ពលរដ្ឋនៅខេត្តព្រះសីហនុ អះអាងថា ពួកគាត់ជាង១០០នាក់បានប្រមូលផ្តុំគ្នាតវ៉ានៅថ្ងៃសុក្រនេះ ក្រោយមានបុគ្គលឯកជនធ្វើសកម្មភាពដាក់ផ្ទះចល័តនៅលើដីរបស់អ្នកភូមិចំនួន៦គ្រួសារ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់។
លោក ឃឹម លីដា អះអាងថាជាតំណាងពលរដ្ឋ បានឱ្យដឹងថា ដីប្រហែល២០ហិកតារបស់ពលរដ្ឋ៦គ្រួសារត្រូវបានបុគ្គលឈ្មោះ លី សុងីម មកអះអាងកាលពីដើមឆ្នាំនេះថាជាដីរបស់ខ្លួន និងជាដីរបស់ឧកញ៉ា ហ៊ុន ជា។ លោកថា នៅព្រឹកមិញនេះ លោក លី សុងីម បានប្រើកម្មករឱ្យដឹកផ្ទះចល័តមកដាក់លើដីកំពុងមានជម្លោះនោះ ប៉ុន្តែត្រូវបានអ្នកភូមិតវ៉ា ដោយអះអាងថា ដីនោះជាដីរបស់ពលរដ្ឋ៦គ្រួសារដែលបានទិញនិងរស់នៅយូរឆ្នាំមកហើយ។
លោកបន្ថែមថា៖ «គាត់ [លោក លី សុងីម] បានធ្វើសកម្មភាពលួចដឹកផ្ទះ [ចល័ត] មកទាំងយប់ យកមកដាក់លើដីប្រជាពលរដ្ឋ ហើយប្រជាពលរដ្ឋគាត់មិនពេញចិត្ត គាត់ប្រមូលផ្តុំគ្នាតវ៉ា និងជួយធ្វើជាសាក្សីឱ្យពលរដ្ឋ៦គ្រួសារ ដោយសារពួកគាត់មិនពេញចិត្តនឹងទង្វើរំលោភបំពានបែបហ្នឹង»។
ប្រធានសហគមន៍សេអ៊ីប្រាំ នៅខេត្តព្រះសីហនុ លោក ស៊ុន សុផាត មានប្រសាសន៍ថា អាជ្ញាធរមូលដ្ឋានបានចុះវាស់វែងដីរបស់ប្រជាពលរដ្ឋ៦គ្រួសារនោះ និងមានឯកសារបញ្ជាក់ការកាន់កាប់ក្បាលដីត្រឹមត្រូវ។
លោកបន្តថា បុគ្គលឈ្មោះ លី សុងីម បានយកឈ្មោះលោក ហ៊ុន ជា មកកាងពីក្រោយ ដោយថា ដីនោះជាដីរបស់លោក ហ៊ុន ជា។
លោកបន្ថែមថា៖ « [លោក] លី សុងីម គេយកឈ្មោះ[លោក] ហ៊ុន ជា មកកាង។ គាត់ថាដីហ្នឹងជារបស់[លោក] ហ៊ុន ជា តែយើងមើលក្នុងឯកសារនោះ ហ៊ុន ជា គ្រាន់តែជាម្ចាស់បំណុលរបស់ លី សុងីម ទេ។ ខាង[លោក] ហ៊ុន ជា អត់មានអីមកធ្វើការងារហ្នឹងទេ។ ហើយ លី សុងីម ហ្នឹងទិញដីមិនដឹងទិញពីប្រភពណា ហើយម្ចាស់នៅណាទេ! បើមានម្ចាស់ឱ្យគាត់ចេញមុខមក! ហើយបើពួកគាត់ដែលតវ៉ាជាមួយប្រជាពលរដ្ឋនេះ គឺគាត់ទិញដីមានម្ចាស់ត្រឹមត្រូវ ប្រជាពលរដ្ឋយើងនៅក្នុងភូមិនេះគាត់អ្នកលក់ឱ្យ»។
វីអូឌី នៅមិនទាន់អាចរកការឆ្លើយតបពីលោក លី សុងីម ដែលរងការចោទប្រកាន់ថាយកដីពលរដ្ឋនៅឡើយទេ នៅថ្ងៃសុក្រនេះ។
ចំណែកលោកឧកញ៉ា ហ៊ុន ជា អះអាងថា ដីដែលពលរដ្ឋកំពុងតវ៉ានោះជាដីរបស់ក្រុមហ៊ុនលោក មានបណ្ណកម្មសិទ្ធិត្រឹមត្រូវ ហើយលោកថា ភាគីខាងពលរដ្ឋមានត្រឹមតែលិខិតបញ្ជាក់ក្បាលដីប៉ុណ្ណោះ។ លោកថា កន្លងមក លោកធ្លាប់ឱ្យភាគីជម្លោះទៅជួប ដើម្បីបង្ហាញឯកសារកាន់កាប់ដីធ្លីនោះដែរ ប៉ុន្តែភាគីខាងពលរដ្ឋមិនបានទៅជួបឡើយ។
