ក្រសួងទេសចរណ៍ ឱ្យដឹងថា លំហូរភ្ញៀវទេសចរក្នុងស្រុកបានងើបឡើងវិញបន្តិច ក្រោយបើកបម្រាមគោចរឆ្លងខេត្ត និងបើកឱ្យដំណើរការឡើងវិញនូវរមណីយដ្ឋានទេសចរណ៍នានានៅក្នុងប្រទេសកម្ពុជា។
ក្រសួងទេសចរណ៍បានផ្សព្វផ្សាយលើបណ្តាញសង្គមហ្វេសប៊ុករបស់ខ្លួននៅថ្ងៃទី៣ ខែឧសភា ឆ្នាំ២០២១ ដោយស្រង់សម្ដីរបស់រដ្ឋមន្រ្តីក្រសួងទេសចរណ៍ លោក ថោង ខុន ឱ្យដឹងថា គិតត្រឹមសប្តាហ៍ទី១ ចាប់ពីថ្ងៃទី២៦ ខែមេសា ដល់ថ្ងៃទី២ ខែឧសភា ឆ្នាំ២០២១នេះ កម្ពុជាទទួលបានភ្ញៀវទេសចរក្នុងស្រុកជិត៩ពាន់នាក់ (៨ ៩៦០នាក់) ដោយភ្ញៀវទេសចរទាំងនោះបានធ្វើដំណើរកម្សាន្តនៅតាមតំបន់ទេសចរណ៍នានាក្នុងប្រទេស។
ប្រភពដដែលបន្តថា ការងើបឡើងវិញនូវចំនួនភ្ញៀវទេសចរក្នុងស្រុកនេះ ក្រោយពេលបម្រាមគោចរមិនឱ្យពលរដ្ឋឆ្លងពីខេត្តមួយទៅកាន់ខេត្តមួយទៀត និងការបិទតំបន់ទេសចរណ៍ទូទាំងប្រទេស ត្រូវបានបញ្ចប់។
បើតាមលោក ថោង ខុន ក្នុងចំណោមភ្ញៀវទេសចរជិត៩ពាន់នាក់នេះ គឺមានភ្ញៀវទេសចរបរទេសជាង២០០នាក់។
លោកនាយករដ្ឋមន្រ្តី ហ៊ុន សែន បានសម្រេចបញ្ចប់បម្រាមគោចរឆ្លងពីខេត្តមួយទៅខេត្តមួយ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស កាលពីថ្ងៃទី២៥ ខែមេសា។ លោកបានលើកឡើងនៅក្នុងសេចក្តីសម្រេចនោះថា ការបញ្ចប់បម្រាមនេះ ដើម្បីសម្រួលដល់វិស័យទេសចរណ៍ សេវាកម្ម ការធ្វើអាជីវកម្ម និងការដឹកជញ្ជូនទំនិញ ជាដើម៕
