ប្រជាពលរដ្ឋមានជម្លោះដីធ្លីនៅស្រុកភ្នំស្រួច ខេត្តកំពង់ស្ពឺ ចោទទាហានប្រចាំការនៅមជ្ឈមណ្ឌលអភិវឌ្ឍន៍យោធានៅខេត្តនេះថា បានរំលោភយកដីធ្លីរបស់ពួកគេនិងបានគំរាមកំហែងមិនឱ្យពួកគាត់ចូលអាស្រ័យផលលើដីរបស់ខ្លួនថែមទៀត។
កាលពីម្សិលមិញនេះ ពលរដ្ឋប្រហែល២០នាក់បានប្រមូលផ្តុំគ្នានៅលើដីកំពុងមានជម្លោះ ដើម្បីរារាំងមិនឱ្យភាគីទាហានធ្វើសកម្មភាពដាំដំណាំលើដីតំបន់មានវិវាទនោះ ដែលស្ថិតក្នុងភូមិវាលធំ ឃុំត្រែងត្រយឹង ស្រុកភ្នំស្រួច។
ពលរដ្ឋម្នាក់ លោក សយ ប៊ុន ប្រាប់ វីអូឌី ថាដីប្រហែល១០០ហិកតារបស់អ្នកភូមិ៦០គ្រួសារ មានជម្លោះជាមួយក្រុមទាហានប្រចាំការនៅមជ្ឈមណ្ឌលអភិវឌ្ឍន៍យោធានៅខេត្តកំពង់ស្ពឺ ចាប់តាំងពីឆ្នាំ២០១២ ក្រោយអ្នកភូមិបានទិញដីនោះពីទាហានប្រចាំការរួចមក។
លោកបន្តថា គ្រួសារលោកបានទិញដីទទឹង៥០ម៉ែត្រនិងបណ្តោយ៣០០ម៉ែត្រ ពីទាហាន នៅឆ្នាំ២០០៦ ដើម្បីធ្វើស្រែនិងដាំដំណាំហូបផ្លែ ហើយអាជ្ញាធរមូលដ្ឋានបានចេញលិខិតបញ្ជាក់ការកាន់កាប់នៅឆ្នាំ២០១១។ លោកបន្ថែមថា នៅឆ្នាំ២០១២ ក្រុមទាហានបានដកហូតយកដីនោះវិញ ដោយចោទអ្នកភូមិថា បានចូលទៅកាន់កាប់លើដីរបស់ទាហានដោយខុសច្បាប់ ហើយបានបង្កើតជាជម្លោះរហូតមកដល់បច្ចុប្បន្ន។
លោកបន្ថែមថា៖ «យើងអត់អាចចូលទៅធ្វើឬដាំអីបានទេ ព្រោះទាហានយាមនិងដាក់កម្លាំងវានៅហ្នឹង។ បើយើងធ្វើ គឺវាមកឃាត់។ កន្លងមក យើងធ្លាប់ជួបប្រជុំចរចាគ្នា គឺសុំឱ្យផ្អាកសកម្មភាពទាំងអស់ហ្នឹង បើទាហានធ្វើ ត្រូវមានការយល់ព្រមពីប្រជាពលរដ្ឋ បើពលរដ្ឋធ្វើ ត្រូវបានការយល់ព្រមពីទាហាន ក៏ប៉ុន្តែកន្លងមក ទាហានវាលួចចូលទៅដាំ បើចូលទៅ អត់បានទេ»។
ពលរដ្ឋម្នាក់ទៀត លោក ចាន់ សាវ៉ាន់ អាយុ៧០ឆ្នាំ អះអាងថា លោកបានចំណាយលុយ២ ០០០ដុល្លារសម្រាប់ទិញដី២ហិកតាពីទាហានកាលពីអំឡុងឆ្នាំ២០០៥ ដើម្បីបង្កបង្កើនផលធ្វើស្រែចម្ការ ប៉ុន្តែត្រូវបានទាហាន ទាមទារយកវិញដោយអយុត្តិធម៌ ក្រោយគាត់ចូលអាស្រ័យផលបានជិត១០ឆ្នាំ។
ពលរដ្ឋដដែលបន្តថា បច្ចុប្បន្នដីនោះត្រូវបានក្រុមទាហានឈរជើងប្រចាំការនៅមជ្ឈមណ្ឌលអភិវឌ្ឍន៍យោធានៅខេត្តកំពង់ស្ពឺ ចូលដាំស្វាយនិងដាំកូនឈើផ្សេងៗ ហើយរារាំងមិនឱ្យប្រជាពលរដ្ឋចូលទៅអាស្រ័យផលឡើយ។
លោកបន្ថែមថា៖ «ខ្ញុំសំណូមពរដល់សម្តេច ហ៊ុន សែន នាយករដ្ឋមន្ត្រី ជួយអន្តរាគមន៍ដោយចុះមកពិនិត្យមើលជាក់ស្តែង កុំឱ្យជឿតែសម្តីអ្នករាយការណ៍ទៅ។ ចុះមកពិនិត្យមើលជាក់ស្តែង ពិនិត្យមើលជាក់ស្តែងលើលិខិតស្នាមដែលអាជ្ញាធរភូមិឃុំគេបានចេញលិខិតបញ្ជាក់ជូនប្រជាពលរដ្ឋសិន»។
