ប្រជាពលរដ្ឋជាង១០០គ្រួសារ រស់នៅក្រុងសំរោង ខេត្តឧត្តរមានជ័យ បានអំពាវនាវទៅអាជ្ញាធរពាក់ព័ន្ធជួយដោះស្រាយវិវាទដីធ្លីរបស់ពួកគាត់ និងសុំទៅតុលាការកុំចាត់ការលើបណ្តឹងប្រឆាំងពលរដ្ឋ២នាក់ពាក់ព័ន្ធនឹងជម្លោះដីធ្លីនេះ។
កាលពីថ្ងៃទី២៩ ខែមេសា ឆ្នាំ២០២១ ព្រះរាជអាជ្ញារង នៃអយ្យការអមសាលាដំបូងខេត្តឧត្តរមានជ័យ លោក គង់ រតនា បានចេញដីកាកោះហៅពលរដ្ឋ២នាក់ រួមមាន លោក ប្រម រី និងលោក ឡា ភួត ឱ្យចូលខ្លួនទៅបំភ្លឺនៅសាលាដំបូងខេត្ត នៅថ្ងៃទី១២ ខែឧសភានេះ ពាក់ព័ន្ធការចោទប្រកាន់ថា បានកាប់រានព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃរបស់រដ្ឋ ខណៈអាជ្ញាធរបានហាមមិនឱ្យប្រជាពលរដ្ឋចូលទៅបង្កបង្កើនផលនៅតំបន់នោះទេ។
លោក ឡា ភួត ជាពលរដ្ឋម្នាក់ក្នុងចំណោមពលរដ្ឋ១០០គ្រួសារ និងកំពុងជាប់បណ្តឹងនៅតុលាការ បានប្រាប់ វីអូឌី នៅថ្ងៃចន្ទនេះថា កាលពីចុងសប្តាហ៍មុន ប្រជាពលរដ្ឋប្រហែល១៤០គ្រួសារបាននាំគ្នាតវ៉ានិងអំពាវនាវទៅដល់អាជ្ញាធរពាក់ព័ន្ធឱ្យដោះស្រាយ ដោយផ្តល់ដីនោះឱ្យពួកគាត់បានអាស្រ័យផលឡើងវិញ និងទាមទារកុំឱ្យប្ដឹងប្រជាពលរដ្ឋទៅតុលាការ។
លោក ឡា ភួត បន្តថា រូបលោកនិងពលរដ្ឋម្នាក់ទៀត មិនបានកាប់រានព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃ ដូចការចោទប្រកាន់ឡើយ។ លោកថា ដីស្រែនិងដីចម្ការនោះ គ្រួសារលោកបានចូលទៅអាស្រ័យផលតាំងពីឆ្នាំ១៩៩៨ រហូតមកទល់បច្ចុប្បន្ននេះ។
លោកបន្ថែមថា៖ «ខ្ញុំចង់ឱ្យខាងក្រសួងពាក់ព័ន្ធចុះទៅមើលដីធ្លីនោះជាក់ស្តែង ថាប្រជាជនខ្ញុំរំលោភយកមែនឬក៏អត់? ហើយដីគាត់អាស្រ័យយូរឆ្នាំមែនឬក៏អត់? គាត់ទៅឈូសឆាយបំផ្លាញព្រៃឈើពិតប្រាកដមែនឬក៏អត់? ព្រោះដីនេះវាស្មើជីវិត ព្រោះមានដីនេះសម្រាប់ចិញ្ចឹមជីវិតរៀងខ្លួន យើងរស់នៅដោយសារបានដីធ្លី ចុះបើអស់ដីធ្លីបានអីទៀតខ្ញុំ»។
ពលរដ្ឋម្នាក់ទៀត អ្នកស្រី គួរ ថាន់ និយាយថា បងប្រុសរបស់គាត់ឈ្មោះ ប្រម រី ត្រូវបានតុលាការកោះហៅឱ្យឆ្លើយបំភ្លឺ ក្រោយចេញតវ៉ាដីធ្លីនេះ។ អ្នកស្រីថា គ្រួសារអ្នកស្រីមានដីប្រហែល៥ហិកតា សម្រាប់ធ្វើស្រែនិងដាំដំឡូងមី ដើម្បីចិញ្ចឹមជីវិត ដោយពុំមានដីកន្លែងផ្សេងទៀតសម្រាប់បង្កបង្កើនផលឡើយ។
ករណីនេះ អ្នកស្រីបានស្នើដល់អាជ្ញាធរចុះវាស់វែងដីធ្លីនោះ និងចេញបណ្ណកម្មសិទ្ធិជូនពលរដ្ឋ ហើយបញ្ឈប់ការគំរាមកំហែងចាប់ពលរដ្ឋដាក់ពន្ធនាគារទៀត។
អ្នកស្រីបន្ថែមថា៖ «ប្រសិនបើគេមិនដោះស្រាយឱ្យ គេយកអស់នោះ យើងមិនដឹងបានអីទេ ព្រោះយើងមានតែដីប៉ុណ្ណឹងហើយ។ ហើយយើងនឹងមានបញ្ហាជីវភាព ព្រោះយើងអស់ហើយ[ដី]ធ្វើស្រែធ្វើចម្ការហើយហ្នឹង។ អ៊ីចឹងខ្ញុំសុំអំពាវនាវដល់ក្រសួងពាក់ព័ន្ធជួយដោះស្រាយដល់ពួកខ្ញុំផង»។
