មន្ត្រីជាន់ខ្ពស់រដ្ឋបាលរាជធានីភ្នំពេញ បានលើកឡើងថា ក្រុមអ្នកប្រឆាំងរដ្ឋាភិបាលមិនបានជួយលុយសូម្បីតែមួយរៀល រួមទាំងកម្លាំង ក្នុងអំឡុងពេលរដ្ឋាភិបាលខំប្រឹងប្រែងទប់ស្កាត់រលកចម្លងជំងឺកូវីដ-១៩ ឆ្លងចូលសហគមន៍នាពេលនេះ ដោយលោកថា អ្នកទាំងនោះបានត្រឹមតែនិយាយរិះគន់ចំណាត់ការរបស់រដ្ឋាភិបាលតែប៉ុណ្ណោះ។
ការថ្លែងរបស់មន្ត្រីជាន់ខ្ពស់រដ្ឋបាលរាជធានីភ្នំពេញនេះ ធ្វើឡើងក្នុងសន្និសីទសារព័ត៌មានមួយនៅសាលារាជធានីភ្នំពេញ នាថ្ងៃព្រហស្បតិ៍នេះ ស្តីពី «ការដាក់ចេញវិធានការរដ្ឋបាល សម្រាប់ភូមិសាស្ត្ររាជធានីភ្នំពេញ និងបែងចែកជាតំបន់ក្រហម លឿងទុំ និងតំបន់លឿង រយៈពេល៧ថ្ងៃបន្ថែមទៀត» ហើយក៏ឆ្លើយតបទៅនឹងចម្ងល់ដែលថា ហេតុអ្វីរដ្ឋាភិបាលបិទបញ្ចប់វិធានបិទខ្ទប់ចំពេលអត្រាអ្នកឆ្លងជំងឺកូវីដ-១៩ នៅតែបន្តកើនឡើង។
អភិបាលរងរាជធានីភ្នំពេញ លោក កើត ឆែ បានលើកឡើងក្នុងសន្និសីទនោះថា ការដែលរដ្ឋាភិបាលសម្រេចបិទខ្ទប់រាជធានីភ្នំពេញកន្លងមកនេះ គឺធ្វើឡើងដើម្បីការពារអាយុជីវិតប្រជាពលរដ្ឋ និងកាត់ផ្តាច់រលកចម្លងពីតំបន់មួយទៅតំបន់មួយ និងពីខេត្តមួយទៅខេត្តមួយទៀត។
លោកបន្តថា លទ្ធផលនៃការបិទខ្ទប់នេះហើយដែលធ្វើឱ្យរដ្ឋាភិបាលអាចកំណត់បានទីតាំងនៃប្រភពចម្លង ដែលអាចឈានទៅបិទបញ្ចប់វិធានការបិទខ្ទប់នេះ ហើយសម្រេចបើកឱ្យមានការធ្វើដំណើរជាប្រក្រតីឡើងវិញ លើកលែងតំបន់មួយចំនួនប៉ុណ្ណោះ។
ឆ្លើយនឹងសំណួរអ្នកសារព័ត៌មានពាក់ព័ន្ធនឹងការចូលរួមរបស់អតីតគណបក្សប្រឆាំង និងអ្នករិះគន់មួយចំនួនលើវិធានការបិទខ្ទប់នេះ លោកគូសបញ្ជាក់ថា ក្រុមអ្នកប្រឆាំងនិងអ្នករិះគន់ទាំងនោះបានត្រឹមនិយាយប៉ុណ្ណោះ។
លោកថា៖ «ពាក្យថាក្រុមប្រឆាំងដែលលោក វណ្ណ សារាយ លើកឡើងនេះ [អ្នកយកព័ត៌មាន Fresh News] គឺធ្វើអីក៏គាត់ប្រឆាំងដែរ នៅពេលដែលគាត់អត់បានចេញលុយមួយរៀលនិងពលកម្មបន្តិចសោះ តែគាត់បានតែនិយាយទេ»។
លោកបន្តទៀតថា៖ «ខ្ញុំឧទាហរណ៍ ដែលគាត់ស្រែកកោកៗ រុញគាត់ទៅចែកអំណោយមើល បើហ៊ានទៅចែក ព្រោះតំបន់ហានិភ័យ [តំបន់ក្រហម] អត់ហ៊ានទេ! ឮថាក្រហម ស្រែកចាចអ៊ីចឹង! សូមឱ្យគិតដូចខ្ញុំជម្រាបជូនខាងដើម គឺជារឿងដែលរដ្ឋាភិបាលអនុវត្តបានយ៉ាងត្រឹមត្រូវបំផុត និងមានប្រសិទ្ធភាព និងទទួលបានលទ្ធផលជាបឋមជោគជ័យ»។
