ក្រសួងសុខាភិបាល រកឃើញអ្នកឆ្លងជំងឺកូវីដ-១៩ កើនដល់ជាង២០ ០០០នាក់ ក្នុងរយៈពេលជាងមួយឆ្នាំមកនេះ ក្នុងនោះមានអ្នកស្លាប់ជាង១៣០នាក់ និងករណីជាសះស្បើយជាង៨ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១១ ខែឧសភា ឆ្នាំ២០២១ បញ្ជាក់ថា អ្នកឆ្លងជំងឺកូវីដ-១៩ គិតចាប់តាំងពីកម្ពុជាបានរកឃើញករណីឆ្លងដំបូងកាលពីចុងខែមករា ឆ្នាំ២០២០ មកដល់ថ្ងៃម្សិលមិញ បានកើនដល់២០ ២២៣នាក់ ក្នុងនោះមានអ្នកស្លាប់ចំនួន១៣១នាក់ និងអ្នកជាសះស្បើយសរុបចំនួន៨ ១៧០នាក់។
ដោយឡែក អ្នកឆ្លងថ្មីនៅថ្ងៃម្សិលមិញ ក្រសួងថាមានចំនួន៤៨០នាក់ ក្នុងនោះមានករណីនាំចូលពីក្រៅប្រទេសចំនួន១០នាក់ ខណៈអ្នកស្លាប់ថ្មីមានចំនួន៥នាក់។
យោងតាមទំព័រហ្វេសប៊ុកអនុគណៈកម្មការស្រាវជ្រាវជំងឺកូវីដ-១៩ បានឱ្យដឹងដែរថា មានភូមិចំនួន១៦ នៅខណ្ឌចំនួន១១ក្នុងចំណោម១៤ខណ្ឌក្នុងរាជធានីភ្នំពេញ មានករណីឆ្លងជំងឺកូវីដ-១៩ ច្រើនជាងគេ។ អនុគណៈកម្មការស្រាវជ្រាវជំងឺកូវីដ-១៩ ក៏អំពាវនាវឱ្យពលរដ្ឋដែលរស់នៅក្នុងភូមិទាំងនោះ ត្រូវយកចិត្តទុកដាក់និងតាមដានសុខភាពរបស់ខ្លួន ហើយប្រសិនបើមានករណីសង្ស័យ ត្រូវធ្វើការពិគ្រោះយោបល់ជាមួយមន្ត្រីសុខាភិបាល៕