រដ្ឋាភិបាលណែនាំមន្ត្រីកុំឱ្យមានការរើសអើងពលរដ្ឋ ឬជនបរទេស រួមទាំងអនិកជនវៀតណាម ក្នុងយុទ្ធនាការចុះចាក់វ៉ាក់សាំងនៅតំបន់ក្រហម រាជធានីភ្នំពេញ ដែលគ្រោងធ្វើនៅប៉ុន្មានថ្ងៃខាងមុខទៀតនេះ ដោយថា ដើម្បីបង្ការទប់ស្កាត់រលកចម្លងនៃជំងឺកូវីដ-១៩ ក្នុងសហគមន៍ ពាក់ព័ន្ធទៅនឹងព្រឹត្តិការណ៍សហគមន៍២០កុម្ភៈ។
ព្រឹត្តិការណ៍សហគមន៍២០កុម្ភៈ ផ្ទុះឡើងជាង២ខែមកនេះ បានសម្លាប់មនុស្សអស់ជាង៨០នាក់ ឆ្លងទៅដល់មនុស្សជាង១ម៉ឺននាក់ ក្នុងនោះ ជាង៧ពាន់នាក់កំពុងសម្រាកព្យាបាលនៅឡើយ។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារសំឡេងកាលពីយប់ថ្ងៃម្សិលមិញថា យុទ្ធនាការចាក់វ៉ាក់សាំងថ្នាក់ជាតិ នឹងត្រូវផ្តើមចេញពីតំបន់ក្រហមនៃខណ្ឌទាំង៤ នៅរាជធានីភ្នំពេញ។
លោកថា យុទ្ធនាការនេះត្រូវប្រើកម្លាំងជាតិសរុប រួមទាំងកម្លាំងទ័ពចូលរួមសហការជាមួយគណៈកម្មការចំពោះកិច្ចចាក់វ៉ាក់សាំងក្នុងក្រមខណ្ឌទូទាំងប្រទេសផងដែរ។
លោកបានណែនាំថា យុទ្ធនាការនេះ ក្រុមការងារចាក់វ៉ាក់សាំង ត្រូវចល័តទៅក្នុងតំបន់ក្រហមនោះតែម្តងក្នុងការផ្តល់សេវានេះ ដែលជាការសំដៅកុំឱ្យពលរដ្ឋរស់នៅតំបន់ក្រហម ឬតំបន់ឆ្លងរាលដាលខ្លាំង ធ្វើដំណើរចេញមកក្រៅដើម្បីស្វែងរកសេវាចាក់វ៉ាក់សាំង។
លោកបានគូសបញ្ជាក់ថា អ្នករស់នៅតំបន់ក្រហម ពួកគេអាចនឹងទទួលបានវ៉ាក់សាំង ដូសទី១ ត្រឹមមុនថ្ងៃទី៥ ខែឧសភា ឆ្នាំ២០២១នេះ បើសិនគណៈកម្មការចំពោះកិច្ចចាក់វ៉ាក់សាំង រៀបចំទាន់។
លោកថា៖ «និយាយរួម មនុស្សចាប់ពីអាយុ១៨ឡើងទៅ ចាក់ឱ្យហ្មង! រួមទាំងជនបរទេស ឬក៏អនិកជនវៀតណាមអីដែលនៅកម្ពុជា គឺចាក់ឱ្យគាត់ទាំងអស់។ បើមិនអ៊ីចឹងទេ វាមិនបង្កើតភាពស៊ាំនៅក្នុងទីក្រុងភ្នំពេញទេ»។
រដ្ឋបាលរាជធានីភ្នំពេញ កាលពីថ្ងៃម្សិលមិញ បានចេញសេចក្តីសម្រេចមួយដាក់តំបន់មួយចំនួនក្នុងខណ្ឌមានជ័យ ខណ្ឌទួលគោក ខណ្ឌឫស្សីកែវ និងខណ្ឌពោធិ៍សែនជ័យ ជាតំបន់ក្រហម ឬជាតំបន់ឆ្លងរាលដាលធ្ងន់ធ្ងរនៃជំងឺកូវីដ-១៩ ក្នុងសហគមន៍ ពាក់ព័ន្ធព្រឹត្តិការណ៍សហគមន៍២០កុម្ភៈ។
ប្រធានគណៈកម្មការចំពោះកិច្ចសម្រាប់ការចាក់វ៉ាក់សាំងការពារជំងឺកូវីដ-១៩ លោកស្រីវេជ្ជបណ្ឌិត ឱ វណ្ណឌីន មានប្រសាសន៍ថា នេះជាអនុសាសន៍មួយជំរុញដល់ការធានាសុខភាពសាធារណៈ ព្រោះតំបន់ក្រហមជាតំបន់ដែលមានការរាតត្បាតខ្លាំង។