រដ្ឋបាលរាជធានីភ្នំពេញ ធ្លាប់បានបញ្ជាក់ថា តំបន់ក្រហមជាតំបន់ដែលឆ្លងជំងឺកូវីដ-១៩ធ្ងន់ធ្ងរ តំបន់លឿងទុំជាតំបន់ឆ្លងកម្រិតមធ្យម និងតំបន់លឿងជាតំបន់ឆ្លងតិចតួច។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន ហៅការលើកឡើងនេះថា ជាការយល់ច្រឡំមួយរបស់មន្ត្រី ដោយថា អ្នកដែលទទួលខុសត្រូវដោះស្រាយបញ្ហាសង្គម គឺរដ្ឋាភិបាលដែលមានការផ្តល់ទំនុកចិត្តពីសភា ហើយសភា ត្រូវកោះហៅរដ្ឋាភិបាលមកសាកសួរ បើរដ្ឋាភិបាលមិនអាចឆ្លើយតបទៅនឹងបញ្ហារបស់ពលរដ្ឋបាន។ លោកបន្តថា ពេលនេះ អតីតគណបក្សប្រឆាំង គ្មានដំណែងណាមួយក្នុងសភាដែលត្រូវទទួលខុសត្រូវចំពោះមុខម្ចាស់ឆ្នោតទេ។
លោកបានថ្លែងថា៖ «យើងអត់មានតួនាទីសំខាន់មែនទែន យើងត្រូវយល់អាហ្នឹង! លោកចោទទៅលើគណបក្សប្រឆាំងមិនបានធ្វើអី អាហ្នឹងខុសហើយ! ទាល់តែផ្តល់កៅអីឱ្យគណបក្សប្រឆាំងវិញមក គេធ្វើហើយ»។
អ្នករត់ម៉ូតូកង់បីនៅរាជធានីភ្នំពេញមួយរូប លោក ហេង សិរីវិសាល បាននិយាយថា លោកចង់ឃើញអ្នកនយោបាយរួមគ្នាដោះស្រាយបញ្ហាពលរដ្ឋដែលកំពុងប្រឈមនឹងបញ្ហាជីវភាព ខណៈការរកចំណូលរបស់គាត់ធ្លាក់ចុះពីជាង១០០ ០០០រៀលក្នុងមួយថ្ងៃ មកត្រឹម១៥ ០០០រៀលវិញនោះ។
លោកថា៖ «បញ្ហាដែលចម្បង គឺធនាគារនិងម្ហូបអាហារហ្នឹងហើយ! អ៊ីចឹងសូមឱ្យអ្នកនយោបាយរួបរួមគ្នា ដើម្បីប្រជាជនដើម្បីជាតិទាំងអស់គ្នា»។
អ្នកស្រាវជ្រាវសង្គម លោកបណ្ឌិត សេង សារី មានប្រសាសន៍ថា ក្នុងកាលៈទេសៈនេះ រដ្ឋាភិបាលមិនគួរទម្លាក់កំហុសដាក់ភាគីណាមួយនោះទេ ព្រោះខ្លួនមានសិទ្ធិប្រើប្រាស់ថវិកាជាតិនិងកម្លាំងសរុប ដើម្បីគាំពារសង្គម។
លោកថា៖ «ជាការឆ្លើយតបតាមបែបឆ្លាតវ័យទៅទៀត ធ្វើម៉េចកុំឱ្យប៉ះពាល់សេដ្ឋកិច្ចខ្លាំងពេក កុំឱ្យពលរដ្ឋមានការឆ្លងការរាលដាលជំងឺហ្នឹងខ្លាំងពេក អាហ្នឹងវាអាស្រ័យទៅលើសមត្ថភាពនៃការដឹកនាំរបស់រដ្ឋាភិបាល»។
តែយ៉ាងណា លោក កើត ឆែ និយាយថា តាមរយៈនៃការដាក់ចេញវិធានការរដ្ឋបាល វិធានការសុខាភិបាល និងការចូលរួមសហការពីប្រជាពលរដ្ឋ ពិសេសអ្នករស់នៅតំបន់បិទខ្ទប់ កម្ពុជានឹងអាចកាត់ផ្តាច់រលកចម្លងជំងឺសកលនេះបាន នៅពេលដ៏ខ្លីខាងមុន៕