ក្រុមគ្រួសារសពបានហៅមរណភាពសមាជិកគ្រួសាររបស់ខ្លួនថា ជាការធ្វេសប្រហែសមួយរបស់ក្រុមគ្រូពេទ្យរដ្ឋមួយចំនួនដែលទុកឱ្យអ្នកជំងឺមានសភាពធ្ងន់ធ្ងររហូតឈានដល់ដំណាក់កាលពុំអាចជួយសង្រ្គោះបាន។
លោក មាស រតនា ឱ្យដឹងនៅព្រឹកថ្ងៃទី៥ ខែឧសភា ឆ្នាំ២០២១ ថាម្តាយក្មេករបស់លោកបានទទួលមរណភាពកាលពីល្ងាចម្សិលមិញ។ លោកបន្តថា នេះជាការស្លាប់ដែលវាពិបាកទទួលយកបាន ដោយសារអ្នកជំងឺរលាកផ្លូវដង្ហើមក្នុងកម្រិតស្រាលក្រោយឆ្លងផ្តាសាយពីកូនចៅនៅក្នុងផ្ទះ។
បើតាមលោក រតនា ប្រសិនបើអ្នកជំងឺទទួលបានការពិនិត្យនិងព្យាបាលទាន់ពេលវេលា លោកជឿជាក់ថាអាចជួយសង្រ្គោះបាន ដោយអ្នកជំងឺពីដំបូងមានសុខភាពល្អធម្មតាពេលបញ្ជូនទៅដល់មន្ទីរពេទ្យ។
លោកបន្តថា៖ «វាលឿនពេក ដូច្នេះហើយយើងវាពិបាកមែនទែន។ មនុស្សនៅនិយាយគ្នារាល់តែថ្ងៃ អត់មានឈឺស្អីផងហ្នឹង។ ដូចខ្ញុំបានប្រាប់អ៊ីចឹងថា គាត់ឆ្លងផ្តាសាយពីពួកខ្ញុំ។ ហើយពួកខ្ញុំជាអស់ហើយហ្នឹង»។
លោក មាស រតនា អះអាងថា ម្តាយក្មេករបស់លោកគឺអ្នកស្រី ជាម ឆេង ត្រូវបានក្រុមគ្រួសារដឹកតាមរថយន្តផ្ទាល់ខ្លួនទៅកាន់មន្ទីរពេទ្យរដ្ឋមួយចំនួននៅក្នុងទីក្រុងភ្នំពេញ កាលពីថ្ងៃទី៤ ខែឧសភា ដើម្បីស្វែងរកសេវាពិនិត្យនិងព្យាបាល។ លោកបន្ថែមថា ពេលដឹកទៅដល់មន្ទីរពេទ្យរដ្ឋ រួមមាន មន្ទីរពេទ្យព្រះកេតុមាលា មន្ទីរពេទ្យកាល់ម៉ែត្រ ហើយចុងក្រោយនៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) ប៉ុន្តែត្រូវបានមន្ទីរពេទ្យទាំងនោះបដិសេធ។
ប្រភពដដែលឱ្យដឹងថា សម្រាប់មន្ទីរពេទ្យព្រះកេតុមាលា មូលហេតុដែលមិនទទួលយកការព្យាបាលម្តាយក្មេករបស់ខ្លួន ដោយសារខាងមន្ទីរពេទ្យបានដូរគោលការណ៍ គឺអ្នកជំងឺរលាកផ្លូវដង្ហើមត្រូវប្តូរទៅមន្ទីរពេទ្យផ្សេងវិញហើយ។
ក្រៅពីនេះ លោក មាស រតនា មានប្រសាសន៍ថា ចំពោះពេទ្យផ្សេងដូចជា មន្ទីរពេទ្យកាល់ម៉ែត្រ និងមន្ទីរពេទ្យរុស្សីជាដើម បានលើកហេតុផលថា ពេទ្យពេញដោយអ្នកជំងឺ ហើយមិនមានឧបករណ៍តេស្តរហ័សធ្វើរោគវិនិច្ឆ័យថែមទៀត។ ដោយគ្មានជម្រើស លោកថា ក្រុមគ្រួសារត្រូវបង្ខំចិត្តដឹកអ្នកជំងឺត្រឡប់មកផ្ទះ ហើយព្យាបាលដោយខ្លួនឯងវិញ តាមរយៈការជួលបំពង់អុកស៊ីសែនពីខាងក្រៅជាជំនួយផ្លូវដង្ហើម។
វីអូឌី ពុំអាចសុំការឆ្លើយតបជុំវិញបញ្ហានេះពីខាងមន្ទីរពេទ្យកាល់ម៉ែត្រ និងពេទ្យព្រះកេតុមាលា បានទេ នៅថ្ងៃទី៥ ខែឧសភា។
ដោយឡែក លោក ហុក គឹមចេង អគ្គនាយកបច្ចេកទេសនៃក្រសួងសុខាភិបាលបានប្រាប់ថា នឹងពិនិត្យករណីនេះ ដើម្បីឈានទៅរកកិច្ចអន្តរាគមន៍ណាមួយក្នុងរឿងនេះ។
