ព្រះសង្ឃនិងពលរដ្ឋអះអាងថា អាស្រមមួយកន្លែងស្ថិតក្នុងស្រុកគងពិសី ខេត្តកំពង់ស្ពឺ កំពុងរងការចាក់ដីទន្ទ្រានយកធ្វើកម្មសិទ្ធិពីសំណាក់បុគ្គលឯកជន ដោយពុំមានការទប់ស្កាត់ពីអាជ្ញាធរពាក់ព័ន្ធឡើយ។
ព្រះគ្រូចៅអធិការនៅអាស្រមសុវណ្ណគិរីទីទុយ ព្រះតេជគុណ ភឹម បញ្ចៈរួស មានសង្ឃដីកាប្រាប់ វីអូឌី នៅថ្ងៃព្រហស្បតិ៍នេះថា អាស្រមសុវណ្ណគិរីទីទុយ ស្ថិតនៅភូមិស្រែមាន់ ឃុំស្រង់ ស្រុកគងពិសី ត្រូវបានអ្នកមានលុយមានអំណាចរំលោភយក ប៉ុន្តែព្រះអង្គមិនបានស្គាល់ឈ្មោះនិងតួនាទីបុគ្គលរូបនោះឡើយ។ ព្រះអង្គបន្តថា បុគ្គលរូបនោះបានដាក់គ្រឿងចក្រឈូសឆាយនិងចាក់ដីចូលបរិវេណ ហើយបិទផ្លូវចេញចូលអាស្រមជាច្រើនថ្ងៃមកហើយ ដោយពុំមានអាជ្ញាធរណាចុះអន្តរាគមន៍ហាមឃាត់ឡើយ។
ព្រះគ្រូចៅអធិការរូបនេះ ឱ្យដឹងថា អាស្រមសុវណ្ណគិរីទីទុយ ត្រូវបានព្រះអង្គនិងប្រជាពលរដ្ឋនាំគ្នាកសាងឡើងតាំងពីឆ្នាំ២០១៧ ដោយមានលិខិតអនុញ្ញាតពីអាជ្ញាធរពាក់ព័ន្ធ និងក្រសួងធម្មការនៅពេលនោះផងដែរ ដើម្បីជាកន្លែងសម្រាប់ប្រជាពលរដ្ឋអាចគោរពប្រតិបត្តិតាមគន្លងព្រះពុទ្ធសាសនា។
ព្រះតេជគុណមានសង្ឃដីកាបន្ថែមថា៖ «អាត្មាបង្កើតអាស្រមនៅលើទឹកដីនេះ គឺសម្រាប់ពុទ្ធបរិស័ទដើម្បីធ្វើសមាទានសីល និច្ចសីល ក្នុងគោលបំណងបង្កើតសាសនាឱ្យបានផុសផុលនៅក្នុងសង្គម។ អ៊ីចឹងចង់សួរទៅបុគ្គលដែលបានចាក់ដីរំលោភចូលអាស្រមនេះ ហេតុអីបានជាគេមិនមានបេះដូងឈាមជ័រសាសនា សាសនាព្រះពុទ្ធនៅក្នុងខ្លួន បានជាចាក់ដីលុបយកផ្លូវ លុបយកភ្នំដែលជាសម្បត្តិរដ្ឋ ហើយប្រែក្លាយទៅជាសម្បត្តិឯកជនទៅវិញ»។
បើតាមព្រះតេជគុណ ភឹម បញ្ចៈរួស ដីភ្នំនិងអាស្រមដែលព្រះអង្គកំពុងថែរក្សាសម្រាប់ទុកឱ្យប្រជាពលរដ្ឋគោរពប្រតិបត្តិសាសនានោះ មានទំហំជាង១ហិកតា។
ពលរដ្ឋម្នាក់នៅភូមិស្រែមាន់ អ្នកស្រី សៀង ស្រីអូន បានអំពាវនាវទៅអាជ្ញាធរពាក់ព័ន្ធឱ្យជួយអន្តរាគមន៍កុំឱ្យមានការទន្ទ្រានយកដីអាស្រមនេះបន្តទៀត និងបើកផ្លូវឱ្យអ្នកភូមិអាចចេញ-ចូល ដើម្បីគោរពប្រតិបត្តិសាសនានៅអាស្រមនេះបានជាធម្មតាវិញ។
អ្នកស្រី សៀង ស្រីអូន បន្តថា អ្នកស្រីក៏ដូចជាប្រជាពលរដ្ឋនៅជុំវិញអាស្រមនេះ មិនចង់ឱ្យមានការខូចខាតឬបាត់បង់អាស្រមនេះទេ ដោយថា នៅរដូវបុណ្យទាន ប្រជាពលរដ្ឋជិតឆ្ងាយតែងតែនាំគ្នាទៅធ្វើបុណ្យផ្សេងៗ និងប្រារព្ធពិធីបែបសាសនានៅទីនោះ។
