ធនាគារជាតិនៃកម្ពុជា បន្តលើកទឹកចិត្តដល់គ្រឹះស្ថានធនាគារនិងហិរញ្ញវត្ថុ ពិនិត្យលទ្ធភាពអនុគ្រោះ និងបន្ធូរបន្ថយ ឬលើកលែងការពិន័យតាមស្ថានភាពជាក់ស្តែងដល់អតិថិជនរបស់ខ្លួន ខណៈការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈមិនទាន់ថមថយ។
សេចក្តីជូនដំណឹងស្តីពី «វិធានការអនុគ្រោះដំណាក់កាលទី៣ របស់ធនាគារជាតិនៃកម្ពុជា» ចុះថ្ងៃទី២១ ខែឧសភា ឆ្នាំ២០២១ និងបានផ្សព្វផ្សាយជាសាធារណៈនៅថ្ងៃនេះ បានលើកឡើងថា កន្លងមក ធនាគារជាតិបានដាក់ចេញនូវវិធានការអនុគ្រោះជាបន្តបន្ទាប់ ដើម្បីចូលរួមគាំទ្រគោលនយោបាយរដ្ឋបាល ក្នុងការដោះស្រាយបញ្ហាប្រឈមនិងសម្រាលបន្ទុកប្រជាពលរដ្ឋដែលរងផលប៉ះពាល់ពីជំងឺកូវីដ-១៩។
សេចក្តីជូនដំណឹងដដែលបន្តថា ក្នុងបរិការណ៍នៃការរីករាលដាលនៃជំងឺកូវីដ-១៩ ជាពិសេសព្រឹត្តិការណ៍សហគមន៍២០កុម្ភៈ ធនាគារជាតិនៃកម្ពុជា បានសម្រេចបន្តវិធានការអនុគ្រោះជាបន្តទៀត ក្នុងនោះ អនុញ្ញាតឱ្យគ្រឹះស្ថានធនាគារនិងហិរញ្ញវត្ថុ បន្តធ្វើឥណទានរៀបចំឡើងវិញ រហូតដល់ថ្ងៃទី៣១ ខែធ្នូ ឆ្នាំ២០២១។ ចំពោះអតិថិជនដែលរស់នៅទីតាំងតំបន់បិទខ្ទប់តាមការកំណត់របស់រដ្ឋាភិបាលឬអាជ្ញាធរពាក់ព័ន្ធ គ្រឹះស្ថានធនាគារនិងហិរញ្ញវត្ថុអាចធ្វើឥណទានរៀបចំឡើងវិញលើសពី៣ដងក្នុងអំឡុងពេលអនុគ្រោះនេះ។
សេចក្តីជូនដំណឹងបានបន្ថែមថា៖ «បន្តលើកទឹកចិត្តឱ្យគ្រឹះស្ថានធនាគារនិងហិរញ្ញវត្ថុពិនិត្យលទ្ធភាពអនុគ្រោះ បន្ធូរបន្ថយ ឬលើកលែងការយកសោហ៊ុយឬការពិន័យផ្សេងៗតាមស្ថានភាពជាក់ស្តែងរបស់អតិថិជន»។
ក្រៅពីនោះ ធនាគារជាតិនៃកម្ពុជា បញ្ជាក់ទៀតថា ធនាគារក៏នឹងរក្សាការអនុវត្តប្រាក់បម្រុងកាតព្វកិច្ចតាមអត្រា ៧% ដដែល រហូតដល់មានការជូនដំណឹងជាថ្មីផងដែរ៕
អត្ថបទទាក់ទង
សង្គមស៊ីវិលថាជីវភាពពលរដ្ឋនឹងបន្តធ្លាក់ចុះ បើរដ្ឋាភិបាលមិនទាមទារត្រឡប់មកវិញនូវប្រព័ន្ធអនុគ្រោះពន្ធ
