កងរាជអាវុធហត្ថលើផ្ទៃប្រទេស កំពុងបញ្ជូនមន្ត្រីរបស់ខ្លួនទៅបណ្តុះបណ្តាលពីរបៀបនៃការធ្វើតេស្តរហ័សរកជំងឺកូវីដ-១៩ ខណៈបច្ចុប្បន្ន ខ្លួនមានគ្រូពេទ្យតែ២នាក់ប៉ុណ្ណោះដែលកំពុងដំណើរការធ្វើតេស្តរហ័សរកវីរុសកូវីដ-១៩ លើមន្ត្រីអាវុធហត្ថនៅទូទាំងប្រទេស។
គិតត្រឹមថ្ងៃអង្គារនេះ ព្រឹត្តិការណ៍សហគមន៍២០កុម្ភៈ បានសម្លាប់មនុស្សអស់១៣១នាក់ និងឆ្លងទៅមនុស្សជាង១ម៉ឺននាក់ ក្នុងនោះមានទាំងកងកម្លាំងប្រដាប់អាវុធផងដែរ។
នាយកដ្ឋានព័ត៌មាននៃក្រសួងការពារជាតិ បានចុះផ្សាយកាលពីម្សិលមិញថា កងរាជអាវុធហត្ថលើផ្ទៃប្រទេសនឹងធ្វើតេស្តរហ័សរកមេរោគកូវីដ-១៩ ទៅលើកងកម្លាំងកងរាជអាវុធហត្ថក្នុងក្របខណ្ឌទូទាំងប្រទេស ទោះពួកគេបានចាក់វ៉ាក់សាំងហើយក៏ដោយ ដោយចាប់ផ្តើមពីបញ្ជាការដ្ឋានកងរាជអាវុធហត្ថលើផ្ទៃប្រទេសទៅ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍នៅថ្ងៃទី១១ ខែឧសភា ឆ្នាំ២០២១នេះថា ជាគោលការណ៍របស់ថ្នាក់ដឹកនាំ ការធ្វើតេស្តរហ័សនេះ ដើម្បីទប់ស្កាត់ការចម្លងតគ្នារវាងកងកម្លាំងនិងកងកម្លាំង និងពង្រឹងប្រសិទ្ធភាពការងារផង ដោយថា អំឡុងពេលនៃការចុះអនុវត្តវិធានការបិទខ្ទប់ កងកម្លាំងមួយចំនួនបានចុះទៅដល់គោលដៅដែលជាតំបន់ហានិភ័យនៃការឆ្លងជំងឺនេះ។
លោកថា៖ «ដើម្បីកុំឱ្យមានមន្ទិលសង្ស័យ [ថាកើតកូវីដ-១៩] និងក៏ជាការការពារមុនកុំឱ្យជំងឺហ្នឹងឆ្លង គឺដោយសារយើងស្នើបានតេស្តរហ័សហ្នឹងហើយ គឺឯកឧត្តមនាយឧត្តមសេនីយ៍ [សៅ សុខា] សម្រេចឱ្យកងរាជអាវុធហត្ថទាំងមូលដែលពាក់ព័ន្ធ ទាំងអ្នកនៅក្រៅ ទាំងអ្នកប្រតិបត្តិការ ត្រូវពិនិត្យទាំងអស់ ចៀសវាងនៅពេលយើងមិនដឹង យើងចម្លងគ្នាច្រើន និងធ្វើចត្តាឡីស័កនាំឱ្យបាត់បង់កម្លាំង»។
លោកបន្តថា ការធ្វើតេស្តរហ័សតាមរយៈឧបករណ៍រ៉ាបពីតេស្ត (Rapid Antigen test Covid-19) នេះ មិនទាន់អាចកំណត់បានថានឹងប្រើរយៈពេលប៉ុន្មាននោះទេ ដោយថា បច្ចុប្បន្នមានគ្រូពេទ្យតែ២នាក់ប៉ុណ្ណោះធ្វើកិច្ចការនេះ។
លោកថា៖ «កម្លាំងដែលធ្វើហ្នឹង [គ្រូពេទ្យ] គឺមានតែពីររូប អ៊ីចឹងធ្វើបានតែម្តងពីរនាក់ៗ។ អ៊ីចឹងក្នុង១ថ្ងៃ អាចបានត្រឹម២០ ទៅ៣០នាក់ ឬក៏៤០ប៉ុណ្ណឹង»។
បើតាមមន្ត្រីរូបនេះ ឧបករណ៍តេស្តរហ័សនេះ គ្រូពេទ្យប្រើពេលត្រឹម១៥នាទី វានឹងប្រាប់លទ្ធផល តែថា ការធ្វើតេស្ត២ថ្ងៃមកនេះមិនទាន់រកឃើញថាមានមន្ត្រីជាន់ខ្ពស់ណាមានវិជ្ជមានកូវីដ-១៩ នៅឡើយទេ។
យ៉ាងនេះក្តី លោកថា ជាដំណោះស្រាយ ស្ថាប័នបានបញ្ជូនមន្ត្រីមួយចំនួនទៅរៀនបន្ថែមហើយ ដើម្បីជួយកិច្ចការនេះ។
អ្នកនាំពាក្យក្រសួងការពារជាតិ លោក ឈុំ សុជាតិ ថ្លែងថា មិនទាន់ទទួលបានព័ត៌មានពីថ្នាក់ដឹកនាំជុំវិញការធ្វើតេស្តរហ័សនេះ សម្រាប់តាមដានទៅលើកងកម្លាំងនៅទូទាំងប្រទេសដូចកងរាជអាវុធហត្ថលើផ្ទៃប្រទេសនៅឡើយទេ។
