ក្រសួងធនធានទឹក និងឧតុនិយម ព្រមានចាត់វិធានការផ្លូវច្បាប់លើអ្នកផ្សព្វផ្សាយព័ត៌មានមិនពិតទាក់ទងនឹងស្ថានភាពអាកាសធាតុ នៅលើបណ្ដាញសង្គម ដែលបង្កឱ្យមានការភ័ន្តច្រឡំពីសាធារណជន។
ក្នុងសេចក្ដីប្រកាសព័ត៌មានលើទំព័រហ្វេសប៊ុកផ្លូវការរបស់ក្រសួង បានឱ្យដឹងនៅថ្ងៃទី១០ ខែឧសភា ឆ្នាំ២០២១នេះថា កន្លងមក មានជនអនាមិកបានបង្កើតទំព័រហ្វេសប៊ុកមួយឈ្មោះ «Cambodia Weather Service» ដែលមិនមែនជាស្ថាប័នទទួលខុសត្រូវរបស់រដ្ឋ ហើយបានបង្ហោះព័ត៌មានមួយចំនួនមិនត្រូវត្រឹមអំពីស្ថានភាពអាកាសធាតុជាក់ស្ដែងនៅកម្ពុជា ដែលបង្កឱ្យមានការភ័ន្តច្រឡំនិងបង្កភាពចលាចលលើស្ថានភាពអាកាសធាតុជាក់ស្ដែងពីសំណាក់ប្រជាពលរដ្ឋ។
ក្រសួងបញ្ជាក់ថា រាល់ដំណឹងអំពីស្ថានភាពអាកាសធាតុទូទៅនិងទឹកជំនន់ទន្លេមេគង្គនៅកម្ពុជា ដែលបានបង្ហោះផ្សព្វផ្សាយដោយទំព័រឬគណនីហ្វេសប៊ុកណាមួយក្រៅពីទំព័រហ្វេសប៊ុកផ្លូវការក្រសួង គឺមិនមែនជាការពិតនោះទេ។
ជាមួយគ្នានេះដែរ ក្រសួងក៏បានព្រមានចាត់វិធានច្បាប់ចំពោះអ្នកបន្ដបង្ហោះផ្សព្វផ្សាយព័ត៌មានមិនពិតជុំវិញស្ថានភាពអាកាសធាតុនេះ ក្នុងចេតនាទុច្ចរិតឬទាក់ទាញចំណាប់អារម្មណ៍បំភ័ន្តដល់សាធារណជន។
គួរបញ្ជាក់ថា កាលពីថ្ងៃទី៥ និងទី៦ ខែឧសភា សប្តាហ៍មុននេះ រាជធានី-ខេត្តមួយចំនួននៅកម្ពុជា បានជួបនូវបាតុភូតខ្យល់ពីរប៉ះគ្នាដែលគេកម្រឃើញនៅលើតំបន់អាងទន្លេគង្គ បានកើតឡើង ដោយបានបង្កឱ្យមានខ្យល់បក់បោកខ្លាំង លាយឡំនឹងភ្លៀងធ្លាក់លាយជាមួយដុំទឹកកកតូចៗ បានបណ្តាលឱ្យផ្ទះសម្បែងរាប់រយខ្នង និងផលដំណាំ រួមនឹងហេដ្ឋារចនាសម្ព័ន្ធមួយចំនួនរងការខូចខាត៕
