មន្ត្រីជាន់ខ្ពស់ក្រសួងការងារ ឱ្យដឹងថា កម្មករនិយោជិតជិត១ ៧០០នាក់ ធ្វើការនៅរោងចក្រជាង២០០នៅតាមបណ្ដារាជធានី-ខេត្តមួយចំនួនបានឆ្លងជំងឺកូវីដ-១៩ ចាប់តាំងមានការផ្ទុះឡើងនូវការរីករាលដាលជំងឺនេះក្នុងព្រឹត្តិការណ៍សហគមន៍២០កុម្ភៈ។
ថ្លែងក្នុងសន្និសីទសារព័ត៌មាននៅព្រឹកថ្ងៃទី២៨ ខែមេសានេះ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ថា កម្មករនិយោជិតសរុបចំនួន១ ៦៦៣នាក់ មានវិជ្ជមានជំងឺកូវីដ-១៩ ក្នុងនោះកម្មករនិយោជិតចំនួន១ ៥៩៨នាក់ធ្វើការនៅតាមរោងច្រកមួយចំនួនក្នុងរាជធានីភ្នំពេញ ខណៈកម្មករជាង១១ម៉ឺននាក់បានចាក់វ៉ាក់សាំងលើកទី១ និងជាង១ម៉ឺននាក់បានចាក់លើកទី២រួចហើយដែរ។
លោកបន្តថា គិតមកដល់ពេលនេះមានរោងចក្រចំនួន២០៦ដែលមានកម្មករនិយោជិតឆ្លងជំងឺកូវីដ-១៩ ក្នុងនោះ ១៣៤រោងចក្រនៅរាជធានីភ្នំពេញ និង ២៣រោងចក្រនៅខេត្តកណ្ដាល។ ចំណែក ២៦រោងចក្រនៅខេត្តតាកែវ និង ១៦រោងចក្រនៅខេត្តព្រះសីហនុ ៤រោងចក្រនៅខេត្តស្វាយរៀង ១រោងចក្រនៅកំពង់ឆ្នាំង និង១រោងចក្រទៀតនៅខេត្តកំពង់ចាម។
លោកបន្ថែមថា អំឡុងពេលនៃការបិទខ្ទប់នេះ ក្រុមហ៊ុន រោងចក្រ និងសហគ្រាសទាំងអស់ ត្រូវពិចារណាក្នុងការផ្ដល់ប្រាក់ឧបត្ថម្ភបន្ថែមជូនដល់កម្មករនិយោជិត ក៏ដូចជាបុគ្គលិករបស់ខ្លួន។
លោកមានប្រសាសន៍ថា៖ «ពេលនេះជាពេលលំបាកទាំងអស់គ្នា ហើយជារួមគឺយើងមានស្មារតីមនុស្សធម៌ យើងមានស្មារតីសាមគ្គីភាព ក៏មានទំនួលខុសត្រូវសង្គម ក្នុងនាមជាក្រុមហ៊ុន រោងចក្រ សហគ្រាស។ ហើយកម្មករនិយោជិតនិងបុគ្គលិកទាំងអស់ក៏ជាផ្នែកមួយដែលបានជួយឱ្យរោងចក្រ សហគ្រាស និងក្រុមហ៊ុន ឱ្យដំណើរការនិងរស់រានមានមកដល់បច្ចុប្បន្ននេះ។ នៅក្នុងអំឡុងពេលការបិទខ្ទប់ចាប់ពីថ្ងៃទី១៥ ខែមេសា រហូតដល់៣០ ខែមេសា ឬស្ថិតក្នុងការពន្យារដំណាក់កាលណាមួយនោះ គឺក្រុមហ៊ុន រោងចក្រ សហគ្រាសទាំងអស់ គឺត្រូវពិចារណា ដើម្បីផ្ដល់ប្រាក់ឧបត្ថម្ភបន្ថែមជូនដល់បងប្អូនកម្មករនិយោជិត ក៏ដូចជាបុគ្គលិករបស់ខ្លួន»។
ប្រធានសហភាពការងារកម្ពុជា លោន អាត់ ធន់ ជំរុញឱ្យរដ្ឋាភិបាលត្រូវអនុវត្តឱ្យបានហ្មត់ចត់នូវវិធានការរបស់ក្រសួងសុខាភិបាល ដើម្បីធានាកុំឱ្យមានការឆ្លងរាលដាលជំងឺកូវីដ-១៩ ទៅកាន់កម្មករនិយោជិត។ លោកអះអាងថា ការឆ្លងជំងឺកូវីដ-១៩ ទៅលើកម្មករនេះបានគំរាមកំហែងទាំងអាយុជីវិត និងប៉ះពាល់ដល់ជីវភាពរបស់ពួកគេទៀតផង។
លោកមានប្រសាសន៍ថា៖ «នេះគឺជាការព្រួយបារម្ភយ៉ាងខ្លាំង ខ្ញុំគិតថា វាអាចនឹងប៉ះពាល់ខ្លាំងដល់ជីវភាពប្រចាំថ្ងៃ និងគំរាមកំហែងដល់ជីវិតរបស់កម្មករដែរ»៕