ក្រសួងសុខាភិបាលកំណត់ភូមិសាស្ត្រខេត្តបន្ទាយមានជ័យមួយទៀតជាភូមិសាស្ត្រដែលតម្រូវឱ្យពាក់ម៉ាសនិងកាតព្វកិច្ចរក្សាគម្លាតសុវត្ថិភាព ខណៈភូមិសាស្ត្រខេត្តនេះកំពុងមានការឆ្លងរាលដាលជំងឺកូវីដ-១៩។
សេចក្ដីជូនដំណឹងរបស់ក្រសួងសុខាភិបាល នៅថ្ងៃទី០៤ ខែឧសភា ឆ្នាំ២០២១ បានប្រាប់ទៅអាជ្ញាធរមានសមត្ថកិច្ចគ្រប់លំដាប់ថ្នាក់និងសាធារណជនទាំងអស់ថា នៅភូមិសាស្ត្រខេត្តបន្ទាយមានជ័យត្រូវបានកំណត់យកជាភូមិសាស្ត្រដែលមានការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ដែលតម្រូវឱ្យមានការអនុវត្តកាតព្វកិច្ចពាក់ម៉ាសនិងរក្សាគម្លាតសុវត្ថិភាព ស្របតាមប្រកាសរបស់ក្រសួងចុះថ្ងៃទី២២ ខែមីនា ឆ្នាំ២០២១ ស្តីពីកាតព្វកិច្ចពាក់ម៉ាសនិងកាតព្វកិច្ចរក្សាគម្លាតសុវត្ថិភាព ក្នុងអំឡុងពេលឆ្លងរាលដាលជំងឺកូវីដ-៩ នៅក្នុងសហគមន៍។
ក្រសួងបន្តថា បុគ្គលដែលមានកាតព្វកិច្ចពាក់ម៉ាសនិងកាតព្វកិច្ចរក្សាគម្លាតសុវត្ថិភាព ត្រូវកំណត់ក្នុងប្រការ៣ និងប្រការ៤ នៃប្រកាសលេខ០៨១ ស.នក.ប្រក ចុះថ្ងៃទី២២ ខែមីនា ឆ្នាំ២០២១ ដោយចាប់ផ្តើមអនុវត្តកាតព្វកិច្ចនេះចាប់ផ្តើមពីថ្ងៃទី៤ ខែឧសភា ឆ្នាំ២០២១នេះតទៅ រហូតដល់មានការជូនដំណឹងជាថ្មី។
ប្រការ៣ និងប្រការ៤ នៃប្រកាសរបស់ក្រសួងសុខាភិបាល កំណត់ថា បុគ្គលដែលវិជ្ជមានកូវីដ-១៩ បុគ្គលដែលមានកាតព្វកិច្ចធ្វើចត្តាឡីស័ក អ្នកបើកបរនិងអ្នករួមដំណើរលើមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជនគ្រប់ប្រភេទ អ្នកផ្តល់សេវាផ្ទាល់ដល់អតិថិជន និងបុគ្គលផ្សេងៗទៀតដែលកំពុងស្ថិតនៅតាមទីសាធារណៈដែលមានមនុស្សច្រើន ឬទីកន្លែងដែលមានការជួបជុំមនុស្សចាប់ពី២នាក់ឡើងទៅ។
ប្រកាសដដែលបន្តថា ចំពោះទីកន្លែងដែលតម្រូវឱ្យពាក់ម៉ាសវិញ ត្រូវធ្វើនៅគ្រប់ទីកន្លែងសាធារណៈនានា ដូចជា ភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ គ្លីនិក ឬមន្ទីរសម្រាកព្យាបាលជំងឺ ឬទីកន្លែងផ្សេងៗទៀតដែលបិទជិត។
ចំពោះកាតព្វកិច្ចត្រូវរក្សាគម្លាតសុវត្ថិភាពវិញ គឺបុគ្គលដែលស្ថិតនៅកន្លែងធ្វើការនៃសហគ្រាស ឬគ្រឹះស្ថានឯកជន ទីតាំងអាជីវកម្ម ឬទីកន្លែងសាធារណៈដែលមានមនុស្សច្រើន ត្រូវអនុវត្តគម្លាតសុវត្ថិភាពឱ្យបានយ៉ាងតិច «១ម៉ែត្រកន្លះ» ពីបុគ្គលមួយទៅបុគ្គលមួយទៀត។ ប៉ុន្តែក៏លើកលែងផងដែរសម្រាប់អ្នកដែលកំពុងរស់នៅជាមួយគ្នា សម្រាប់ការធ្វើដំណើរក្នុងមធ្យោបាយឯកជន រវាងជនពិការ ចាស់ជរា ឬកុមារជាមួយអ្នកមើលថែទាំពួកគេ ចំពោះអ្នកផ្តល់និងទទួលសេវាកម្មណាមួយ ចំពោះការហ្វឹកហាត់ឬប្រកួតកីឡា និងរវាងកូនកំលោះនិងកូនក្រមុំ ជាដើម។
បើតាមប្រកាសរបស់ក្រសួងសុខាភិបាល បើសិនបុគ្គលណាមិនអនុវត្តទៅតាមកាតព្វកិច្ចដែលតម្រូវនេះទេ គឺជំហានដំបូង ពួកគេនឹងរងនូវការព្រមាននិងណែនាំពីមន្រ្តីសុខាភិបាលឬអាជ្ញាធរមានសមត្ថកិច្ច។ ប៉ុន្តែបើសិននៅតែមិនអនុវត្តទៀត គឺនឹងប្រឈមការពិន័យជាទឹកប្រាក់ចន្លោះពី២០០ ០០០រៀល ទៅ១ ០០០ ០០០រៀលជាកំហិត។
ចាប់តាំងពីថ្ងៃទី២៤ ខែមីនា ឆ្នាំ២០២១ ក្រសួងសុខាភិបាល ក៏បានដាក់ភូមិសាស្ត្ររាជធានីភ្នំពេញ ខេត្តព្រះសីហនុ កណ្តាល ព្រៃវែង សៀមរាប និងស្វាយរៀង ជាភូមិសាស្ត្រដែលតម្រូវឱ្យមានការពាក់ម៉ាសនិងកាតព្វកិច្ចរក្សាគម្លាតសុវត្ថិភាពផងដែរ ខណៈរាជធានី-ខេត្តទាំងនោះជាភូមិសាស្ត្រដែលមានការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។
គិតត្រឹមថ្ងៃទី០៤ ខែឧសភា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៦ ២៩៩នាក់ ក្នុងនោះ អ្នកឆ្លងក្នុងព្រឹត្តិការណ៍សហគមន៍២០កុម្ភៈ មានចំនួន១៥ ៧៤៤នាក់ និងមានអ្នកស្លាប់ចំនួន១០៧នាក់។ សម្រាប់អ្នកជំងឺព្យាបាលជាសះស្បើយសរុបចំនួន៥ ៧៩១នាក់ និង ១០ ៣៩៤នាក់កំពុងសម្រាកព្យាបាលនៅឡើយ៕
