ពលករខ្មែរដែលឆ្លងជំងឺកូវីដ-១៩ និងអ្នកកំពុងធ្វើការនៅខេត្តសាមុតប្រាកាន ប្រទេសថៃ ស្នើដល់ស្ថានទូតកម្ពុជាប្រចាំប្រទេសមួយនេះ ជួយអន្តរាគមន៍ដោះស្រាយបញ្ហាជីវភាពក្នុងអំឡុងពេលមានការរាលដាលជំងឺកូវីដ-១៩។
លោក នួន សារ៉េន អះអាងជាពលករម្នាក់ដែលកំពុងរស់នៅនិងធ្វើការក្នុងរោងចក្រត្រីខមួយកន្លែង នាខេត្តសាមុតប្រាកាន បានប្រាប់ វីអូឌី តាមទូរសព្ទពីប្រទេសថៃ កាលពីថ្ងៃម្សិលមិញថា នៅក្នុងតំបន់ដែលលោករស់នៅ មានការឆ្លងរាលដាលខ្លាំងនូវជំងឺកូវីដ-១៩ ក្នុងនោះ រូបលោកនិងប្រពន្ធ ក៏បានឆ្លងជំងឺផ្លូវដង្ហើមមួយនេះដែរ។
លោកបន្តថា អំឡុងពេលសម្រាកព្យាបាលជំងឺកូវីដ-១៩នេះ គ្រួសាររបស់លោកពុំមានប្រាក់ចំណូលនោះទេ ដែលករណីនេះ លោកស្នើដល់ស្ថានទូតកម្ពុជាប្រចាំប្រទេសថៃ ជួយអន្តរាគមន៍ដោះស្រាយជីវភាពនិងសម្រួលបន្ទុកផ្សេងទៀតដល់ពួកគាត់ផង។
លោក សារ៉េន និយាយថា៖ «សំណូមពរដល់រដ្ឋាភិបាលខ្មែរយើង និងស្ថានទូតខ្មែរប្រចាំប្រទេសថៃ សូមជួយមានដំណោះស្រាយបញ្ហាសម្រាប់ពលករខ្មែរចំណាកស្រុកដែលកំពុងជាប់ជាមួយកូវីដផ្ទុះខ្លាំងក្នុងប្រទេសថៃ»។
បុរសមានដើមកំណើតមកពីស្រុកកំចាយមារ ខេត្តព្រៃវែង រូបនេះ បន្ដថា តំបន់ដែលលោករស់នៅនិងធ្វើការនេះមានពលករខ្មែរជាច្រើនដែលប្រឈមបញ្ហាជីវភាព ខណៈពួកគាត់ក៏មិនទាន់ទទួលបានដំណោះស្រាយណាមួយពីខាងរោងចក្រនៅឡើយ។
ពលករខ្មែរម្នាក់ទៀត លោក កូយ បូរ៉ា វ័យ៣៤ឆ្នាំ ដែលមិនមានការងារធ្វើក្រោយរោងចក្រត្រីខនៅខេត្តសាមុតប្រាកាន បានផ្អាកដំណើរការនោះ បានឱ្យដឹងដែរថា តាំងពីរោងចក្របិទជាបណ្ដោះអាសន្នកាលពីថ្ងៃសុក្រសប្តាហ៍មុន ដោយសារមានការឆ្លងរាលដាលជំងឺកូវីដ-១៩មក លោកទិញតែអង្ករនិងស៊ុតមាន់-ទាសម្រាប់ហូបចុកតែប៉ុណ្ណោះ។
ពលករដែលមានស្រុកកំណើតនៅខេត្តកំពង់ធំរូបនេះ ឱ្យដឹងទៀតថា រូបលោកធ្វើការនៅរោងចក្រត្រីខនេះរយៈពេល៥ឆ្នាំមកហើយ ដែលធ្វើឱ្យលោកនៅសល់លុយខ្លះ និងលុយធានារ៉ាប់រងក្នុងមួយថ្ងៃចំនួន១៦០បាត ឬស្មើប្រមាណ២០ ០០០រៀល សម្រាប់ផ្គត់ផ្គង់ជីវភាពក្នុងអំឡុងពេលផ្ទុះជំងឺកូវីដ-១៩។ ប៉ុន្តែលោកមើលឃើញថា ពលករដែលទើបទៅធ្វើការងារនៅទីនោះ កំពុងប្រឈមបញ្ហាជីវភាពខ្លាំង។
