សមាគមមីក្រូហិរញ្ញវត្ថុកម្ពុជា អំពាវនាវដល់ប្រជាពលរដ្ឋឱ្យប្រុងប្រយ័ត្នករណីមានជនខិលខូចមួយចំនួនបានទូរសព្ទទៅអតិថិជនរបស់គ្រឹះស្ថានហិរញ្ញវត្ថុ ដោយតម្រូវបង់ប្រាក់តាមប្រពន្ធផ្ទេរប្រាក់នានា ដើម្បីទទួលបានការបញ្ចុះអត្រាការប្រាក់ ការផ្អាកបង់សងមួយរយៈពេល ការរៀបចំឥណទានឡើងវិញ ឬការផ្តល់ជូនផ្សេងៗទៀត ជាដើម។
សេចក្ដីជូនដំណឹងរបស់សមាគមមីក្រូហិរញ្ញវត្ថុកម្ពុជា ចេញផ្សាយកាលពីថ្ងៃម្សិលមិញ បានលើកឡើងថា ដើម្បីចៀសវាងការចាញ់បោកជនខិលខូចទាំងនេះ សមាគមលើកទឹកចិត្តដល់អតិថិជននិងសាធារណជនធ្វើការបង់ប្រាក់តាមលេខទូរសព្ទរបស់មន្រ្តីឥណទានដែលមានភ្ជាប់ក្នុងតារាងបង់ប្រាក់ ឬតាមរយៈការិយាល័យគ្រឹះស្ថានដែលនៅជិតខ្លួនវិញ។
សមាគមនេះបន្តថា អតិថិជនរបស់គ្រឹះស្ថានហិរញ្ញវត្ថុ ក៏អាចទូទាត់សងប្រាក់កម្ចីតាមរយៈប្រព័ន្ធធនាគារចល័ត (Mobile Banking) ឬតាមរយៈម៉ាស៊ីនដាក់ប្រាក់ដោយស្វ័យប្រវត្តិរបស់គ្រឹះស្ថានហិរញ្ញវត្ថុ ដើម្បីធានាបាននូវសុវត្ថិភាពខ្ពស់ផងដែរ៕