វីអូឌី មិនអាចសុំការអត្ថាធិប្បាយពីអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ជុំវិញករណីឆ្លងជំងឺកូវីដ-១៩ ទៅលើមន្ត្រីនគរបាលជាតិនៅឡើយ។
ប៉ុន្តែលោកបានប្រាប់សារព័ត៌មានមួយចំនួនកាលពីថ្ងៃម្សិលមិញថា កងកម្លាំងនគរបាលជាតិផ្នែកអន្តរាគមន៍ប្រមាណ៨០នាក់ ជាក្រុមប្រចាំការនៅតំបន់ឆ្លងធ្ងន់ធ្ងរឬតំបន់ក្រហម បានឆ្លងជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈនេះ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មើលឃើញថា វិធានការធ្វើតេស្តរហ័សលើមន្ត្រី ដើម្បីស្វែងរកមេរោគកូវីដ-១៩ ជាប្រចាំ រួមទាំងការផ្តល់វ៉ាក់សាំង នឹងជួយកាត់បន្ថយបន្ទុករបស់ក្រសួងសុខាភិបាល បើវិធានការនោះដំណើរការទៅដោយមានតម្លាភាពនិងគុណភាព ខណៈពួកគេកំពុងជាប់បេសកកម្មនៅតំបន់ហានិភ័យនៅឡើយនោះ។
លោកថា៖ «ឥលូវយើងដឹងថា បងប្អូនទាហានហ្នឹងត្រូវបានគេផ្តល់ការងារក្នុងការជ្រោមជ្រែងក្នុងការទប់ស្កាត់ ចាក់វ៉ាក់សាំងនៅតំបន់ក្រហម ដល់អ៊ីចឹងគាត់មានលទ្ធភាពឆ្លងហ្នឹងខ្ពស់ ហើយហានិភ័យឆ្លងមកដល់ខ្លួនគាត់ដែលអនុវត្តការងារហ្នឹងក៏ខ្ពស់ដែរ។ អ៊ីចឹងគាត់ត្រូវការទាមទារធ្វើតេស្ត ហើយជាការល្អបំផុត គឺចាក់វ៉ាក់សាំងគ្រប់គ្នា ដើម្បីការពារខ្លួនគាត់នៅពេលដែលគាត់ចុះធ្វើការងារប្រចាំថ្ងៃហ្នឹង»។
ក្រសួងសុខាភិបាល កាលពីថ្ងៃទី២២ ខែមេសា បានអនុញ្ញាតឱ្យអ្នកផ្ដល់សេវាសុខាភិបាលឯកជនស្របច្បាប់ ប្រើប្រាស់នូវឧបករណ៍ធ្វើតេស្តរហ័ស (Rapid Antigen test Covid-19) ដើម្បីធ្វើតេស្តរកវីរុសកូវីដ-១៩ ដោយថា ជាការឆ្លើយតបតាមសំណើរបស់សមាគមអ្នកផ្ដល់សេវាសុខាភិបាលឯកជននៅកម្ពុជា។
បន្ថែមពីនេះ តាមរយៈលិខិតណែនាំចុះថ្ងៃទី៨ ខែឧសភា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានណែនាំថា៖ «ដើម្បីបង្កើនប្រសិទ្ធភាព និងធានាឱ្យមានប្រក្រតីភាពក្នុងការផ្តល់សេវាសុខាភិបាលនៅតាមមន្ទីរពេទ្យសាធារណៈ ក្រសួងសុំធ្វើការណែនាំក្រើនរំឭកទៅដល់មន្ទីរពេទ្យទាំងនោះ ត្រូវធ្វើតេស្តរហ័សរកអង់ទីហ្សែនកូវីដ-១៩ ដើម្បីធ្វើការញែកអ្នកជំងឺ ប្រសិនបើចាំបាច់»។
ដោយឡែក រដ្ឋមន្ត្រីក្រសួងការពារជាតិ លោក ទៀ បាញ់ បានណែនាំតាមរយៈសារជាសំឡេងនៅថ្ងៃនេះ ឱ្យក្រុមការងារដែលកំពុងចាក់វ៉ាក់សាំងនៅតំបន់ក្រហម នៅខណ្ឌមួយចំនួនក្នុងរាជធានីភ្នំពេញ ឱ្យទប់ស្កាត់បុគ្គលមួយចំនួនដែលដឹងថា ខ្លួនឆ្លងជំងឺកូវីដ-១៩ហើយនៅតែទៅទទួលវ៉ាក់សាំងទៀត ដែលលោកថា នេះជាមហន្ដរាយដល់យុទ្ធនាការចាក់វ៉ាក់សាំង របស់ជាតិ ដែលត្រូវទប់ស្កាត់ជាបន្ទាន់។
លោកថា៖ «ព្រោះនេះជាមហន្តរាយដល់អ្នកប្រតិបត្តិការទាំងឡាយ ធ្វើឱ្យខូចការងារធំតែម្តង! សុំគ្រប់គ្នាទាំងអស់យកចិត្តទុកដាក់ ហើយត្រូវដំណើរការរឿងនេះឱ្យបានម៉ត់ចត់ជាទីបំផុត»៕