ក្រសួងការងារ និងបណ្តុះបណ្តាលវិជ្ជាជីវៈ បានរំឭកទៅម្ចាស់រោងចក្រសហគ្រាសមិនឱ្យកាត់ប្រាក់ឈ្នួលកម្មករ ខណៈពួកគេសុំច្បាប់ឈប់សម្រាក ដើម្បីទៅចាក់វ៉ាក់សាំងជំងឺកូវីដ-១៩។
ក្នុងសេចក្តីជូនដំណឹងមួយចុះថ្ងៃទី២៤ ខែឧសភា ឆ្នាំ២០២១ ក្រសួងការងារ បានប្រាប់ដល់ម្ចាស់រោងចក្រសហគ្រាសទាំងអស់ត្រូវអនុញ្ញាតឱ្យកម្មករបានឈប់សម្រាកចំនួន១ថ្ងៃ ដោយទទួលបានប្រាក់ឈ្នួលដដែល ដើម្បីឱ្យពួកគេបានទៅចាក់វ៉ាក់សាំងដូសទី២ តាមកាលកំណត់របស់ក្រុមគ្រូពេទ្យនិងអាជ្ញាធរ។
ក្រសួងការងារ បានឱ្យកម្មកររាយការណ៍ទៅអាជ្ញាធរពាក់ព័ន្ធ ក្នុងករណីរោងចក្រសហគ្រាសណាមួយមិនអនុវត្តទៅតាមសេចក្តីជូនដំណឹងមួយនេះ ដោយថា ការរារាំងមិនឱ្យបុគ្គលណាម្នាក់ទៅចាក់វ៉ាក់សាំងការពារជំងឺកូវីដ-១៩ គឺជាទង្វើល្មើសនឹងច្បាប់។
សេចក្តីជូនដំណឹងដដែលនេះក៏ប្រាប់ឱ្យម្ចាស់រោងចក្រសហគ្រាសជួយជំរុញនិងអនុញ្ញាតឱ្យកម្មករបានទៅចាក់វ៉ាក់សាំង ដូសទី២ នៅតាមទីតាំងនិងកាលកំណាត់ផងដែរ។ ក្រសួងការងារថា បើម្ចាស់រោងចក្រសហគ្រាសណាមិនអនុវត្តតាម នឹងត្រូវទទួលពិន័យជាប្រាក់និងផ្តន្ទាទោសដាក់ពន្ធនាគារតាមច្បាប់។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) លោក គង់ អាទិត្យ បានគាំទ្រចំពោះសេចក្តីណែនាំរបស់ក្រសួងការងារនេះ។ លោកថា ការចាក់វ៉ាក់សាំងនេះ គឺដើម្បីការពារការឆ្លងរាលដាល ការពារផលប្រយោជន៍កម្មករនិងថៅកែ រួមទាំងប្រទេសជាតិផងដែរ។
លោកបន្ថែមថា៖ «យើងក៏អំពាវនាវដល់ថៅកែរោងចក្រទាំងអស់ ឱ្យគាត់លើកទឹកចិត្តដល់កម្មករឱ្យគាត់ចាក់វ៉ាក់សាំងហ្នឹង និងកុំឱ្យកាត់លុយពេលកម្មករទៅចាក់វ៉ាក់សាំងហ្នឹងផងដែរ»។
វីអូឌី មិនអាចសុំការអត្ថាធិប្បាយជុំវិញករណីនេះពីអគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ បានទេ នៅរសៀលនេះ។
គិតត្រឹមថ្ងៃទី២៣ ខែឧសភា ឆ្នាំ២០២១ កម្ពុជាទទួលបានវ៉ាក់សាំងសរុបចំនួន៣ប្រភេទ រួមមាន វ៉ាក់សាំង ស៊ីណូហ្វាម ជាជំនួយរបស់ចិន សរុប១លាន៧សែនដូស, វ៉ាក់សាំង អាស្ត្រាហ្សេនីកា ជាជំនួយរបស់ខូវ៉ាក់ ចំនួន៣២៤ ០០០ដូស និងវ៉ាក់សាំង ស៊ីណូវ៉ាក់ ដែលរដ្ឋាភិបាលកម្ពុជាបញ្ជាទិញពីចិនមានចំនួន៤លានដូស។
បើតាមសេចក្តីជូនដំណឹងរបស់ក្រសួងការងារ គិតត្រឹមទី៩ ខែឧសភា ឆ្នាំ២០២១ ការចាក់វ៉ាក់សាំងដូសទី១ មានអ្នកស្ម័គ្រចិត្តចាក់វ៉ាក់សាំងជាកម្មករ សរុបមានចំនួន១២៨ ០៥៤នាក់ ក្នុងនោះ ជនបរទេសចំនួន៤ ៦៥២នាក់ ដោយចាក់បានចំនួន១២៤ ៨០៣នាក់ ក្នុងនោះ បរទេសចំនួន៤ ៦៣១នាក់។ ក្រុមគ្រូពេទ្យមិនអនុញ្ញាតឱ្យចាក់ចំនួន៣ ២៥១នាក់។
ចំពោះការចាក់វ៉ាក់សាំងដូសទី២ ដោយគិតត្រឹមថ្ងៃទី៩ ខែឧសភាដដែលនេះ ចាក់បានចំនួន៦០ ៣៤៥នាក់ ក្នុងនោះ បរទេស២ ៥៧៩នាក់ ខណៈអនុគណៈកម្មការចំពោះកិច្ច បន្តចាក់ជូនកម្មករតាមបណ្តារោងចក្រនានាជាបន្តបន្ទាប់ទៀត៕