អាជ្ញាធរខេត្តកោះកុង បានដាក់ឱសានវាទនិងព្រមានចាត់វិធានការច្បាប់ចំពោះអ្នកដែលបានចាក់ដីរំលោភចូល«ព្រែកតាតៃ»ដោយខុសច្បាប់ ស្ថិតក្នុងភូមិអន្លង់វ៉ាក់ ឃុំតាតៃ ស្រុកកោះកុង។
ការព្រមាននេះបានធ្វើឡើងក្រោយរដ្ឋបាលស្រុកកោះកុង បានចុះទៅពិនិត្យមើលជាក់ស្តែងនៅទីតាំងដែលមានការចាក់ដីចូលព្រែកតាតៃដែលជាដីរបស់រដ្ឋ ក្រោយពីមានការផ្សព្វផ្សាយព័ត៌មាននៅលើបណ្តាញសង្គម។
អភិបាលរងស្រុកកោះកុង លោក នួន ភារម្យ ប្រាប់ វីអូឌី នៅថ្ងៃពុធនេះថា អ្នកដែលចាក់ដីរំលោភចូលព្រែកនោះមាន៣ម្ចាស់ ក្នុងនោះក៏មានមន្ត្រីរាជការផងដែរ។ លោកថា ពួកគេបាននាំគ្នាចាក់ដីរំលោភចូលព្រែកមានទំហំប្រហែលជាង២០ម៉ែត្រ ហើយថា សកម្មភាពចាក់ដីនោះធ្វើឡើងដោយគ្មានច្បាប់អនុញ្ញាតឡើយ។
លោកបន្ថែមថា ក្រោយរកឃើញមានកំហុស រដ្ឋបាលស្រុកកោះកុងបានហៅអ្នកទាំងនោះមកធ្វើកិច្ចសន្យាបញ្ឈប់សកម្មភាព និងដាក់ឱសានវាទរយៈពេល៣០ថ្ងៃ ឱ្យពួកគេកាយអាចម៍ដីចេញវិញឱ្យអស់ ហើយត្រូវដាំដើមឈើមួយចំនួនឡើងវិញផងដែរ។
លោកបញ្ជាក់ថា៖ «ចំពោះបញ្ហានេះ ប្រសិនជាបងប្អូននៅតែមិនអនុវត្តទៅតាមការណែនាំរបស់ក្រុមការងារនេះទេ គឺយើងនឹងដាក់វិធានការឱ្យឃុំកសាងសំណុំរឿងបញ្ជូនទៅតុលាការ។ ការងារនេះគឺយើងឱ្យស្តារឡើងវិញ នូវអ្វីដែលពួកគាត់បានឈូសឆាយរបស់ធម្មជាតិនេះ។ ការរំលោភ២០ម៉ែត្រ គឺយើងឱ្យពួកគាត់ស្តារឡើងវិញ ហើយមិនឱ្យសាងសង់សំណង់រឹងអ្វីលើហ្នឹងទេ»។
ពាក់ព័ន្ធការចាក់ដីចូលព្រែកនេះ មេឃុំតាតៃ លោក ធិន សម្បត្តិ មានប្រសាសន៍ថា អ្នកល្មើសមិនបានជូនដំណឹងដល់អាជ្ញាធរឃុំនោះទេ ហើយលោកក៏មិនបានដឹងមុនដែរ។ លោកថា ក្រោយអាជ្ញាធរចុះណែនាំរួច អ្នកចាក់ដីចូលព្រែកទាំងនោះបានសន្យាកាយដីទាំងនោះចេញវិញ។
លោកបន្ថែមថា៖ «ពួកគាត់មិនបានជូនដំណឹងឬធ្វើលិខិតស្នើសុំធ្វើទេ ឥលូវយើងឱ្យគាត់កាយចេញវិញ ហើយសន្យាកាយអាចម៍ដីហើយ ហើយនឹងតាមដានការអនុវត្តរបស់គាត់ទៀត»។
វីអូឌី មិនអាចរកការឆ្លើយតបពីអ្នកដែលរងការចោទថាចាក់ដីរំលោភចូលព្រែកទាំងនោះបានទេនៅថ្ងៃពុធនេះ ខណៈអាជ្ញាធរស្រុកនិងអាជ្ញាធរឃុំមិនបានបញ្ចេញអត្តសញ្ញាណអ្នកដែលចាក់ដីរំលោភចូលដីរដ្ឋនៅព្រែកតាតៃនេះទេ។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា នៅក្នុងខេត្តកោះកុង មានករណីជនខិលខូចលួចចាក់ដីរំលោភចូលព្រែក ចូលសមុទ្រ និងទន្ទ្រានយកដីព្រៃរបស់រដ្ឋជាច្រើនកន្លែង ដូចជា នៅតំបន់ក្រុងខេមរភូមិន្ទ នៅស្រុកគិរីសាគរ និងស្រុកបទុមសាគរ ជាដើម។ លោកកត់សម្គាល់ថា អ្នកល្មើសភាគច្រើនជាអ្នកមានលុយមានអំណាច។
មន្ត្រីសិទ្ធិមនុស្សរូបនេះបន្តថា ពាក់ព័ន្ធការចាក់ដីរំលោភចូលព្រែក ចូលសមុទ្រ និងទន្ទ្រានដីព្រៃរបស់រដ្ឋនេះ កន្លងមក អាជ្ញាធរខេត្តចាត់វិធានការច្បាប់តឹងរ៉ឹងចំពោះតែពលរដ្ឋក្រីក្រទេ ខណៈអ្នកមានលុយមានអំណាច បានត្រឹមតែព្រមាននិងឱ្យកាយអាចម៍ដីចេញវិញតែប៉ុណ្ណោះ។
លោកបន្ថែមថា៖ «ដើម្បីរក្សាព្រៃ ព្រែក និងឆ្នេរសមុទ្រ បានគង់វង្ស អាជ្ញាធរខេត្តត្រូវតែមានចំណាត់ការឱ្យបានម៉ឺងម៉ាត់ និងម៉ត់ចត់បំផុតចំពោះអ្នកបំផ្លាញ ដោយមិនគិតថាជាអ្នកមានលុយមានអំណាច ឬជាបក្សពួករបស់ខ្លួននោះទេ។ អ៊ីចឹងកាលណាយើងមានចំណាត់ការច្បាប់ទៅលើបុគ្គលណាមួយដែលជាអ្នកមានលុយមានអំណាច អ៊ីចឹងបុគ្គលក្រោយៗទៀតដែលមានបំណងចង់ធ្វើទង្វើបែបហ្នឹងដែរ នឹងមិនហ៊ានឬក៏រអាក្នុងការធ្វើណាស់ អ៊ីចឹងវាអាចការពារធនធានធម្មជាតិទាំងអស់នោះបាន»។
កាលពីថ្ងៃទី១ ខែមេសា ឆ្នាំ២០២១ អង្គការសង្គមស៊ីវិលនិងពលរដ្ឋបានរិះគន់អាជ្ញាធរខេត្តកោះកុង ដែលថា មិនបានចាត់វិធានការតឹងរ៉ឹងចំពោះបុគ្គលដែលបានចាក់ដីរំលោភចូលដីចំណីព្រែកនិងព្រៃកោងកាង ស្ថិតក្នុងចំណុចភូមិទួលគគីរក្រោម ឃុំទួលគគីរ ស្រុកមណ្ឌលសីមា៕