អភិបាលរងខណ្ឌមានជ័យ អះអាងថា ការតវ៉ារបស់ពលរដ្ឋមួយចំនួនក្នុងភូមិព្នៀត ក្នុងសង្កាត់ស្ទឹងមានជ័យ២ ដែលជាតំបន់ក្រហមនោះ គ្រាន់តែជាលេសដើម្បីចេញពីទីតាំងបិទខ្ទប់ មិនមែនដោយសារបញ្ហាខ្វះស្បៀងនោះទេ។
ការអះអាងនេះធ្វើឡើងបន្ទាប់ពីពលរដ្ឋជាច្រើនគ្រួសាររស់នៅក្នុងភូមិព្នៀត បានប្រមូលផ្ដុំគ្នាតវ៉ាកាលពីល្ងាចថ្ងៃម្សិលមិញ ដើម្បីទាមទារឱ្យអាជ្ញាធរផ្តល់ស្បៀងអាហារ ក្រោយពីអាជ្ញាធរបានយកប៉ារ៉ាស់បិទខ្ទប់មិនឱ្យពួកគេចេញពីតំបន់ដែលកំពុងរស់នៅ។
អភិបាលរងខណ្ឌមានជ័យ លោក ឌី រ័ត្នខេមរុណ ប្រាប់ វីអូឌី នៅថ្ងៃនេះថា ការតវ៉ារបស់ពលរដ្ឋមួយចំនួនក្នុងភូមិព្នៀតនេះ មិនមែនដោយសារបញ្ហាខ្វះស្បៀងនោះទេ ព្រោះអាជ្ញាធរទើបនឹងចែកស្បៀងដល់ពលរដ្ឋនៅក្នុងភូមិនេះជាង៤០គ្រួសារ កាលពីថ្ងៃទី១៩ ខែមេសា ឆ្នាំ២០២១។
លោកបន្តថា មូលហេតុដែលអាជ្ញាធរចែកស្បៀងតែពលរដ្ឋជាង៤០គ្រួសារ ដោយសារពលរដ្ឋទាំងនោះពិតជាខ្វះខាតស្បៀងអាហារពិតមែន។ ដោយឡែក សម្រាប់គ្រួសារមួយចំនួនទៀតដែលអាជ្ញាធរមិនបានផ្តល់ស្បៀងឱ្យ ដោយសារតែអាជ្ញាធរមើលឃើញថា ពួកគាត់មានលទ្ធភាពគ្រប់គ្រាន់ក្នុងការដោះស្រាយស្បៀងដោយខ្លួនឯងបាន។
លោកថា៖ «ទីតាំងនេះមិនមែនជាបញ្ហាចោទក្នុងការខ្វះស្បៀងទេ ពីព្រោះថា ទីកន្លែងរបស់គាត់ហ្នឹងគឺជីវភាពសមរម្យ។ ហើយទី២ យើងពិនិត្យឃើញថា មានតែ៣០ទៅ៤០គ្រួសារទេដែលត្រូវយើងផ្ដល់ ហើយកន្លែងនេះយើងបានផ្ដល់ហើយ។ ដូចអ៊ុំម្នាក់ដែលគាត់រុញរទេះមកតវ៉ាដែរ យើងមានទាំងរូបថត គាត់មើលហើយគាត់ក៏រុញរទះទៅវិញ យើងបានផ្ដល់អំណោយជូនគាត់តាំងពីថ្ងៃទី១៩ ខែមេសាមក ប៉ុន្តែវាមិនមែនជាបញ្ហាចោទនៅក្នុងការខ្វះស្បៀងអាហារទេ។ ការខ្វះស្បៀងអាហារគ្រាន់តែជាលេសរបស់ពួកគាត់ទេ គឺគាត់ចង់ចេញទៅក្រៅតែម្ដង ហើយអាជ្ញាធររបស់អ្នកនៅតំបន់ក្រហម គឺមិនអនុញ្ញាតទេ »។
ក្រោយពីពលរដ្ឋតវ៉ានោះ អភិបាលរងខណ្ឌមានជ័យរូបនេះបញ្ជាក់ថា អាជ្ញាធរបានយកស្បៀងអាហារទៅចែកដល់ពលរដ្ឋនៅតំបន់នោះចំនួន៣០០គ្រួសារបន្ថែមទៀត។
