ក្រសួងសុខាភិបាល បានក្រើនរំឭកដល់អភិបាលរាជធានី-ខេត្ត ត្រូវពង្រឹងវិធានការទប់ស្កាត់ការឆ្លងរាលដាលនៃជំងឺកូវីដ-១៩ ជាពិសេសយកគំរូតាមវិធានការបិទខ្ទប់នៅភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល។
យោងតាមលិខិតក្រសួងសុខាភិបាល ចេញផ្សាយនៅថ្ងៃទី២០ ខែឧសភា ឆ្នាំ២០២១ បានឱ្យដឹងថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ តាមបណ្ដារាជធានី-ខេត្ត ឱ្យមានប្រសិទ្ធភាព ក្រសួងក្រើនរំឭកជាថ្មីដល់អភិបាលរាជធានី-ខេត្តទាំងអស់ត្រូវបន្តពង្រឹងការអនុវត្តច្បាប់និងវិធានការណែនាំរបស់ក្រសួង ជុំវិញការធ្វើចត្តាឡីស័កនិងវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូវីដ-១៩។
លើសពីនេះ ក្រសួងក៏បានណែនាំឱ្យអភិបាលរាជធានី-ខេត្តទាំងអស់គួរយកគំរូតាមវិធានការបិទខ្ទប់នៅភូមិសាស្រ្តរាជធានីភ្នំពេញ និងក្រុងតាខ្មៅ យកទៅអនុវត្តតាមស្ថានការណ៍ជាក់ស្ដែងនៅមូលដ្ឋានគ្រប់គ្រងរបស់ខ្លួន។
ការណែនាំនេះបានធ្វើឡើងបន្ទាប់ពីមានកិច្ចប្រជុំគណៈកម្មការអន្តរក្រសួងដើម្បីប្រយុទ្ធប្រឆាំងជំងឺកូវីដ-១៩ កាលពីថ្ងៃទី១២ ខែឧសភា និងក្រោយពីការណែនាំរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែឧសភា ឆ្នាំ២០២១។
សេចក្តីណែនាំនេះក៏បានធ្វើឡើងក្រោយពីស្ថានភាពឆ្លងជំងឺកូវីដ-១៩ នៅក្នុងភូមិសាស្ត្ររាជធានីភ្នំពេញ និងក្រុងតាខ្មៅ បានចាប់ផ្តើមធូរស្រាល និងត្រូវបានបន្ថយពីតំបន់ក្រហម មកត្រឹមតំបន់លឿងទុំ និងលឿងវិញ។ ប៉ុន្តែការឆ្លងរីករាលដាលជំងឺកូវីដ-១៩នេះ កំពុងរាតត្បាតនៅតាមបណ្តាខេត្តនានាទៅវិញ។
វីអូឌី មិនអាចសុំការអត្ថាធិប្បាយបន្ថែមពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេជុំវិញករណីនេះ។
អភិបាលរងខេត្តកំពង់ស្ពឺ លោកស្រី ឡុង បូណារេត មានប្រសាសន៍នៅថ្ងៃសុក្រនេះថា អាជ្ញាធរពីថ្នាក់ខេត្តរហូតដល់ភូមិ-ឃុំ តែងតែសហការគ្នាធ្វើយ៉ាងណាដើម្បីត្រួតពិនិត្យនិងតាមដានប្រជាពលរដ្ឋដែលរស់នៅមូលដ្ឋានជាប្រចាំ ជាមួយនឹងការចុះឃោសនាដោយផ្ទាល់អំពីវិធីបង្ការនិងការពារនៃការឆ្លងរាលដាលនៃជំងឺកូវីដ-១៩។