អ្នកស្រីបារម្ភខ្លាចអ្នកមានលុយមានអំណាចយកអាស្រមដែលជាដីភ្នំនេះទៅធ្វើកម្មសិទ្ធិផ្ទាល់ខ្លួន ហើយធ្វើឱ្យអ្នកភូមិបាត់បង់កន្លែងសម្រាប់ធ្វើពិធីបុណ្យបែបសាសនា។
អ្នកស្រីបន្ថែមថា៖ «ដីប៉ុណ្ណឹងសោះចង់ដណ្តើមពីលោក មិនព្រមវេរឱ្យលោកទៅ! លោកបង្កើតកន្លែងដើម្បីពុទ្ធសាសនាសោះ ខែបុណ្យទាន គឺលោកនិងប្រជាពលរដ្ឋបាននាំគ្នាប្រារព្ធធ្វើរហូត ដូចជា បុណ្យផ្កា បុណ្យកឋិន [មនុស្ស]ចាស់នៅក្នុងភូមិគាត់ជុំគ្នាតែរហូតហ្នឹង»។
វីអូឌី មិនទាន់អាចស្វែងការការឆ្លើយតបពីបុគ្គលដែលរងការចោទប្រកាន់ថាបានទន្ទ្រានយកដីអាស្រមបានទេ នៅថ្ងៃព្រហស្បតិ៍នេះ។
អភិបាលស្រុកគងពិសី លោក ចែម ភឺនរីមវុទ្ធី អះអាងថា ទីតាំងដែលព្រះសង្ឃកំពុងបង្កើតអាស្រមនោះ មិនមែនជាទីតាំងអាស្រមឬវត្តអារាមស្របច្បាប់ឡើយ។ លោកបន្តថា ទីតាំងនោះជាដីមានម្ចាស់ និងមានបណ្ណកម្មសិទ្ធិស្របច្បាប់ ហើយករណីជម្លោះនេះក៏បានចូលទៅដល់ដៃតុលាការផងដែរ។ យ៉ាងណា លោក ចែម ភឺនរីមវុទ្ធី មិនបញ្ចេញឈ្មោះម្ចាស់ដីដែលថាមានបណ្ណកម្មសិទ្ធិនោះទេ។
លោកបន្ថែមថា៖ «នៅទីតាំងនេះ គឺអត់មានឯកសារណាបញ្ជាក់ពីថ្នាក់ខេត្ត ថាទីតាំងអាស្រមរបស់គាត់ស្របច្បាប់ទេ។ មួយទៀត សាលាអនុគុណដែលទទួលបន្ទុកវិស័យសាសនា ក៏បានបញ្ជាក់បំភ្លឺថា មិនមែនជាអាស្រមស្របច្បាប់ ហើយក៏មិនមែនអាស្រមឬក៏វត្តនៅកន្លែងហ្នឹងដែរ»។
មន្ត្រីសម្របសម្រួលសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី មានប្រសាសន៍ជាទូទៅថា អាស្រមឬវត្តអារាម អាចបង្កើតបាននៅលើដីសមូហភាព ហើយថា ការបង្កើតអាស្រមឬវត្តអារាមគឺសម្រាប់បម្រើឱ្យផលប្រយោជន៍រួម ដែលប្រជាពលរដ្ឋគ្រប់រូបអាចទៅធ្វើពិធីបុណ្យផ្សេងៗនិងគោរពបូជាជាដើម។
លោកបន្ថែមថា៖ «ប្រសិនបើភាពចម្រូងចម្រាសគ្នាក្នុងការសាងសង់ ដោយភាគីម្ខាងគេអះអាងថា មានបណ្ណកម្មសិទ្ធ អ៊ីចឹងម្ចាស់បណ្ណកម្មសិទ្ធិគាត់អាចប្តឹងទៅតុលាការ ប៉ុន្តែបើអត់បណ្ណកម្មសិទ្ធទេ មានត្រឹមតែពាក្យស្នើសុំ គាត់ត្រូវប្តឹងទៅអាជ្ញាធរមូលដ្ឋាន ហើយអាជ្ញាធរពេលទទួលពាក្យបណ្តឹងហ្នឹង ត្រូវសម្របសម្រួលដោះស្រាយបញ្ចប់រឿង»៕