ក្រសួងអប់រំ និងសហភាពសហព័ន្ធយុវជនកម្ពុជា ប្រកាសដាក់ឱ្យប្រើប្រាស់ជាផ្លូវការនូវកម្មវិធីស្វ័យសិក្សាដែលមានឈ្មោះថា «MoEYS E-Learning» នៅថ្ងៃសុក្រនេះ ដើម្បីពង្រីកបន្ថែមនូវសេវាអប់រំ និងការសិក្សារបស់សិស្ស ក៏ដូចជាពង្រឹងវិស័យអប់រំ អំឡុងពេលមានការរាតត្បាតនូវជំងឺកូវីដ-១៩។
យោងតាមសេចក្តីថ្លែងការណ៍រួមរបស់ក្រសួងអប់រំ យុវជន និងកីឡា និងសហភាពសហព័ន្ធយុវជនកម្ពុជា ចេញផ្សាយនៅថ្ងៃទី០៧ ខែឧសភា ឆ្នាំ២០២១នេះ បានលើកឡើងថា ការបង្កើតកម្មវិធីស័្វយសិក្សានេះ ធ្វើឡើងក្នុងគោលបំណងឆ្លើយតបទៅនឹងតម្រូវការជាក់ស្តែងនៃការអភិវឌ្ឍវិស័យអប់រំនៅកម្ពុជា ប្រកបដោយបរិយាបន្ន សមធម៌ និងគុណភាព ឆ្ពោះទៅកាន់យុគសម័យឌីជីថល រួមទាំងបង្កភាពងាយស្រួលដល់សិស្សានុសិស្សក្នុងការសិក្សា ក្នុងស្ថានភាពនៃការឆ្លងរាតត្បាតជំងឺកូវីដ-១៩។
សេចក្ដីថ្លែងការណ៍បញ្ជាក់ថា៖ «កម្មវិធីស្វ័យសិក្សាដែលបានអភិវឌ្ឍឡើងតាមបែបឌីជីថលនិងបច្ចេកវិទ្យានេះ និងផ្ដល់ភាពងាយរហ័សនិងចំណេញពេលវេលា ដល់សិស្សានុសិស្សក្នុងការចូលទៅប្រើប្រាស់ និងអាចទាញយកប្រយោជន៍ដ៏ច្រើនសម្បូរបែបផងដែរ»។
កម្មវិធីនេះនឹងផ្ដល់ជាជម្រើសមួយបន្ថែមទៀតក្នុងការអនុវត្តទស្សនទាន «គន្លងជីវិតថ្មីក្នុងវិស័យអប់រំ» នៅកម្ពុជាដែលសិស្សានុសិស្សនៅកម្រិតចំណេះដឹងទូទៅ អាចធ្វើស្វ័យសិក្សាបន្ថែមស្របតាមភាពចាំបាច់ និងជាឧបករណ៍អប់រំសម្រាប់គ្រូបង្រៀន ក៏ដូចជាអាណាព្យាបាលសិស្សក្នុងការជួយបង្រៀនកូននៅផ្ទះ។
នៅក្នុងសេចក្ដីងថ្លែងការណ៍បានសរសេរថា កម្មវិធីនឹងជំរុញឱ្យសិស្សានុសិស្សអាចសម្របខ្លួនទៅនឹងទស្សនទាននៃ«ការអប់រំតាមបែបឌីជីថល»។ នៅក្នុងនោះ ឱ្យពួកគេអាចស្វែងយល់បន្ថែមពីបំណិនជីវិត ការទទួលខុសត្រូវ ការគ្រប់គ្រងពេលវេលា ភាពអត់ធ្មត់ ការខិតខំប្រឹងប្រែង ការពង្រឹងចំណេះដឹង និងការអភិវឌ្ឍសមត្ថភាពដើម្បីអនាគតខ្លួន។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍នៅថ្ងៃសុក្រនេះថា កម្មវិធីស្វ័យសិក្សា MoEYS E-learning ជាកម្មវិធីសិក្សាតាមប្រព័ន្ធអនឡាញ តាមទូរសព្ទដៃឆ្លាតវៃ ដែលជាការឆ្លើយតបទៅនឹងចក្ខុវិស័យអប់រំឌីជីថល បរិបទឧស្សាហកម្ម៤.០ និងស្ថានភាពកូវីដ-១៩ រួមទាំងមានផលប្រយោជន៍ជាច្រើនសម្រាប់ការសិក្សារបស់សិស្សនាពេលបច្ចុប្បន្ននេះផងដែរ។
លោកបានថ្លែងថា៖ «កម្មវិធីស្វ័យសិក្សានេះមានវីដេអូសិក្សាពីថ្នាក់ទី១ ដល់ថ្នាក់ទី១២ សៀវភៅសិក្សាអេឡិចត្រូនិច ដូចជាសៀវភៅសិក្សាគោល សៀវភៅកំណែអំណានទូទៅ ចំណេះដឹងសកល រឿងនិទាន កម្មវិធីតេស្តសមត្ថភាពសិស្ស និងទំព័រព័ត៌មានអប់រំ។ អ្នកសិក្សាអាចទាញយកកម្មវិធីស្វ័យសិក្សានេះពី App Store, Google Play និង App Gallery រួចសូមអានសេចក្តីណែនាំបច្ចេកទេសដែលមានស្រាប់»៕