណាំអំពៅរបស់លោកក៏គ្មានទីផ្សារសម្រាប់លក់ដែរ។
បើតាមលោក តៃ សុង បន្លែសាឡាត់ប្រហែល៧០០តោនរបស់ប្រជាកសិករនៅឃុំទឹកវិល និងឃុំព្រែកគយ ប្រឈមការឈូសឆាយចោលក្នុងរយៈពេល១សប្តាហ៍ទៀត ប្រសិនបើនៅតែពុំមានទីផ្សារសម្រាប់លក់។
ពលរដ្ឋម្នាក់ទៀត អ្នកស្រី ឆាយ អ៊ី នៅឃុំទឹកវិល និយាយថា បន្លែសាឡាត់ និងបន្លែផ្សេងៗទៀតរបស់ឪពុកអ្នកស្រី ក៏ត្រូវបានឈូសឆាយចោលដែរ ដោយសារបញ្ហាគ្មានទីផ្សារសម្រាប់លក់។ អ្នកស្រីថា ឪពុកអ្នកស្រីប្រឈមការជំពាក់បំណុលធនាគារ ដោយសារតែគាត់បានខ្ចីលុយពីធនាគារមកធ្វើដើមទុនសម្រាប់បង្កបង្កើនផល។
អ្នកស្រីបន្ថែមថា៖ «ចំណែកដំណាំប៉ាខ្ញុំ គាត់ឈូសចោល៤ដងហើយ ដោយសារអត់ទីផ្សារហ្នឹង។ មិនមែនត្រឹមតែបន្លែសាឡាត់ទេ បន្លែផ្សេងៗទៀតដែលយើងធ្វើបានហើយលក់មិនត្រូវថ្លៃហ្នឹង ក៏បានឈូសចោលដែរ។ និយាយទៅវេទនាណាស់ ការផ្ទុះកូវីដហ្នឹង ធ្វើបានហើយ លក់ថោក អត់លុយ ជំពាក់គេទៀត»។
វីអូឌី មិនអាចសុំការឆ្លើយតបពីប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល លោក ប៊ុន ទួនស៊ីម៉ូណា បានទេ ពាក់ព័ន្ធករណីនេះ។
តែយ៉ាងណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍កាលពីថ្ងៃទី២២ ខែមេសានេះថា ក្រសួងកំពុងរិះរកមធ្យោបាយ និងកំពុងសហការជាមួយក្រសួងពាណិជ្ជកម្ម ដើម្បីនាំបន្លែពីកសិករនៅតាមបណ្តាខេត្តនានាជិតរាជធានីភ្នំពេញ យកទៅចែកចាយនៅតាមតំបន់បិទខ្ទប់ក្នុងភូមិសាស្ត្ររាជធានីភ្នំពេញ ខណៈបន្លែនៅតំបន់នោះបានឡើងថ្លៃខ្ពស់។
លោកបន្ថែមថា៖ «ខ្ញុំបានចាត់ឱ្យមន្ត្រីរបស់ខ្ញុំធ្វើការសម្របសម្រួលជាមួយក្រសួងពាណិជ្ជកម្ម ដើម្បីសម្របសម្រួលនិងដឹកជញ្ជូនបន្លែមកផ្គត់ផ្គង់នៅរាជធានីភ្នំពេញ ដោយយើងបានសហការជាមួយបណ្តុំកសិករ និងសហគមន៍កសិកម្មនៅតាមបណ្តាខេត្តនៅជុំវិញរាជធានីភ្នំពេញ ដើម្បីយកមកផ្គត់ផ្គង់»។
ពាក់ព័ន្ធករណីនេះ ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បានជំរុញទៅរដ្ឋាភិបាលឱ្យមានវិធានការរៀបចំការដើរប្រមូលទិញបន្លែពីប្រជាកសិករដែលកំពុងគ្មានទីផ្សារ យកទៅលក់នៅតំបន់បិទខ្ទប់ ឬត្រូវសម្របសម្រួលឱ្យកសិករអាចលក់ផលដំណាំរបស់ពួកគេនៅតំបន់នោះផងដែរ។
លោក ថេង សាវឿន លើកឡើងថា កាលណាផលិតផលកសិកម្មរបស់កសិករគ្មានទីផ្សារ លក់មិនដាច់ ឬលក់មិនចេញ នឹងធ្វើឱ្យពួកគេជួបបញ្ហាប្រឈមជាច្រើនដូចជា បញ្ហាជីវភាព និង បំណុល ជាដើម។
កាលពីថ្ងៃទី១៤ ខែមេសា ឆ្នាំ២០២១នេះ រដ្ឋាភិបាលបានចេញបទបញ្ជាបិទខ្ទប់ភូមិសាស្ត្រនៅរាជធានីភ្នំពេញ និងក្រុងតាខ្មៅ ខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ ស្របពេលការបិទខ្ទប់នេះ ផ្សារមួយចំនួន ក្នុងរាជធានីភ្នំពេញ និងក្រុងតាខ្មៅ ក៏បានបិទជាបន្តបន្ទាប់ផងដែរ៕
