មន្ត្រីពាក់ព័ន្ធនៅខេត្តកំពង់ឆ្នាំង កំពុងប្រមូលសំណាកកម្មករមួយចំនួនដែលធ្វើការនៅរោងចក្រមួយក្នុងស្រុកកំពង់ត្រឡាច ដើម្បីយកទៅពិនិត្យរកវីរុសកូវីដ-១៩ និងតម្រូវឱ្យធ្វើចត្តាឡីស័ក ក្រោយពីបានរកឃើញកម្មករជាង២០នាក់ឆ្លងជំងឺកូវីដ-១៩។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ឆ្នាំង លោក ពៅ ស៊ីថា ប្រាប់ វីអូឌី នៅថ្ងៃពុធនេះថា កាលពីថ្ងៃទី១៧ ខែឧសភា ក្រុមគ្រូពេទ្យបានយកសំណាកកម្មករ៥៥នាក់ទៅពិនិត្យរកជំងឺកូវីដ-១៩ ក្រោយពួកគេបានជួបគ្រោះថ្នាក់ចរាចរណ៍ ហើយទៅសម្រាកព្យាបាលនៅតាមមន្ទីរពេទ្យផ្សេងៗគ្នា។ លោកបន្តថា ក្នុងចំណោមកម្មករទាំង៥៥នាក់ដែលបានយកសំណាកទៅពិនិត្យនោះ គឺរកឃើញកម្មករចំនួន២១នាក់មានវិជ្ជមានជំងឺកូវីដ-១៩។
លោកបន្តទៀតថា កម្មករដែលឆ្លងជំងឺកូវីដ-១៩ ទាំង២១នាក់នោះ ធ្វើការនៅរោងចក្រ ហីរ៉ាយហ្សិន អៅដរ ខេមបូឌា (HORIZON OUTDOOR Cambodia Co.,Ltd) នៅភូមិផ្សារត្រាច ឃុំលង្វែក ស្រុកកំពង់ត្រឡាច ហើយបច្ចុប្បន្ន ក្រុមគ្រូពេទ្យនិងអាជ្ញាធរកំពុងស្រាវជ្រាវរកអ្នកពាក់ព័ន្ធ ដើម្បីយកសំណាកទៅពិនិត្យនិងតម្រូវឱ្យធ្វើចត្តាឡីស័ក។
លោក ពៅ ស៊ីថា បន្តថា បើទោះបីជារោងចក្រមួយនេះបានផ្ទុះជំងឺកូវីដ-១៩ក៏ដោយ ប៉ុន្តែអាជ្ញាធរមិនទាន់ផ្អាកដំណើរការអាជីវកម្មរោងចក្រទាំងស្រុងនៅឡើយទេ គឺផ្អាកតែតាមផ្នែកដែលពាក់ព័ន្ធប៉ុណ្ណោះ។
លោកបន្ថែមថា៖ «គោលដៅរបស់យើង គឺអនុវត្តទៅតាមរដ្ឋាភិបាលនិងក្រសួងសុខាភិបាល ធ្វើយ៉ាងណាកុំឱ្យវាបន្តរីករាលដាល ដោយខិតខំទប់ស្កាត់ ដោយដឹងហើយយើងត្រូវមានវិធានការព្យាបាលពួកគាត់ ឱ្យគាត់ធ្វើចត្តាឡីស័ក និងយកសំណាកពួកគាត់ដែលពាក់ព័ន្ធទៅពិនិត្យបន្ថែម»។
បើតាមប្រធានមន្ទីរការងាររូបនេះ រោងចក្រ ហីរ៉ាយហ្សិន ជារោងចក្រផលិតកាបូបនិងសម្លៀកបំពាក់ ដែលមានកម្មករកំពុងធ្វើការសរុបប្រហែល៩ ០០០នាក់។
ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន មានប្រសាសន៍ថា ក្រុមគ្រូពេទ្យនិងអាជ្ញាធរពាក់ព័ន្ធកំពុងតាមដានស្ថានភាពយ៉ាងយកចិត្តទុកដាក់លើករណីនេះ ហើយប្រសិនបើពិនិត្យឃើញមានការឆ្លងច្រើន នឹងតម្រូវឱ្យរោងចក្រផ្អាកដំណើរការអាជីវកម្មបណ្តោះអាសន្ន។
លោក ប្រាក់ វ៉ុន បន្តថា កម្មករដែលវិជ្ជមានជំងឺកូវីដ-១៩ ទាំង២១នាក់ កំពុងសម្រាកព្យាបាលនៅមណ្ឌលព្យាបាលស្រុកកំពង់ត្រឡាច ខណៈអ្នកពាក់ព័ន្ធដែលជិះរថយន្តទៅធ្វើការជាមួយគ្នា ត្រូវបានដាក់ឱ្យធ្វើចត្តាឡីស័ក។