លោក បូរ៉ា និយាយថា៖ «ដល់ពេលបិទអ៊ីចឹង អត់មានអីផង មានតែសន្សំលុយ អត់ហ៊ានទិញអីផង។ ទិញតែអង្ករ ទុកហូប ហើយនិងពងមាន់ ពងទា ហើយនិងត្រីខ។ អ្នកខ្លះគាត់មកថ្មី អត់មានលុយចាយអ៊ីចឹង។ ហើយអ្នកមកយូរអ៊ីចឹង គេមានលុយចាយ គេមានលុយនៅក្នុងខ្លួន។ ពិបាកសម្រាប់អ្នកទើបមក ហើយអ្នកអត់មានលុយ អ៊ីចឹងគាត់អត់មានអីហូបទេ ដូចប្អូនៗអ៊ីចឹងថាបងអើយដាច់បាយហើយ»។
លោក កូយ បូរ៉ា និយាយទៀតថា មកទល់ពេលនេះ ខាងភាគីរោងចក្រនិងរដ្ឋាភិបាលថៃនៅមិនទាន់ជួយអ្វីដល់ពលករ អំឡុងនៃការឆ្លងរីករាលដាលជំងឺកូវីដ-១៩នេះនៅឡើយទេ។ ដោយឡែក កិច្ចអន្តរាគមន៍ពីភាគីកម្ពុជាជួយដល់ពលករខ្មែរ លោកថា ក៏នៅមិនទាន់មាននោះដែរ។
អ្នកនាំពាក្យក្រសួងការបរទេស លោក កុយ គួង មានប្រសាសន៍ថា លោកនឹងទាក់ទងទៅកាន់ស្ថានទូតកម្ពុជាប្រចាំប្រទេសថៃ ដើម្បីស្រាវជ្រាវនិងដោះស្រាយជុំវិញករណីនេះ។
លោកមានប្រសាសន៍ថា៖ «ខ្ញុំកំពុងសាកសួរទៅស្ថានទូតខ្មែរ ដើម្បីបញ្ជាក់»។
មន្រ្តីគម្រោងនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំប្រទេសថៃ លោក លឹង សុផុន បានឱ្យដឹងថា ក្នុងរោងចក្រត្រីខកំប៉ុង នៅខេត្តសាមុតប្រាកាន មានពលករសរុបជាង៨០០នាក់ ក្នុងនោះ មានពលករខ្មែរជាង៤០០នាក់កំពុងធ្វើការនៅទីនោះ។
លោកអះអាងថា កាលពីថ្ងៃទី១៤ ខែឧសភានេះ លោកទទួលបានដំណឹងថា មានករណីពលករខ្មែរម្នាក់ដែលធ្វើការនៅទីនោះបានស្លាប់ដោយសារជំងឺកូវីដ-១៩។
ករណីនេះ លោកជំរុញឱ្យស្ថានទូតកម្ពុជាប្រចាំប្រទេសថៃ ជួយសម្របសម្រួលលើការព្យាបាលនិងការរស់នៅរបស់ពលករខ្មែរដែលធ្វើការនៅប្រទេសថៃ អំឡុងពេលមានការឆ្លងរាលដាលជំងឺកូវីដ-១៩នេះ។
លោកមានប្រសាសន៍ថា៖ «ទាក់ទងពលករខ្មែរដែលឆ្លង [ជំងឺកូវីដ-១៩] សូមឱ្យមន្រ្តីរដ្ឋាភិបាលនិងមន្រ្តីពាក់ព័ន្ធដែលជាស្ថានទូត កុងស៊ុលប្រចាំប្រទេសថៃ គួរណាស់តែជួយដើម្បីឱ្យពលករខ្មែរយើងបានការព្យាបាលឱ្យបានត្រឹមត្រូវផង»។
សារព័ត៌មានរបស់ថៃ The Nation ដែលបានចុះផ្សាយនៅថ្ងៃទី១៨ ខែឧសភានេះ បានឱ្យដឹងថា កាលពីថ្ងៃម្សិលមិញ ប្រទេសថៃបានរកឃើញចំនួនអ្នកឆ្លងជំងឺកូវីដ-១៩ថ្មីខ្ពស់បំផុតនៅអាស៊ាន ដែលមានចំនួន៩ ៦៣៥នាក់ និងស្លាប់ចំនួន២៥នាក់ ដោយភាគច្រើនជាការឆ្លងក្នុងចង្កោមនៅក្នុងពន្ធនាគារ។
ប្រភពដដែលបន្តថា ករណីឆ្លងជំងឺកូវីដ-១៩សរុបនៅប្រទេសថៃ បានកើនឡើងរហូតដល់ជាង១១ម៉ឺននាក់ (១១១ ០៨២នាក់) ខណៈចំនួនអ្នកស្លាប់សរុបមាន៦១៤នាក់៕
