ក្រុមហ៊ុន YouTube ផ្អាកមិនឱ្យមានការផ្សាយពាណិជ្ជកម្មលើថ្នាល់វីដេអូនៅកម្ពុជា និងនៅប្រទេសជាង៩០ក្នុងពិភពលោក ខណៈក្រុមហ៊ុននេះកំពុងកែសម្រួលគោលការណ៍ផ្សាយពាណិជ្ជកម្ម ដើម្បីធ្វើឱ្យមាតិកាវីដេអូកាន់តែល្អប្រសើរស្របតាមដៃគូពាណិជ្ជកម្មរបស់ខ្លួន។
ក្នុងសេចក្តីប្រកាសព័ត៌មានរបស់ក្រសួងប្រៃសណីយ៍ និងទូរគមនាគមន៍កម្ពុជា បានឱ្យដឹងកាលពីថ្ងៃទី១៧ ខែឧសភា ម្សិលមិញថា ថ្មីៗនេះ ក្រុមហ៊ុន YouTube បានផ្អាកមិនឱ្យមានការផ្សាយពាណិជ្ជកម្មលើថ្នាលវីដេអូនៅកម្ពុជានិងប្រទេសជាង៩០ទៀត ដែលធ្វើឱ្យអ្នកទស្សនាសប្បាយចិត្ត ព្រោះមិនមានការរំខានពីការផ្សាយពាណិជ្ជកម្ម។ ប៉ុន្តែផ្ទុយទៅវិញ អ្នកផលិតមាតិកាចុះផ្សាយក្នុង YouTube មិនអាចរកចំណូលបានទៀតនោះទេ។
ទោះជាបែបនេះក្តី ក្រសួងប្រៃសណីយ៍ និងទូរគមនាគមន៍ បញ្ជាក់ថា ក្រសួងបានជួបពិភាក្សាជាមួយអ្នកតំណាងក្រុមហ៊ុនអំពីការផ្អាករកចំណូលនោះដែរ ប៉ុន្តតំណាងក្រុមហ៊ុន YouTube អះអាងថា ខ្លួនកំពុងកែសម្រួលគោលការណ៍ផ្សាយពាណិជ្ជកម្ម ដើម្បីធ្វើឱ្យមាតិកាវីដេអូកាន់តែល្អប្រសើរ និងតម្រូវឱ្យអ្នកផលិតមាតិកាវីដេអូបំពេញតាមលក្ខខណ្ឌកម្មវិធីភាពជាដៃគូ (YouTube Partner Program) នៅក្នុងប្រទេសដែលជាដៃគូ ទើបអាចរកចំណូលពីការផ្សាយពាណិជ្ជកម្មបាន។
សេចក្តីប្រកាសព័ត៌មានមានខ្លឹមសារថា៖ «ការផ្អាកមិនឱ្យរកចំណូលពីបណ្តាញយូធូបនេះ មិនមែនធ្វើឡើងតែសម្រាប់កម្ពុជាមួយទេ គឺផ្អាកជាង៩០ប្រទេសក្នុងពិភពលោក។ ក្នុងចំណោមជាង៩០ប្រទេសនេះ ការផ្សាយពាណិជ្ជកម្មលើថ្នាលវីដេអូ YouTube នឹងត្រូវផ្តល់ជូនជាបន្តបន្ទាប់ តាមរយៈការទទួលបានកម្មវិធីភាពជាដៃគូ»។
សេចក្តីប្រកាសដដែលបន្តថា ក្រសួងប្រៃសណីយ៍ និងទូរគមនាគមន៍ បានលើកទឹកចិត្តឱ្យមានការផលិតមាតិកាល្អៗ ដោយគោរពតាមគោលការណ៍ កម្មសិទ្ធិបញ្ញា ប្រកបដោយគុណភាព គំនិតច្នៃប្រឌិត និងវិជ្ជាជីវៈ ដើម្បីផ្តល់អត្ថប្រយោជន៍ និងពុទ្ធិដល់សាធារណជន ខណៈក្រសួងក៏នឹងបន្តពិភាក្សាជាមួយអ្នកតំណាងក្រុមហ៊ុននេះក្នុងការដោះស្រាយកិច្ចការងារនេះឱ្យបានឆាប់រហ័សផងដែរ៕