ក្រុមអង្គការសមាគមបានទាមទារទៅរដ្ឋាភិបាលឱ្យលុបចោលវិញនូវការដាក់លក្ខខណ្ឌចាក់វ៉ាក់សាំងសម្រាប់ការប្រឡងជ្រើសរើសមន្ត្រីចូលក្របខណ្ឌរដ្ឋ ដោយថា ការកំណត់បែបនេះនឹងធ្វើឱ្យប៉ះពាល់ដល់ធនធានមនុស្សធ្ងន់ធ្ងរ ខណៈរដ្ឋាភិបាលទើបនឹងបានផ្តល់វ៉ាក់សាំងត្រឹមជាង១លាននាក់ ក្នុងចំណោមពលរដ្ឋជិត១៦លាននាក់នោះ។
កាលពីថ្ងៃទី៤ ខែឧសភា ឆ្នាំ២០២១ ក្រសួងមុខងារសាធារណៈ បានចេញសេចក្តីជូនដំណឹងមួយថា យោងតាមអនុសាសន៍របស់រដ្ឋាភិបាល គណៈកម្មការប្រឡងប្រជែងជ្រើសរើសសិស្ស-និស្សិត និងមន្ត្រីរាជការស៊ីវិល ចូលបម្រើការងារក្នុងក្របខណ្ឌក្រសួងមុខងារសាធារណៈ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ជាដើម សម្រាប់ឆ្នាំ២០២១នេះ បេក្ខជនត្រូវធានាថា បានចាក់វ៉ាក់សាំងទាំង២ដូសរួចរាល់។
ក្រសួងបញ្ជាក់ទៀតថា នៅថ្ងៃប្រឡង បេក្ខជនទាំងអស់ត្រូវយកមកភ្ជាប់ជាមួយកាតសម្គាល់ដែលសាម៉ីខ្លួនបានទទួលវ៉ាក់សាំង ក្នុងករណីដែលបេក្ខជនមិនអាចទទួលវ៉ាក់សាំង ត្រូវមានលិខិតបញ្ជាក់ផ្លូវការពីមន្ទីរសុខាភិបាល។ ក្រសួងបន្តថា ក្នុងករណីបេក្ខជនមិនមានបណ្ណឬលិខិតបញ្ជាក់ គណៈកម្មការនឹងមិនឱ្យបេក្ខជននោះប្រឡងឡើយ។
អង្គការសមាគមចំនួន២០ បាននិយាយក្នុងសេចក្តីថ្លែងការណ៍រួមនៅថ្ងៃទី១៣ ខែឧសភា ឆ្នាំ២០២១ ថាពួកគេមានកង្វល់យ៉ាងខ្លាំងចំពោះសេចក្តីជូនដំណឹងរបស់ក្រសួងមុខងារសាធារណៈ ដែលតម្រូវឱ្យបេក្ខជនបានចាក់វ៉ាក់សាំងរួចប៉ុណ្ណោះ ទើបអាចដាក់ពាក្យស្នើសុំសិទ្ធិប្រឡងចូលបម្រើការងារក្នុងក្របខណ្ឌក្រសួងស្ថាប័នរដ្ឋចំនួន៦បាន។
អង្គការទាំងនោះថា ការកំណត់បែបនេះនឹង «អាចបង្កឱ្យមានផលប៉ះពាល់យ៉ាងធ្ងន់ធ្ងរក្នុងដំណើការជ្រើសរើសធនធានមនុស្ស ឱ្យបានចូលរួមប្រកួតប្រជែងប្រកបដោយសេរីភាព តម្លាភាព សមភាព គណនេយ្យភាព យុត្តិធម៌ និងផ្ទុយពីរដ្ឋធម្មនុញ្ញព្រះរាជាណាចក្រកម្ពុជា ដែលបានចែងពីភាពស្មើគ្នាចំពោះមុខច្បាប់ត្រង់មាត្រា៣១ និងមាត្រា៣៦ ត្រង់កថាខណ្ឌទីមួយដែលបានចែងអំពីសិទ្ធិរបស់ប្រជាពលរដ្ឋខ្មែរទាំងពីរភេទ សម្រាប់ការជ្រើសរើសមុខរបរស្របតាមសមត្ថភាពខ្លួន»។