ពាក់ព័ន្ធករណីនេះ អភិបាលខេត្តឧត្តរមានជ័យ លោក ប៉ែន កុសល មានប្រសាសន៍ថា លោកកំពុងឱ្យមន្ត្រីសហការជាមួយអាជ្ញាធរពាក់ព័ន្ធចុះពិនិត្យនិងស្រាវជ្រាវ ដើម្បីឈានទៅរកការដោះស្រាយ។ លោកថា ប្រសិនជាពលរដ្ឋទាំងនោះ ជាពលរដ្ឋក្រីក្រឬខ្វះដីពិតប្រាកដមែន លោកនឹងរៀបចំផ្តល់ដីសម្បទានសង្គមកិច្ចជូនពួកគេ។
ចំពោះពលរដ្ឋ២នាក់ដែលកំពុងជាប់បណ្តឹងនៅតុលាការវិញ លោកថា នេះជាសមត្ថកិច្ចរបស់តុលាការ ដែលអាជ្ញាធរខេត្តមិនអាចលូកដៃបានឡើយ។
លោកបន្ថែមថា៖ «គោលការណ៍របស់ខេត្តឬក៏រដ្ឋាភិបាលយើង មានត្រៀមសម្រាប់ចែកជូនពលរដ្ឋទាំងហ្នឹង ឱ្យតែពួកគាត់ពិតជាអត់ដីពិតមែន។ ប៉ុន្តែប្រសិនបើពួកគាត់ចូលទៅទន្ទ្រានយកនោះ រឿងផ្សេងមួយទៀត វាពាក់ព័ន្ធផ្លូវច្បាប់ វាពាក់ព័ន្ធការមានទោស»។
មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្តរមានជ័យ លោក ស្រី ណារ៉េន បានឱ្យដឹងថា ដីដែលប្រជាពលរដ្ឋចូលទៅអាស្រ័យផលនោះ ជាអតីតដីរបស់ក្រុមហ៊ុន អង្គរស៊ូហ្គឺ (Angkor Sugar)។ លោកថា ក្រុមហ៊ុនមួយនេះធ្លាប់ទទួលបានសិទ្ធិលើដីសម្បទានសេដ្ឋកិច្ចពីរដ្ឋាភិបាលនៅខេត្តឧត្តរមានជ័យ ដើម្បីដាំអំពៅ ប៉ុន្តែបានបញ្ចប់ទៅវិញនៅឆ្នាំ២០១៥។
លោក ស្រី ណារ៉េន បន្ថែមថា ក្រោយក្រុមហ៊ុនមួយនេះបញ្ចប់ទៅវិញ ប្រជាពលរដ្ឋដែលរងផលប៉ះពាល់នៅមិនទាន់ទទួលបានសំណង បានចូលទៅអាស្រ័យផលលើដីពួកគេវិញ ដែលបណ្តាលឱ្យមានការចោទប្រកាន់ថាពលរដ្ឋចូលទៅឈូសឆាយដីព្រៃរបស់រដ្ឋខុសច្បាប់។
មន្ត្រីសិទ្ធិមនុស្សរូបនេះជំរុញទៅអាជ្ញាធរខេត្តដោះស្រាយតាមរយៈការផ្តល់ដីសម្បទានសង្គមកិច្ចជូនប្រជាពលរដ្ឋវិញ ជាជាងការចោទប្រកាន់ ហើយប្តឹងប្រជាពលរដ្ឋទៅតុលាការបែបនេះ។
លោកបន្ថែមថា៖ «មុនក្រុមហ៊ុន អង្គរ ស៊ូហ្គឺ ក្ស័យធុន គឺវាបានឈូសឆាយដីហ្នឹងវាលទៅហើយ។ អ៊ីចឹងប្រជាពលរដ្ឋហ្នឹងគ្រាន់តែគាត់ចូលទៅអាស្រ័យផលនៅលើដីចាស់ ដែលគាត់អះអាងថា ពីមុនហ្នឹងគាត់មិនទាន់ទទួលបានសំណងសមរម្យ សម្រាប់ការដោះដូរហ្នឹងតាំងពីឆ្នាំ២០០៨ និង២០០៩ម៉្លេះ។ អ៊ីចឹងកុំឱ្យមានការប្តឹងផ្តល់ពលរដ្ឋអី យើងគួរនិយាយពីការផ្តល់ដីសម្បទានសង្គមកិច្ចទៅ ពីព្រោះចែកទៅ បានទៅលើប្រជាពលរដ្ឋរបស់ខ្លួនឯងដែរទេ ហើយសល់ប៉ុន្មានយើងស្តារដាំព្រៃឈើឡើងវិញទៅ»។
បើតាមការអះអាងរបស់ក្រុមប្រជាពលរដ្ឋ ពួកគាត់ទាំង១៤០គ្រួសារដែលកំពុងតវ៉ានោះ ភាគច្រើនជាពលរដ្ឋក្រីក្រ ដោយមួយគ្រួសារមានដីពី១ហិកតាទៅ៦ហិកតាប៉ុណ្ណោះ៕
