ក្រុមសាច់ញាតិសពអ្នកស្លាប់ដោយជំងឺកូវីដ-១៩ ស្នើទៅអាជ្ញាធរនិងគ្រូពេទ្យដែលយកសពអ្នកកើតកូវីដ-១៩ទៅបូជារួចហើយ ឱ្យផ្ដល់អដ្ឋិធាតុដល់ក្រុមគ្រួសារពួកគេវិញ ដើម្បីឱ្យពួកគាត់យកមកទុកធ្វើបុណ្យតាមប្រពៃណីសាសនា បន្ទាប់ពីការរីករាលដាលជំងឺកូវីដ-១៩ បានធូរស្រាល។
អ្នកស្រី ទេព សុភាព ដែលអះអាងថា ម្ដាយរបស់គាត់ស្លាប់ដោយសារជំងឺកូវីដ-១៩ កាលពីថ្ងៃទី២២ ខែមេសា ឆ្នាំ២០២១ ប្រាប់ វីអូឌី នៅថ្ងៃនេះថា អាជ្ញាធរនិងក្រុមគ្រូពេទ្យដែលយកសពម្ដាយគាត់ទៅបូជាកាលពីថ្ងៃទី២៣ ខែមេសា ឆ្នាំ២០២១នោះ នៅមិនទាន់ផ្ដល់អដ្ឋិធាតុដល់ក្រុមគ្រួសារគាត់នៅឡើយ។
អ្នកស្រីបន្តថា គ្រួសាររបស់គាត់បានទាក់ទងទៅក្រុមគ្រូពេទ្យដែលមកយកសពម្ដាយរបស់គាត់ទៅបូជា ប៉ុន្តែមកដល់ពេលនេះនៅមិនទាន់មានការឆ្លើយតបនៅឡើយ។
លោកស្រីថា៖ «ខ្ញុំចង់បានតែអដ្ឋិធាតុម៉ែខ្ញុំមកវិញទេ បើថារួច[ចប់]កូវីដ ខ្ញុំមានលុយ ខ្ញុំធ្វើបុណ្យសង្ឃទានតិចតួចជាមួយបងប្អូនខ្ញុំនៅផ្ទះហ្នឹង អត់មានធ្វើអីធំដុំទេ។ និយាយទៅ ការពិបាកចិត្តចេះតែមានហើយ ចេះតែបារម្ភរហូត ខ្លាចគេមិនយកអដ្ឋិធាតុមកឱ្យវិញអ៊ីចឹង អត់មានអីធ្វើបុណ្យឱ្យគាត់អ៊ីចឹង»។
អ្នកស្រី ធឿន សុធារត្ន័ ដែលបញ្ជាក់ថាមានឪពុកស្លាប់ដោយសារជំងឺកូវីដ-១៩ដែរនោះ បានលើកឡើងថា អ្នកស្រីចង់ឱ្យក្រុមគ្រូពេទ្យរក្សាអដ្ឋិធាតុសពដែលបានបូជារួច ដើម្បីទុកឱ្យក្រុមគ្រួសារទៅយក បន្ទាប់ពីបញ្ចប់ការធ្វើចត្តាឡីស័កឬការព្យាបាលជំងឺកូវីដ-១៩។
ក្រៅពីរក្សាអដ្ឋិធាតុ អ្នកស្រីស្នើដល់ក្រុមគ្រូពេទ្យនិងស្ថាប័នពាក់ព័ន្ធដែលយកសពអ្នកជំងឺកូវីដ-១៩ទៅបូជា ធ្វើការប្រកាសព័ត៌មានដើម្បីឱ្យក្រុមគ្រួសារបានដឹង ងាយស្រួលទៅយកធាតុមករក្សាទុកផងដែរ។
អ្នកស្រីថា៖ «ខ្ញុំគិតថាធ្វើអ៊ីចឹងល្អ ព្រោះឱ្យក្រុមគ្រួសារគាត់មានទំនុកចិត្តនិងកម្លាំងចិត្តបន្តិចដែរ»។
អនុប្រធានមន្ទីរពេទ្យមិត្តភាពខ្មែរ-សូវៀត លោកវេជ្ជបណ្ឌិត ម៉ុក ធាវី មានប្រសាសន៍ថា អដ្ឋិធាតុសពអ្នកកើតកូវីដ-១៩ទាំងអស់ ខាងក្រុមគ្រូពេទ្យដែលយកសពទៅបូជានោះបានរក្សាទុកឱ្យគ្រួសារសព ប៉ុន្តែការមិនបានជូនដំណឹងទៅគ្រួសារ ដោយសារគ្រូពេទ្យជាប់រវល់។
លោកថា៖ «គាត់សម្រាកនៅមន្ទីរពេទ្យណា ឱ្យគាត់ទំនាក់ទំនងនៅមន្ទីរពេទ្យហ្នឹង ដឹងព័ត៌មានហើយ! បើគាត់ស្លាប់នៅណា គាត់ទំនាក់ទំនងនៅខាងមន្ទីរពេទ្យហ្នឹង។ គាត់ទៅផ្ទាល់តែម្ដង ដល់មន្ទីរពេទ្យហើយទំនាក់ទំនងអ្នកគ្រប់គ្រងនៅហ្នឹង ឱ្យគាត់ជម្រាបជូនបាន»។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី បានលើកឡើងលើគណនីហ្វេសប៊ុកផ្ទាល់ខ្លួនកាលពីម្សិលមិញថា អ្នកឆ្លងជំងឺកូវីដ-១៩ មិនមែនជាអ្នកមានកំហុសឬជាមនុស្សដែលត្រូវបានគេដាក់ទណ្ឌកម្មនោះឡើយ។ លោកបន្តថា ក្រៅពីការជួយព្យាបាលនិងឧបត្ថម្ភពួកគាត់នៅពេលមានជីវិត មន្ត្រីសុខាភិបាលឬអាជ្ញាធរពាក់ព័ន្ធក៏ត្រូវមានការរៀបចំទុកដាក់បូជាសពឱ្យបានសមរម្យទៅតាមប្រពៃណីផងដែរ នៅក្នុងករណីដែលគាត់ស្លាប់បាត់បង់ជីវិត។
លោកសរសេរថា៖ «ពួកគាត់ស្លាប់មិនមានបងប្អូនអាចនៅក្បែរបានទេ! ដូច្នោះ អ្នកពាក់ព័ន្ធក្នុងការរៀបចំបូជាសព មេត្តាផ្តល់នូវតម្លៃជាប្រពៃណីជូនពួកគាត់ផង ចៀសវាងការគ្រាន់តែយកសពចេញពីមន្ទីរពេទ្យ រួចដឹកទៅដុតចោលដូចគល់ឈើ! ដូចករណីខ្លះ»។
ចាប់តាំងពីផ្ទុះព្រឹត្តិការណ៍សហគមន៍២០កុម្ភៈ មកដល់ព្រឹកថ្ងៃទី២៧ ខែមេសា ឆ្នាំ២០២១ អ្នកស្លាប់ដោយសារ ជំងឺកូវីដ-១៩ មានចំនួន៨២នាក់ និងអ្នកឆ្លងជំងឺជំងឺនេះមានចំនួនជាង១០ ០០០នាក់៕