ក្រុមអង្គការ-សមាគមដែលមានទាំងអង្គការឃ្លាំមើលការបោះឆ្នោតខុមហ្វ្រែល មជ្ឈមណ្ឌលសិទ្ធិមនុស្សកម្ពុជា និងវិទ្យាស្ថានប្រជាធិបតេយ្យកម្ពុជា ផងនោះ បានស្នើសុំឱ្យរាជរដ្ឋាភិបាលលុបចោលនូវលក្ខខណ្ឌកំណត់នេះ ដើម្បីបង្កើតបរិយាកាសប្រកួតប្រជែងប្រកបដោយបរិយាប័ន្ន។
ក្រុមអង្គទាំងនោះបានគូសបញ្ជាក់ថា គិតត្រឹមថ្ងៃទី១០ ខែឧសភា ឆ្នាំ២០២១នេះ ប្រទេសកម្ពុជាទើបទទួលបានវ៉ាក់សាំងប្រឆាំងកូវីដ-១៩ ចំនួនជាង៤លានដូស (៤ ០២៤ ០០០ដូស) ហើយបានចាក់ជូនប្រជាពលរដ្ឋជាង១លាន៨សែននាក់ (១ ៨៩៩ ៩៨៨នាក់) តាមគោលការណ៍ស្ម័គ្រចិត្ត។ ក្នុងចំណោមប្រជាពលរដ្ឋដែលទទួលបានវ៉ាក់សាំងទាំងអស់ មានពលរដ្ឋជាង១លាន១សែននាក់ប៉ុណ្ណោះ (១ ១១៧ ២៨០នាក់) បានចាក់វ៉ាក់សាំងដូសទី២រួចរាល់។
ប្រធានសមាគមបណ្តាញយុវជនកម្ពុជា លោក អ៊ុល វ៉ាន់ យល់ថា ការដាក់លក្ខខណ្ឌរបស់ក្រសួង ជាការរឹតត្បិតសិទ្ធិសេរីភាពរបស់បេក្ខជនឬយុវជនក្នុងការទទួលបានឱកាសប្រកួតប្រជែងចូលរួមជាមន្ត្រីរាជការសាធារណៈ ខណៈដែលរដ្ឋាភិបាលពុំទាន់មានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋទូទៅនៅឡើយ។
លោកបន្ថែមថា៖ «យើងមើលឃើញថា ប្រជាពលរដ្ឋជាច្រើនទៀតដែលគាត់មិនទាន់ទទួលបានការចាក់វ៉ាក់សាំងហើយ ជាហេតុធ្វើឱ្យលក្ខខណ្ឌនៃការតម្រូវឱ្យបេក្ខជនដែលចុះឈ្មោះប្រឡងត្រូវតែទទួលបានការវ៉ាក់សាំងនោះ វាគឺជាបញ្ហាឬក៏ឧបសគ្គសម្រាប់យុវជន ក៏ដូចជាបេក្ខជន ដែលគាត់មានគោលបំណងចង់ចូលរួមប្រកួតប្រជែងនៅពេលខាងមុខនេះ។ អ៊ីចឹងយើងស្នើឱ្យខាងរដ្ឋាភិបាលលុបចោលនូវលក្ខខណ្ឌហ្នឹង ហើយរដ្ឋាភិបាលត្រូវផ្តល់ការគាំទ្រ និងផ្តល់ឱកាសប្រកបដោយតម្លាភាព ក៏ដូចជាយុត្តិធម៌សម្រាប់យុវជនឬបេក្ខជនទាំងហ្នឹង»។
បេក្ខជនម្នាក់ដែលដាក់ពាក្យសុំប្រឡងចូលបម្រើការងារនៅស្ថាប័នរដ្ឋមួយ លោក ពីង នួន ប្រាប់ វីអូឌី ថាលោកបានដាក់ពាក្យសុំប្រឡងរួចហើយ និងបានចំណាយប្រាក់៣០ ០០០រៀលសម្រាប់ធ្វើឯកសារផ្សេងៗដើម្បីបានចូលប្រឡង។ តែយ៉ាងណា លោកថា រូបលោកនៅមិនទាន់បានទទួលការចាក់វ៉ាក់សាំងនៅឡើយ បើទោះជារូបលោកបានដាក់ពាក្យទៅឃុំ-សង្កាត់រួចយូរហើយ ដើម្បីស្នើសុំចាក់វ៉ាក់សាំងនេះ។
