សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ អំពាវនាវដល់សប្បុរសជនជួយឧបត្ថម្ភជាស្បៀងឬថវិកាដល់បុគ្គលិកមួយចំនួនរបស់ក្រុមហ៊ុនដែលកំពុងប្រឈមនឹងកង្វះខាតក្នុងជីវភាពរស់នៅ ក្នុងអំឡុងមានវិបត្តិកូវីដ-១៩។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ កញ្ញា ឈឹម ស៊ីថរ បានឱ្យដឹងនៅថ្ងៃនេះថា រយៈពេលជាងមួយឆ្នាំហើយដែលបុគ្គលិកក្រុមហ៊ុននេះជួបបញ្ហាប្រឈមក្នុងជីវភាពនិងខ្វះស្បៀង ដោយសារតែក្រុមហ៊ុនបានកាត់បន្ថយបុគ្គលិកទៅតាមតម្រូវការជាក់ស្ដែង ហើយរហូតមកដល់ពេលនេះក៏មិនទាន់ឃើញមានការជួយណាមួយពីរដ្ឋាភិបាលនោះដែរ។
កញ្ញានិយាយថា៖ «រយៈពេលមួយឆ្នាំជាង ដោយសារវិបត្តិកូវីដ-១៩នេះ គឺថាបុគ្គលិកទូទៅក្រុមហ៊ុន ណាហ្គាវើលដ៍ ជាង៨ ០០០នាក់ហ្នឹង គឺគាត់ធ្វើការអត់បាន១០០%ពេញដូចមុនកាលមុនកូវីដទេ ដោយសារក្រុមហ៊ុនគាត់ផ្ដល់ថ្ងៃធ្វើការឬម៉ោងធ្វើការហ្នឹងជាក់ស្ដែងទៅតាមអាជីពកម្មករត្រូវការ។ អ៊ីចឹងបុគ្គលិកទាំងអស់ហ្នឹង រយៈពេលមួយឆ្នាំ គាត់បាត់បង់ចំណូលពី៤០ទៅ៦០% កន្លែងហ្នឹងហើយធ្វើឱ្យប្រាក់បម្រុងរបស់គាត់គឺអត់មានច្រើនទេ ចំណែកការចំណាយរបស់គាត់នៅដដែល […]។»
កាលពីថ្ងៃទី២៧ ខែមេសា ឆ្នាំ២០២១ សហជីពនេះបានចេញសេចក្តីប្រកាសស្វែងរកជំនួយពីសប្បុរសជននិងស្ថាប័ននានា ជួយឧបត្ថម្ភជាស្បៀងឬថវិកាដល់សមាជិកសហជីពរបស់ខ្លួនដែលកំពុងខ្វះខាតខ្លាំង អំឡុងមានវិបត្តិកូវីដ-១៩ និងស្របពេលមានការបិទខ្ទប់ក្រុងនេះ។
សេចក្តីប្រកាសនោះបន្តថា៖ «ជាពិសេសក្នុងរយៈពេលនៃការបិទខ្ទប់ទីក្រុងនាពេលនេះ ហើយតំបន់មួយចំនួនត្រូវបានបិទជាតំបន់ក្រហម ធ្វើឱ្យសមាជិកសហជីពមួយចំនួនធំប្រឈមនឹងវិបត្តិខ្វះស្បៀងជាខ្លាំង និងមិនមានប្រាក់បម្រុងសម្រាប់ទិញស្បៀងតាមតម្រូវការទៀតផង»។
បើតាមកញ្ញា ស៊ីថរ ក្រោយការអំពាវនាវស្វែងរកជំនួយនេះ សហជីពទទួលបានការជួយជាថវិកានិងអង្ករពីសប្បុរជនមួយចំនួនដែរ ក្នុងនោះក៏មានការរៃអង្គាសខ្លះពីបុគ្គលិករបស់ក្រុមហ៊ុន ណាហ្គា ផ្សេងទៀតដែលមានលទ្ធភាពក្នុងការជួួយដល់បុគ្គលិកដែលកំពុងខ្វះខាត៕