ក្រសួងកសិកម្ម រុក្ខាប្រមាញ់ និងនេសាទ ដាក់បានចេញវិធានការបន្ទាន់មួយចំនួន ដើម្បីត្រួតពិនិត្យនិងទប់ស្កាត់ការឆ្លងរាលដាល «ជំងឺដុំពកស្បែក» លើសត្វគោក្របី (Lumpy Skin Disease-LSD) ខណៈជំងឺមួយនេះកំពុងរាលដាលលើសត្វគោក្របីនៅប្រទេសថៃនិងប្រទេសវៀតណាម។
ក្នុងសារាចរណែនាំចុះថ្ងៃទី២១ ខែឧសភា ឆ្នាំ២០២១ ក្រសួងកសិកម្ម បានបញ្ជាក់ថា សត្វគោក្របីដែលកើតជំងឺដុំពកស្បែកនេះ វាអាចមានអត្រាឈឺពី៥ទៅ៤៥ភាគរយ និងអត្រាស្លាប់តិចជាង១០ភាគរយ ដែលបង្កឱ្យខាតបង់ធ្ងន់ធ្ងរដល់គ្រួសារកសិករនិងសេដ្ឋកិច្ចជាតិ។
ក្រសួងបានឱ្យដឹងទៀតថា ជំងឺនេះមានរោគសញ្ញាដូចជា ដុំពកតូចៗឬធំទៅតាមស្ថានភាពនៃជំងឺ ដែលគេរកឃើញលើស្បែកតាមដងខ្លួន កញ្ចឹងក ច្រមុះ ក្រអូមមាត់ ប្រដាប់ភេទ និងកន្សោមដោះរបស់សត្វគោក្របី ហើយកម្ដៅខ្លួនវាឡើងរហូតដល់៤១អង្សាសេ។
ក្រសួងបន្តថា មេរោគនេះអាចឆ្លងពីសត្វមួយទៅសត្វមួយតាមរយៈការប៉ះពាល់ផ្ទាល់និងប្រយោល តាមភ្នាក់ងារចម្លងរោគ ដូចជា រុយ មូស ដង្កែ និងសត្វបឺតជញ្ជក់ឈាមផ្សេងទៀត ឬតាមធ្យោបាយដឹកជញ្ជូនសត្វ ទឹកមេជីវិត រួមទាំងភ្នាក់ងារចម្លងផ្សេងៗទៀត។
សារាចរណែនាំរបស់ក្រសួងកសិកម្ម បន្ថែមថា ដើម្បីទប់ស្កាត់ឱ្យមានប្រសិទ្ធភាព កុំឱ្យជំងឺមួយនេះឆ្លងចូលមកប្រទេសកម្ពុជានោះ អគ្គនាយកដ្ឋានសុខភាពសត្វ និងផលិតកម្មសត្វ រួមទាំងការិយាល័យផលិតកម្ម និងបសុព្យាបាលរាជធានី-ខេត្តទាំងអស់ ជាពិសេសតាមបណ្តាខេត្តជាប់ព្រំដែនប្រទេសវៀតណាមនិងថៃ ត្រូវពង្រឹងការទប់ស្កាត់និងត្រួតពិនិត្យឱ្យបានម៉ត់ចត់។
ក្រសួងបានណែនាំឱ្យមន្ត្រីក្រោមឱវាទរបស់ខ្លួន ត្រូវសហការឱ្យបានល្អជាមួយប្រទេសទាំងពីរនេះ ក្នុងការផ្លាស់ប្តូរព័ត៌មានទាក់ទងនឹងជំងឺដុំពកស្បែកសត្វគោក្របីនេះ ហើយត្រូវពង្រឹងការត្រួតពិនិត្យរាល់ការចរាចរសត្វគោក្របី ទឹកមេជីវិតបង្កាត់ និងផលិតផលសាច់គោក្របី ដែលនាំចូលឱ្យបានតឹងរ៉ឹង រួមទាំងវិធានការផ្សេងៗជាច្រើនទៀត។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង លោក សុខ សុទ្ធាវុធ មានប្រសាសន៍ថា ក្រោយទទួលបានសារាចរណែនាំនេះ នៅថ្ងៃស្អែក លោកនឹងជួបប្រជុំជាមួយមន្ត្រីពាក់ព័ន្ធ ដើម្បីជំរុញការអនុវត្តវិធានការរបស់ក្រសួងដែលបានដាក់ចេញនេះឱ្យមានប្រសិទ្ធភាព។