លោកបន្ថែមថា៖ «ជាលក្ខខណ្ឌបច្ចេកទេស គឺខាងយើងកំពុងតែពិនិត្យយ៉ាងល្អិតល្អន់ ហើយយើងកំពុងតែពិនិត្យលើស្ថានភាពហ្នឹងសិន យើងមិនទាន់ផ្អាកដំណើរការរោងចក្រនៅឡើយទេ»។
វីអូឌី មិនអាចសុំការបញ្ជាក់បន្ថែមពីតំណាងរោងចក្របានទេ ពាក់ព័ន្ធករណីនេះ។
ប្រធានសហភាពការងារកម្ពុជា លោក អាត់ ធន់ ធ្លាប់មានប្រសាសន៍ថា ប្រសិនបើរោងចក្រណាមួយសង្ស័យថា កម្មករកើតជំងឺកូវីដ-១៩ ឬឆ្លងជំងឺកូវីដ-១៩ អាជ្ញាធរពាក់ព័ន្ធគួរតែផ្អាកដំណើរការអាជីវកម្មរោងចក្រនោះបណ្ដោះអាសន្ន ហើយខិតខំរកវិធីឬជំរុញឱ្យមានការអនុវត្តវិធានការរបស់ក្រសួងសុខាភិបាលខ្ជាប់ខ្ជួន។
លោកបន្ថែមថា៖ «ប្រសិនជាអាច នៅពេលដែលសង្ស័យកម្មករណាម្នាក់ឆ្លងជំងឺកូវីដ អាជ្ញាធរគួរតែឱ្យរោងចក្រនោះផ្អាកសិនក៏ល្អដែរ ដើម្បីកុំឱ្យមានការឆ្លងរាលដាល ឬមានមធ្យោបាយអ្វីផ្សេងទៀតដូចជា ការណែនាំឱ្យពួកគាត់អាចរក្សាគម្លាត អនុវត្តឱ្យបានជាប់នូវវិធានការក្រសួងសុខាភិបាល»។
អ្នកគ្រប់គ្រងកម្មវិធីការងារនៅមជ្ឈមណ្ឌលសម័្ពន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ ធ្លាប់ជំរុញឱ្យរដ្ឋាភិបាលពង្រឹងការយកចិត្តទុកដាក់បន្ថែមទៀត ចំពោះកម្មករជាប់ធ្វើចត្តាឡីស័កនិងកម្មករដែលកំពុងសម្រាកព្យាបាលដោយសារជំងឺកូវីដ-១៩។ លោកក៏បានជំរុញដល់និយោជក ត្រូវផ្តល់ប្រាក់ឈ្នួលពេញទៅដល់កម្មករ ខណៈពួកគេជាប់ធ្វើចត្តាឡីស័ក ដើម្បីការពារការឆ្លងរាលដាលជំងឺមួយនេះ។
លោកបន្ថែមថា៖ «អ៊ីចឹងការដែលឱ្យកម្មករគាត់ឈប់សម្រាក ដើម្បីធ្វើតេស្តរកកូវីដ ហើយដើម្បីទប់ស្កាត់កុំឱ្យមានហានិភ័យនៃការឆ្លងរីករាលដាល អាហ្នឹងវាជាកាតព្វកិច្ចរបស់និយោជក ហើយអាហ្នឹងវាក៏ជាកាតព្វកិច្ចរបស់រដ្ឋាភិបាលដែរ ហើយក៏មិនមានច្បាប់ណាចែងថា ការដែលឱ្យកម្មករឈប់សម្រាកហ្នឹងមិនត្រូវទទួលបានប្រាក់ឈ្នួល អាហ្នឹងវាអត់មានទេ»។
កាលពីថ្ងៃទី២៨ ខែមេសា ឆ្នាំ២០២១ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានឱ្យដឹងថា មានកម្មករនិយោជិត១ ៧០០នាក់ បម្រើការងារនៅរោងចក្រជាង២០០ (២០៦រោងចក្រ) នៅតាមបណ្តារាជធានី-ខេត្ត បានឆ្លងជំងឺកូវីដ-១៩ ប៉ុន្តែរហូតមកទល់ពេលនេះ ក្រសួងនៅពុំទាន់បង្ហាញតួលេខថ្មីស្តីពីការឆ្លងជំងឺសកលមួយនេះក្នុងចំណោមកម្មករទៀតនៅឡើយទេ៕