លោកស្រីថា៖ «ដើម្បីជួយពួកគាត់ យើងត្រូវមានវិធានការមួយក្នុងចំណោមវិធានការផ្សេងៗទៀតហ្នឹង គឺជួយធ្វើយ៉ាងម៉េចឱ្យពួកគាត់មានវ៉ាក់សាំង។ អ៊ីចឹងបានសម្តេចលោកបានសម្រេចចិត្តដ៏ត្រឹមត្រូវ ធ្វើការចាក់វ៉ាក់សាំងហ្នឹងជូនពួកគាត់ ហើយយុទ្ធនាការនេះ ដើម្បីធ្វើឱ្យបានលឿន យើងត្រូវកៀរគរកម្លាំងសរុប គ្មាននរណាម្នាក់ពីរនាក់អាចទៅធ្វើបានទេ។ អ៊ីចឹងវាត្រូវកៀរគរកម្លាំង ដើម្បីធ្វើឱ្យការធ្វើៗឱ្យបានលឿន»។
លោកស្រីគូសបញ្ជាក់ថា ការផ្តល់វ៉ាក់សាំងនឹងកាត់បន្ថយភាពធ្ងន់ធ្ងន់នៃការវាយលុកពីមេរោគកូវីដ-១៩ កាត់បន្ថយបន្ទុកដល់វិស័យសុខាភិបាល ជាពិសេសកាត់បន្ថយអត្រាអ្នកស្លាប់។
ប្រធានសមាគមខ្មែរ-រៀតណាមនៅកម្ពុជា លោក ស៊ឹម ជី បានស្វាគមន៍ការក្រើនរំឭករបស់រដ្ឋាភិបាលកម្ពុជានេះ។
លោកថា៖ «សុំអរគុណដល់សម្តេច និងរាជរដ្ឋាភិបាល ដែលបានចាក់ជូនប្រជាជនវៀតណាមដែលបានរស់នៅស្របច្បាប់នៅកម្ពុជា។ ខ្ញុំសុំអធ្យាស្រ័យផងដែរ ដោយខ្ញុំជាប់កម្មវិធី»។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និយាយថា ការផ្តល់វ៉ាក់សាំងនឹងឈានទៅការទប់ស្កាត់រលកចម្លងក្នុងសហគមន៍ បើដំណើរការនេះប្រព្រឹត្តទៅដោយរក្សាបាននូវគម្លាតសុវត្ថិភាពសង្គម។
លោកបន្តថា៖ «អាជ្ញាធររដ្ឋដូចមិនដែលរើសអើងជាមួយបរទេសទេ មានតែរើសអើងជាមួយខ្មែរគ្នាឯង [មូលហេតុអី?] ដោយសារនិន្នាការនយោបាយ អ្នកប្រឆាំង អ្នកតវ៉ារឿងសង្គមច្រើនអីទៅ ត្រូវបានគេរើសអើង។ ខ្ញុំទទួលបានរបាយការណ៍ពីប៉ោយប៉ែតមួយ អ្នកខ្លះបានចាក់ អ្នកខ្លះគេរើសអើង អត់ឱ្យចាក់ទេ! អ្នកដែលអត់មានបញ្ជីលំនៅឋានច្បាស់ គេអត់ចាក់ឱ្យទេ អាហ្នឹងហើយជាការរើសអើង»។
លោក វន់ ពៅ បានអំពាវនាវទៅអាជ្ញាធរពាក់ព័ន្ធ ត្រូវអនុវត្តតាមអនុសាសន៍របស់នាយករដ្ឋមន្ត្រីនេះ ដើម្បីឱ្យដំណើរការចាក់វ៉ាក់សាំងក្លាយជាយន្តការធានាសុខភាពសាធារណៈ អំឡុងពេលដែលជំងឺនេះកំពុងបន្តរីករាលដាលក្នុងសហគមន៍នៅឡើយ។
លោកនាយករដ្ឋមន្ត្រី ហ៊ុន សែន គូសបញ្ជាក់ដែរថា តាមការប៉ាន់ស្មាន តំបន់បិទខ្ទប់នៅរាជធានីភ្នំពេញ និងខេត្តមួយចំនួន អ្នកដែលត្រូវផ្តល់វ៉ាក់សាំងមានប្រមាណជា៣លាននាក់ ត្រូវប្រើវ៉ាក់សាំង៦លានដូស ខណៈវ៉ាក់សាំងដែលនៅក្នុងដៃមានជាង១លានដូស និងវ៉ាក់សាំងជំនួយរបស់ចិនប្រភេទស៊ីណូហ្វាម មកដល់ថ្ងៃនេះ មានចំនួន៤០ម៉ឺនដូសទៀត៕