យ៉ាងណា លោកថា នៅខេត្តស្វាយរៀង ក្នុងរយៈពេលចុងក្រោយនេះ ពុំសូវមានការនាំសត្វគោក្របីឆ្លងដែននោះទេ។
ចំណែកប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ លោក ប៉ាង វណ្ណាសេដ្ឋ មានប្រសាសន៍ថា ក្រៅពីពង្រឹងការត្រួតពិនិត្យនិងអនុវត្តវិធានការផ្សេងទៀតនោះ មន្ទីរកសិកម្មខេត្តនឹងចុះណែនាំដល់ប្រជាកសិករឱ្យមានការប្រុងប្រយ័ត្ន និងរាយការណ៍ទៅអាជ្ញាធរពាក់ព័ន្ធផងដែរក្នុងករណីសត្វចិញ្ចឹមរបស់ពួកគេមានបញ្ហាឬកើតជំងឺផ្សេងៗ។
លោកបន្ថែមថា៖ «យើងនឹងអនុវត្តទប់ស្កាត់ការងារនេះ ប៉ុន្តែនៅខេត្តបន្ទាយមានជ័យនេះ ពាក់ព័ន្ធនឹងប្រទេសគេ ពុំមានការនាំឆ្លងកាត់មកយើងទេ។ អ៊ីចឹងយើងនៅនេះ យើងគ្រប់គ្រងបានកន្លែងកសិដ្ឋានចិញ្ចឹមគោធំៗមួយចំនួន ហើយយើងនឹងផ្សព្វផ្សាយវិធានការនេះឱ្យកសិករគាត់បានដឹងនិងប្រុងប្រយ័ត្ន។ បើមានបញ្ហាអី ឱ្យរាយការណ៍ ដើម្បីយើងចាត់វិធានការទាន់ពេលវេលា»។
ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ សាទរនឹងវិធានការរបស់ក្រសួងកសិកម្ម ដែលជំរុញឱ្យមន្ត្រីពង្រឹងការត្រួតពិនិត្យនិងទប់ស្កាត់កុំឱ្យមានការឆ្លងរាលដាលជំងឺផ្សេងៗចូលមកប្រទេសកម្ពុជានេះ។ លោកថា ប្រសិនសត្វចិញ្ចឹមរបស់កសិករឆ្លងឬកើតជំងឺអ្វីមួយរហូតស្លាប់នោះ វានឹងធ្វើឱ្យខាតបង់ផលប្រយោជន៍និងប៉ះពាល់ទៅដល់សេដ្ឋកិច្ចរបស់ពួកគេ។
លោកបន្ថែមថា៖ «បើតាមខ្ញុំដឹង ជំងឺពកគោក្របីនេះ ខាងកម្ពុជាយើងហ្នឹងគឺបានកើតងាប់អស់មួយសារទៅហើយ ប៉ុន្តែសព្វថ្ងៃនេះ ដូចជាអត់អីវិញហើយ។ អ៊ីចឹង កត្តាហ្នឹង[ជំងឺពកស្បែក] វាក៏មានផលប៉ះពាល់ដូចគ្នា ព្រោះនេះជាជំងឺ។ សមាគម សព្វថ្ងៃ មានសំណូមពរមួយធំបំផុតទៅរដ្ឋាភិបាល គឺសុំការពារជំងឺឆ្លងដែននេះឱ្យខានតែបាន»៕