ពលរដ្ឋនៅភូមិព្នៀត សង្កាត់ស្ទឹងមានជ័យ២ ដែលបានចេញតវ៉ាដើម្បីសុំស្បៀងអាហារ អ្នកស្រី ម៉ឺន សាម៉ន លើកឡើងថា គ្រួសាររបស់ពួកគាត់ទទួលបានស្បៀងហើយនៅថ្ងៃនេះ ក្រោយការតវ៉ា។ អ្នកស្រីបន្តថា ពួកគាត់មិនចង់ប្រមូលផ្ដុំគ្នាតវ៉ាទេ ដោយបារម្ភខ្លាចឆ្លងជំងឺកូវីដ-១៩ ប៉ុន្តែប្រសិនជាមិនតវ៉ានោះ ពួកគាត់នឹងមិនទទួលបានស្បៀងអាហារឡើយ។
អ្នកស្រីថា៖ «ខ្ញុំអត់យល់គាត់ថាតំបន់ហ្នឹងធូរធារ ដូចថាមានផ្ទះឯកឧត្ដម ម៉ម នាង គាត់មាន ហើយគាត់មានផ្ទះជួលប៉ុន្មានល្វែងនៅខាងមុខហ្នឹង សុទ្ធតែផ្ទះជួលឯកឧត្ដម ម៉ម នាង គាត់មានភូមិគ្រឹះធំ ប៉ុន្តែអ្នកនៅតាមជួររបងគាត់សុទ្ធតែអ្នកអត់ ហើយយកមកបូកជាមួយអ្នកមានដែរ ខ្ញុំមិនយល់។ អ៊ីចឹងបានថា ខ្ញុំចង់ឱ្យចុះមកមើលជាក់ស្ដែងក្រឬមានជីវភាពធូរធារ មើលទៅដឹងហើយ ព្រោះផ្ទះខ្លះគេមានលទ្ធភាព គេមិនយកទេ»។
ពលរដ្ឋម្នាក់ទៀត កញ្ញា យឹម បុប្ផា ដែលនៅភូមិព្នៀតដែរនោះបានលើកឡើងថា ពួកគាត់មិនទាន់ទទួលបានអំណោយរបស់រដ្ឋាភិបាលនៅឡើយចាប់តាំងពីមានការបិទខ្ទប់មក។ កញ្ញាបន្តថា អំណោយរដ្ឋាភិបាលដែលអាជ្ញាធរយកទៅចែកឱ្យពលរដ្ឋនៅព្រឹកមិញនេះ គឺចែកតែពលរដ្ឋដែលបានតវ៉ាកាលពីម្សិលមិញតែប៉ុណ្ណោះ។
កញ្ញាថា៖ «គំនិតខ្ញុំ តំបន់ក្រហមដាក់ជាតំបន់ខ្លាំងជាងគេ អ៊ីចឹងគាត់គួរតែគិតគូរពីតំបន់ហ្នឹងឱ្យខ្លាំងជាងគេ ព្រោះពេលដែលគាត់បិទ គាត់មិនបានប្រាប់មុន១ថ្ងៃឬ២ថ្ងៃ ដើម្បីឱ្យយើងត្រៀមស្បៀងដែរ។ អ៊ីចឹងគាត់ត្រូវផ្ដល់ឱ្យតំបន់ក្រហម ហើយគាត់អត់មានត្រូវប្រកាន់ថាអ្នកមានឡានជិះ អ្នកមានផ្ទះនៅទេ សំខាន់ស្បៀងគឺវាប្រហែលគ្នា។ តែគាត់បិទ គេក៏មិនអាចចេញទៅណាបានដែរ»។
អភិបាលរងខណ្ឌមានជ័យ លោក ឌី រ័ត្នខេមរុណ ឱ្យដឹងថា ក្នុងតំបន់ក្រហមនៃខណ្ឌមានជ័យមានពលរដ្ឋប្រហែល៤០ ០០០គ្រួសារ ក្នុងនោះ ពលរដ្ឋដែលទទួលបានស្បៀងដែលអាជ្ញាធរចែកឱ្យមានចំនួន២០ ០០០គ្រួសារ គិតត្រឹមថ្ងៃនេះ។
កាលពីថ្ងៃទី២៦ ខែមេសា ឆ្នាំ២០២១ រដ្ឋាភិបាលសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល រយៈពេល១សប្តាហ៍បន្ថែមទៀត ក្នុងនោះក៏មានការបែងចែកតំបន់មួយចំនួនជា «តំបន់ក្រហម» «តំបន់លឿងទុំ» និង «តំបន់លឿង» ដើម្បីប្រយុទ្ធនិងទប់ស្កាត់ការរីករាលដាលជំងឺកូវីដ-១៩៕