ពលរដ្ឋម្នាក់ទៀត លោក យ័ន្ត តុងហេង ឱ្យដឹងថា គ្រួសាររបស់លោកបានប៉ះពាល់ដីចំនួន៤ហិកតា ដោយក្រុមទាហានមិនឱ្យចូលទៅបង្កបង្កើនផល និងបានគំរាមកំហែងចាប់ពលរដ្ឋដាក់គុក ប្រសិនបើហ៊ានចូលទៅធ្វើសកម្មភាពលើដីមានជម្លោះនោះបន្តទៀត។
វីអូឌី មិនអាចស្វែងរកប្រភពទាក់ទងទៅភាគីទាហានប្រចាំការនៃមជ្ឈមណ្ឌលអភិវឌ្ឍន៍យោធានៅខេត្តកំពង់ស្ពឺ ដែលរងការចោទប្រកាន់ពីពលរដ្ឋទាំងនោះបាននៅឡើយទេ គិតត្រឹមថ្ងៃទី២៧ ខែឧសភានេះ។
អ្នកនាំពាក្យក្រសួងការពារជាតិ លោក ឈុំ សុជាតិ សុំមិនឆ្លើយពាក់ព័ន្ធករណីនេះទេ ដោយលោកថា មិនទាន់បានដឹង និងស្នើឱ្យផ្ញើឯកសារទៅលោកពិនិត្យមើលសិន។
ចំណែកអភិបាលខេត្តកំពង់ស្ពឺ លោក វ៉ី សំណាង ក៏លើកឡើងប្រហាក់ប្រហែលគ្នានេះដែរ ដោយថា លោកមិនទាន់ទទួលបានព័ត៌មាននេះនៅឡើយ ហើយមិនអាចឆ្លើយបាន។
យ៉ាងណា អាជ្ញាធរមូលដ្ឋានឃុំត្រែងត្រយឹងម្នាក់ ថ្លែងសុំមិនបញ្ចេញឈ្មោះដោយបារម្ភពីសុវត្ថិភាព បានប្រាប់ វីអូឌី ថាទាហានពិតជាបានរំលោភយកដីប្រជាពលរដ្ឋពិតមែន។ លោកថា ប្រជាពលរដ្ឋបានទៅរស់នៅនិងអាស្រ័យផលមុនទាហានទៅដល់ ហើយកូនទាហានមួយចំនួនក៏បានលក់ដីឱ្យប្រជាពលរដ្ឋទៀតផង។
លោកបន្ថែមថា៖ «ប្រជាពលរដ្ឋគាត់ធ្វើប្លង់បញ្ជាក់កាន់កាប់ពីអាជ្ញាធរភូមិឃុំហើយៗហ្នឹង គាត់ចូលកាន់កាប់អាស្រ័យផលដោយដាំស្រូវមួយចំនួនហើយហ្នឹង។ និយាយទៅ កូនទាហានមួយចំនួនបានលួចលក់ដីហ្នឹងឱ្យពលរដ្ឋទៀត»។
មន្ត្រីសម្របសម្រួលសមាគមអាដហុកប្រចាំខេត្តកំពង់ស្ពឺ លោក រ័ត្ន ថាវី មានប្រសាសន៍ថា តាមការស្រាវជ្រាវរបស់លោក គឺប្រជាពលរដ្ឋមានឯកសារបញ្ជាក់ការកាន់កាប់ដីធ្លីពីអាជ្ញាធរមូលដ្ឋាន និងឯកសារបញ្ជាក់ការទិញដីពីបុគ្គលជាទាហានមួយចំនួនពិតមែន។
មន្ត្រីសិទ្ធិមនុស្សរូបនេះបន្តថា ដីតំបន់នោះជាដីដែលរដ្ឋាភិបាលត្រៀមទុកសម្រាប់បែងចែកជាដីសង្គមកិច្ចជូនដល់យោធាដែលកាត់រំសាយ ឬចូលនិវត្តន៍ ប៉ុន្តែត្រូវបុគ្គលជាទាហានមួយចំនួនបានគប់គិតគ្នាលក់ដូរដើម្បីផលប្រយោជន៍បុគ្គលទៅវិញ។ លោកជំរុញឱ្យអាជ្ញាធរពាក់ព័ន្ធសម្របសម្រួលដោះស្រាយបញ្ហានេះ ដើម្បីកុំឱ្យប្រជាពលរដ្ឋខាតបង់ផលប្រយោជន៍បន្តទៀត។
លោកបន្ថែមថា៖ «តាមខ្ញុំដឹង ដីហ្នឹងគឺរដ្ឋាភិបាលទុកចែកឱ្យយោធាដែលចូលនិវត្តន៍ ដោយតាមគម្រោងគេ ១គ្រួសារ[ត្រូវទទួលបាន]៥ហិកតា ហើយមានជំនួយថវិកាពីអាមេរិកខ្លះសម្រាប់ធ្វើផ្ទះឱ្យអ្នកដែលត្រូវទទួលបានដីសម្បទានសង្គមកិច្ចហ្នឹង ប៉ុន្តែជាលទ្ធផលជាក់ស្តែង យើងមើលទៅវាអត់ទៅតាមអ្វីដែលគ្រោងហ្នឹងទេ។ វាទៅជារឿងបុគ្គលដែលមានបុណ្យសក្តិមានអំណាចធំនៅក្នុងអង្គភាពហ្នឹង គេយកដីហ្នឹងចែកគ្នាទៅវិញ ហើយអ្នកខ្លះក៏ហ៊ានលក់អ៊ីចឹងទៅ»៕