យ៉ាងនេះក្តី លោក អ៊ា សុខហេង ប្រធានផ្នែកសេវានៃមន្ទីរពេទ្យមិត្តភាពខ្មែរ-សូវៀត ឱ្យដឹងថា ដោយសាររូបលោកនៅក្រៅមន្ទីរពេទ្យនៅឡើយ ហេតុដូច្នេះ ព័ត៌មានស្តីពីការរើសអើងអ្នកជំងឺហាក់មិនទាន់ច្បាស់។
ប៉ុន្តែលោកអះអាងថា ចំពោះមន្ទីរពេទ្យដែលលោកកំពុងប្រតិបត្តិការនេះ គឺពុំមានគោលការណ៍ដូច្នេះឡើយ។ ម៉្យាងវិញទៀត អ្នកជំងឺដែលបានបញ្ជូនមកដល់មន្ទីរពេទ្យហើយ ត្រូវតែទទួលបានសេវាពិនិត្យនិងព្យាបាលជាចាំបាច់។
លោកបន្តថា៖ «ការងារហ្នឹងលោកទាក់ទងទៅខាងរដ្ឋបាល ព្រោះខាងខ្ញុំហ្នឹងក៏អត់ទាន់បានដឹងដែរ ព្រោះខ្ញុំសម្រាកនៅផ្ទះ។ បាទ! អត់បោះបង់អ្នក[ជំងឺ]ទេ»។
ក្រោយទទួលមរណភាពនៅព្រឹកថ្ងៃទី៥ ខែឧសភា អ្នកស្រី ជាម ឆេង ដែលស្ថិតក្នុងវ័យ៦៧ ឆ្នាំ ត្រូវបានក្រុមគ្រូពេទ្យធ្វើរោគវិនិច្ឆ័យរកឃើញថា អ្នកស្រីបានឆ្លងជំងឺកូវីដ-១៩។
បើតាមលោក មាស រតនា ក្រុមគ្រួសារបស់លោកពុំបានចេញក្រៅឬប្រាស្រ័យទាក់ទងជាមួយអ្នកផ្សេងក្រៅពីសាច់ញាតិក្នុងផ្ទះទេ អំឡុងពេលបិទខ្ទប់នេះ។ បើជួបអ្នកផ្សេង គឺមានតែទិញបន្លែ ត្រី និងសាច់ ដែលគេដឹកមកលក់ដល់ផ្ទះប៉ុណ្ណោះ។ លើសពីនេះ សមាជិកគ្រួសាររបស់លោកសុទ្ធតែបានចាក់វ៉ាក់សាំងការពារជំងឺកូវីដ-១៩ គ្រប់២ដង (ដូសទី១ និងដូសទី២) រួចហើយដែរ លើកលែងតែម្តាយក្មេករបស់លោកម្នាក់ប៉ុណ្ណោះ។
នាយករងនៃអង្គការសម្ព័ន្ធខ្មែរជំរឿន និងការពារសិទ្ធិមនុស្ស ហៅកាត់ថា លីកាដូ (Licadho) លោក អំ សំអាត ចាត់ទុក ការព្រងើយកន្តើយដោយក្រុមគ្រូពេទ្យ ដោយមិនទទួលពិនិត្យនិងព្យាបាលអ្នកជំងឺនេះ គឺជាផ្នែកមួយនៃការរើសអើង និងផ្ទុយពីគោលការណ៍សិទ្ធិមនុស្ស។
លោកបន្តថា ជាក្របខណ្ឌដូចមានកំណត់នៅក្នុងរដ្ឋធម្មនុញ្ញនិងគោលការណ៍ជាសកលស្តីពីសិទ្ធិមនុស្ស នៅគ្រប់មន្ទីរពេទ្យនិងវិស័យដែលពាក់ព័ន្ធរឿងសុខាភិបាលនេះ ត្រូវចាត់ទុកអ្នកជំងឺជាអាទិភាពទី១ ក្នុងការទទួលបានសេវាព្យាបាល។
លោកបន្តថា៖ «អ៊ីចឹងខ្ញុំគិតថា បើសិនជារុញគាត់ចុះឡើងៗ ហើយមិនទទួល អាហ្នឹងវាប៉ះពាល់ដល់សិទ្ធិរបស់គាត់ គេហៅថា សិទ្ធិទទួលបានសេវាផ្នែកសុខភាព។ បើសិនជាមានការបារម្ភ ខ្ញុំឃើញក្រសួងសុខាភិបាលលោកបើកហើយសម្រាប់គ្លីនិកឯកជននិងមន្ទីរពេទ្យរដ្ឋធំៗ គឺអនុញ្ញាតឱ្យប្រើប្រាស់នូវប្រព័ន្ធការធ្វើតេស្តកូវីដ-១៩ ដែលលឿន»។
គិតត្រឹមព្រឹកថ្ងៃទី៥ ខែឧសភានេះ មានអ្នកឆ្លងកូវីដថ្មីចំនួន៦៧២នាក់។ តួលេខនេះបានធ្វើឱ្យអ្នកឆ្លងសរុបនៅទូទាំងប្រទេសកើនឡើងជិត ១ម៉ឺន៧ពាន់នាក់ (១៦ ៩៧១) និងបណ្តាលឱ្យមានអ្នកស្លាប់បានកើនឡើងដល់១១០នាក់៕