បើតាមលោក ហ៊ុន ជា គឺក្រុមហ៊ុនរបស់លោកមានដីជាច្រើនកន្លែងនៅតំបន់នោះ ដោយលោកថា ដីកន្លែងខ្លះមានទំហំចន្លោះពី២០ហិកតា ទៅ៥០ហិកតា ប៉ុន្តែលោកមិនប្រាប់ថា បណ្ណកម្មសិទ្ធិរបស់លោកទទួលបាននៅឆ្នាំណានោះទេ។
លោកបន្ថែមថា៖ «ដីហ្នឹងជាដីកម្មសិទ្ធិរបស់ក្រុមហ៊ុនខ្ញុំស្របច្បាប់ ខ្ញុំមានឯកសារមានប្លង់រឹងមួយកំប៉្លេ។ ភាគីម្ខាងទៀត តាមព័ត៌មានខ្ញុំដឹង គេមានត្រឹមក្រដាសប៉េវ៉េមួយសន្លឹកទេ។ ខ្ញុំធ្លាប់ឱ្យខាងអាជ្ញាធរហៅបុគ្គលហ្នឹងមកជួបខ្ញុំដើម្បីបង្ហាញឯកសារ បុគ្គលហ្នឹងគេចរហូត មិនព្រមចូលមកទេ ប៉ុន្តែគេទៅបំផុសបំផុលប្រជាជនឱ្យមករញ៉េរញ៉ៃទៅវិញ»។
មេឃុំបិតត្រាង លោក មៀច ចាន់ មានប្រសាសន៍ថា ដីដែលប្រជាពលរដ្ឋកំពុងមានជម្លោះជាមួយលោក លី សុងីម និងលោក ហ៊ុន ជា នោះជាដីគម្របព្រៃឈើឆ្នាំ២០០២។ លោកថា ភាគីទាំងពីរអះអាងថា ពួកគេមានឯកសារកាន់កាប់ដីរៀងខ្លួន តែលោកមិនដឹងថា ពួកគេបានឯកសារនោះដោយរបៀបណាឡើយ។
មេឃុំរូបនេះបន្តថា កន្លងមក អាជ្ញាធរឃុំធ្លាប់សម្របសម្រួលដោះស្រាយដែរ ប៉ុន្តែភាគីទាំងសងខាងមិនឯកភាពគ្នា ទើបលោកបញ្ជូនសំណុំរឿងនេះទៅអាជ្ញាធរស្រុកដោះស្រាយបន្ត។
លោកបន្ថែមថា៖ «យើងបានសម្របសម្រួលដោះស្រាយមួយលើកជាពីរលើកហើយ ប៉ុន្តែវាមិនបានជោគជ័យទេ អ៊ីចឹងយើងក៏បានធ្វើកំណត់ហេតុបញ្ជូនទៅខាងសាលាស្រុក ដើម្បីបន្តនីតិវិធីដើម្បីដោះស្រាយ។ ប៉ុន្តែបើនិយាយឱ្យចំទៅ ដីរបស់ពួកគាត់ទាំងអស់នោះ វាស្ថិតនៅក្នុងដីគម្របព្រៃឈើឆ្នាំ២០០២ទេ»។
ចំណែកអ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ មានប្រសាសន៍ថា លោកនៅពុំទាន់ទទួលបានរបាយការណ៍ជុំវិញករណីវិវាទដីធ្លីនេះទេ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា តាមការស្រាវជ្រាវរបស់អ្នកស្រី ប្រជាពលរដ្ឋបានទៅរស់នៅតំបន់នោះយូរឆ្នាំហើយ។ អ្នកស្រីថា កាលពីឆ្នាំ២០១៤ រដ្ឋបាលខេត្តក៏ធ្លាប់ចុះវាស់វែងនិងកាត់ឆ្វៀលដីនោះចេញពីដីគម្របព្រៃឈើ ដើម្បីចែកជូនពលរដ្ឋរស់នៅជាក់ស្តែង បានរស់នៅ និងអាស្រ័យផល ទើបតែនៅឆ្នាំ២០២១នេះ កើតមានជម្លោះតែម្ដង។
មន្ត្រីសិទ្ធិមនុស្សរូបនេះស្នើឱ្យភាគីពាក់ព័ន្ធសម្របសម្រួលដោះស្រាយគ្នាតាមនីតិវិធី ដើម្បីកុំឱ្យប៉ះពាល់ដល់ផលប្រយោជន៍ប្រជាពលរដ្ឋនិងសិទ្ធិផ្សេងៗរបស់ពួកគេផង។
អ្នកស្រីបន្ថែមថា៖ «អាជ្ញាធរមូលដ្ឋានដែលពាក់ព័ន្ធក្នុងរឿងហ្នឹង គួរតែកោះហៅភាគីម្ខាងទៀតដាក់ឯកសារជជែកគ្នាទៅ កុំអាលធ្វើសកម្មភាពផ្សេងៗធ្វើអី នាំតែមានបញ្ហាទំនាស់គ្នាកើតឡើង។ ហើយឥលូវហ្នឹងកំពុងកូវីដផង យើងគួរតែជជែកគ្នាដោយសន្តិវិធីទៅ។ បើថាមិនអាចចរចា មិនអាចត្រូវគ្នាទេ អាហ្នឹងចាំយើងឡើងទៅតុលាការទៀតទៅ»៕