លោកបន្ថែមថា៖ «មិនមែនយើងមិនចង់ចាក់វ៉ាក់សាំងទេ ប៉ុន្តែគោលការណ៍ឥលូវគេសម្រុកចាក់នៅភ្នំពេញ ចុះបើនិស្សិតបេក្ខជនដែលគាត់នៅតាមខេត្តមិនទាន់បានចាក់ គាត់ធ្វើម៉េចបានប្រឡងក្នុងករណីគាត់បានដាក់ពាក្យរួចហើយ។ ក្នុងករណីនេះ ខ្ញុំគ្រាន់តែស្នើក្រសួងសាម៉ីបង្វិលលុយឱ្យគាត់វិញទៅ ឬក៏ទុកឈ្មោះឱ្យគាត់អាចប្រឡងនៅឆ្នាំក្រោយទៀតក៏បាន»។
យុវតីម្នាក់ឈ្មោះ Julie Wang លើកឡើងក្នុងបណ្តាញសង្គមហ្វេសប៊ុកថា គាត់ជាបេក្ខភាពត្រៀមប្រឡងចូលបម្រើការងារមន្ត្រីរាជការសាធារណៈ រយៈពេល២ឆ្នាំមកហើយ ហើយកញ្ញាក៏ពុំទាន់បានការចាក់វ៉ាក់សាំងការពារវីរុសកូវីដ-១៩ នៅឡើយទេ។ កញ្ញាបន្តថា គាត់បានចុះឈ្មោះនៅសាលាសង្កាត់ និងនៅតាមមណ្ឌលផង ដើម្បីចាក់វ៉ាក់សាំង ប៉ុន្តែរហូតមកដល់ពេលនេះ មានរយៈពេលជាង១ខែហើយ នៅពុំទាន់មានការឆ្លើយតបនៅឡើយ។
កញ្ញាសសេរថា៖ «សូមជម្រាបជូនថ្នាក់ដឹកនាំក្រសួង មេត្តាពិនិត្យលទ្ធភាពរបស់ក្រសួងសុខាភិបាល និងគណៈកម្មការចាក់វ៉ាក់សាំង ថាតើប្រជាជនប៉ុន្មានភាគរយហើយបានទទួលការចាក់វ៉ាក់សាំង មុននឹងសម្រេចចេញនូវកាលបរិច្ឆេទប្រឡង»។
រដ្ឋមន្ត្រីក្រសួងមុខងារសាធារណៈ លោក ព្រំ សុខា សុំមិនធ្វើអត្ថាធិប្បាយលើបញ្ហានេះទេ ដោយលោករុញឱ្យទៅសួររដ្ឋលេខាធិការប្រចាំការ លោក យក់ ប៊ុនណា ដែលធ្វើកិច្ចការនេះ។ ប៉ុន្តែ វីអូឌី មិនអាចទាក់ទងបានឡើយទេ នៅថ្ងៃទី១៣ ខែឧសភានេះ។
យ៉ាងណា កាលពីថ្ងៃទី៧ ខែឧសភា ឆ្នាំ២០២១ លោកនាយករដ្ឋមន្ត្រី ហ៊ុន សែន បានណែនាំមន្ត្រីពាក់ព័ន្ធមួយចំនួន កុំឱ្យយកលក្ខខណ្ឌចាក់វ៉ាក់សាំងធ្វើការទប់ស្កាត់មិនឱ្យកម្មករចូលធ្វើការ អំឡុងពេលដែលរដ្ឋាភិបាលបើកឱ្យដំណើរការឡើងវិញក្រោយការបិទខ្ទប់ជាង៣សប្តាហ៍មកនោះ។
លោកថា៖ «លក្ខខណ្ឌបែបនេះមិនទាន់អាចអនុវត្តបាននោះឡើយ ព្រោះកម្ពុជាកំពុងស្ថិតក្នុងដំណើរការចាក់វ៉ាក់សាំង ហើយចាក់បានកម្រិតតិចតួចនៅឡើយ។ ដូច្នេះ អនុវត្តនូវលក្ខខណ្ឌវ៉ាក់សាំងកាតព្វកិច្ចមិនបាននោះឡើយ»៕
