សមាគមស្បែកជើងកម្ពុជា បានស្នើឱ្យក្រសួងសុខាភិបាល រួមនឹងក្រសួងការងារនិងបណ្តុះបណ្តាលវិជ្ជាជីវៈ បង្កើតយុទ្ធនាការចាក់វ៉ាក់សាំងជូនដល់កម្មករនៅតាមបណ្តាខេត្តនានា ខណៈជំងឺកូវីដ-១៩កំពុងរីករាលដាលនៅតាមរោងចក្រនៅតាមខេត្ត។
យោងតាមលិខិតរបស់សមាគមស្បែកជើងកម្ពុជា ចេញផ្សាយកាលពីថ្ងៃទី២៤ ខែឧសភា ឆ្នាំ២០២១ បានឱ្យដឹងថា ខេត្តដែលប្រមូលផ្ដុំរោងចក្រច្រើន រួមមានជាអាទិ៍ ខេត្តកណ្ដាល កំពង់ស្ពឺ តាកែវ កំពង់ចាម ស្វាយរៀង និងខេត្តព្រះសីហនុជាដើម។
បើតាមលិខិតដដែល យុទ្ធនាការចាក់វ៉ាក់សាំងនៅតាមរោងចក្រនៅតាមបណ្តាខេត្ត គឺដើម្បីកាត់បន្ថយហានិភ័យការឆ្លងរាលដាលជំងឺកូវីដ-១៩ ខណៈតួលេខនៃការឆ្លងក្នុងចំណោមកម្មកររោងចក្រនៅតែបន្តកើតមានគួរឱ្យព្រួយបារម្ភ។
គិតត្រឹមទី៩ ខែឧសភា ឆ្នាំ២០២១ ការចាក់វ៉ាក់សាំងដូសទី១ ជូនដល់កម្មករ-កម្មការិនីនៅរាជធានីភ្នំពេញ បានចំនួន១២៤ ៨០៣នាក់ ក្នុងនោះ ជនបរទេសចំនួន៤ ៦៣១នាក់។
កាលពីថ្ងៃទី២៤ ខែឧសភា ក្រសួងការងារ ទើបបានជូនដំណឹងជាថ្មីឱ្យថៅកែរោងចក្រអនុញ្ញាតឱ្យកម្មករ-កម្មការិនីទៅចាក់វ៉ាក់សាំង ដូសទី២ ចំនួន១ថ្ងៃ ដោយមិនមានការកាត់ប្រាក់ឈ្នួល។ ក្រសួងបានចាត់ទុកថា ការរារាំងកម្មករមិនឱ្យទៅចាក់វ៉ាក់សាំង ល្មើសនឹងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩។
គិតត្រឹមថ្ងៃទី២៥ ខែឧសភានេះ កម្ពុជារកឃើញអ្នកឆ្លងជំងឺកូវីដ-១៩ថ្មី ចំនួន៥៦៨នាក់ ធ្វើឱ្យអ្នកឆ្លងសរុបកើនឡើងជាង២ម៉ឺន៦ពាន់នាក់ និងស្លាប់ចំនួន១៨៣នាក់៕