លោកស្រីបន្តថា បើទោះបីជាទទួលបានព័ត៌មាននៅពេលយប់កណ្ដាលអធ្រាត្រក៏ដោយ ប្រសិនបើមានករណីមន្ទិលសង្ស័យណាមួយ គឺអាជ្ញាធរនឹងចុះទៅយកសំណាកប្រជាពលរដ្ឋ រួចដាក់ឱ្យធ្វើចត្តាឡីស័កភ្លាមៗដោយមិនរង់ចាំដល់ព្រឹកស្អែកនោះឡើយ។
លោកស្រីបញ្ជាក់ថា៖ «គ្រាន់តែថ្នាក់ជាតិចេញព័ត៌មានមក យើងស្វែងរកពួកគាត់ យើងមិនឱ្យគាត់ដើររហូតទៀតទេ។ ស្រុកណាគឺមានឈ្មោះប៉ុន្មាននាក់ គឺស្រុកហ្នឹងត្រូវទទួលយក បើវិជ្ជមានគឺយើងយកគាត់ទៅព្យាបាល។ តែបើគាត់មានប៉ះពាល់សហគមន៍ក្នុងគ្រួសារគាត់ ក្រុមយើងទៅខ្ទប់មួយក្រុមៗ នឹងទៅយកគ្រួសារគាត់ដែលពាក់ព័ន្ធមកទាំងអស់ គឺថាព័ត៌មានចេញយប់គឺយើងទៅយប់ អត់ចាំព្រឹក ក្រុមការងារគេធ្វើអ៊ីចឹង»។
បើតាមអភិបាលរងខេត្តរូបនេះ ករណីឆ្លងរាលដាលជំងឺកូវីដ-១៩ ក្នុងខេត្តកំពង់ស្ពឺ ស្ទើរតែកើតមានឡើងគ្រប់ស្រុកទៅហើយ ខណៈខេត្តនេះមានកម្មករ-កម្មការិនី ចំនួន១៣ម៉ឺននាក់ កំពុងធ្វើការតាមបណ្ដារោងចក្រនានា។
យោងតាមរបាយការណ៍ទទួលបានពីលោកស្រី ឡុង បូណារេត ឱ្យដឹងថា គិតត្រឹមថ្ងៃទី១៨ ខែឧសភា ឆ្នាំ២០២១ ក្នុងព្រឹត្តិការណ៍សហគមន៍២០កុម្ភៈ នាំឱ្យខេត្តនេះមានករណីឆ្លងសរុប៣៣៤នាក់ ក្នុងនោះស្លាប់៩នាក់ និងជាសះស្បើយចំនួន៤២នាក់។
អភិបាលរងខេត្តតាកែវ លោក លី សាវេត បានឱ្យដឹងថា ក្រៅពីការធ្វើចត្តាឡីស័ក អាជ្ញាធរខេត្តក៏បានដាក់ចេញនូវវិធានការបិទខ្ទប់តំបន់ដែលមានករណីវិជ្ជមានជំងឺកូវីដ-១៩តែម្ដង ដោយលោកអះអាងថា វិធានការនេះមានប្រសិទ្ធភាពក្នុងការទប់ស្កាត់ការឆ្លងរាលដាល។
លោកមានប្រសាសន៍ថា៖ «កន្លងមក មានភូមិនៅស្រុកបាទី យើងបានធ្វើចំពោះភូមិ៣ ហើយព្រឹត្តិការណ៍សំរោងយោង យើងបិទភូមិ៤ អ៊ីចឹងគឺវាធានាការបិទខ្ទប់ គឺជាវិធានការមួយដែលយើងប្រកាន់យកនៅពេលដែលមានស្ថានភាពធ្ងន់ធ្ងរ។ ហើយជាទូទៅ ក្រោយពេលបិទខ្ទប់ហើយ គឺឃើញថាទទួលបានលទ្ធផលល្អ»។
បើតាមអភិបាលរងខេត្តរូបនេះ គិតត្រឹមថ្ងៃទី២០ ខែឧសភា ករណីឆ្លងសរុបក្នុងខេត្តតាកែវ មានស្រុក-ក្រុងចំនួន១០ បានរកឃើញករណីវិជ្ជមានជំងឺកូវីដ-១៩ ក្នុងនោះ មានអ្នកឆ្លងចំនួន៥៦០នាក់ ជាសះស្បើយ១៣៣នាក់ និងស្លាប់៤នាក់។
គិតត្រឹមព្រឹកថ្ងៃទី២១ ខែឧសភា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន២៤ ១៥៧នាក់ ក្នុងនោះ អ្នកជំងឺព្យាបាលជាសះស្បើយមានចំនួន១៦ ៥២៤នាក់ និងអ្នកស្លាប់សរុប១៦៥នាក់៕