អាជ្ញាធររាជធានីភ្នំពេញ ផ្អាកការចុះផ្សាយអត្តសញ្ញាណអ្នកឆ្លងជំងឺកូវីដ-១៩ថ្មីប្រចាំថ្ងៃ ដោយសារអាជ្ញាធរមមាញឹកក្នុងការស្រាវជ្រាវនិងចុះយកសំណាកអ្នកពាក់ព័ន្ធដែលមានចំនួនច្រើន និងថាការបញ្ចេញអត្តសញ្ញាណអ្នកឆ្លងជំងឺកូវីដ-១៩នេះក៏មិនសូវចាំបាច់ទៀតនោះដែរ។
ចាប់ពីថ្ងៃទី២៨ ខែឧសភា មកទល់ថ្ងៃទី១ ខែមិថុនា ឆ្នាំ២០២១នេះ រដ្ឋបាលរាជធានីភ្នំពេញ បានផ្អាកការបញ្ចេញឈ្មោះនិងទីកន្លែងស្នាក់នៅរបស់អ្នកជំងឺកូវីដ-១៩ថ្មី បន្ទាប់ពីធ្លាប់បានចុះផ្សាយលើទំព័រហ្វេសប៊ុករបស់ខ្លួនបង្ហាញពីអត្តសញ្ញាណពលរដ្ឋឆ្លងកូវីដ-១៩ ចាប់តាំងពីមានការផ្ទុះករណីឆ្លងរាលដាលខ្លាំងក្នុងខែមេសារហូតមក។
អភិបាលរាជធានីភ្នំពេញ លោក ឃួង ស្រេង មានប្រសាសន៍នៅថ្ងៃអង្គារនេះថា ថ្មីៗនេះ អាជ្ញាធរមមាញឹកលើការងារចុះស្រាវជ្រាវ ប្រមូលយកសំណាក និងបញ្ជូនអ្នកពាក់ព័ន្ធទៅធ្វើចត្តាឡីស័ក និងអ្នកឆ្លងទៅព្យាបាល។ លោកថា កិច្ចការទាំងនេះមានសារៈសំខាន់ជាងការបញ្ចញព័ត៌មានអ្នកឆ្លងថ្មីៗឱ្យសាធារណជនបានដឹង។
លោកមានប្រសាសន៍ថា៖ «ឥលូវនេះ យើងឃើញថា ប្រជាពលរដ្ឋយើងមានការយល់ដឹងហើយ អ៊ីចឹងបានជាយើងចាត់ទុកថា អានេះវាអត់សូវមានសារៈសំខាន់សម្រាប់ការស្រាវជ្រាវរបស់យើងតទៅទៀតទេ។ ការស្រាវជ្រាវរបស់យើង គឺយកមនុស្សទៅព្យាបាល និងអ្នកពាក់ព័ន្ធផ្ទាល់ គាត់ដឹងខ្លួនគាត់ គឺយើងត្រូវតាមទៅយកសំណាកគាត់។ យើងមមាញឹកក្នុងការយកសំណាកច្រើនណាស់សព្វថ្ងៃនេះ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង គាំទ្រចំពោះការមិនបង្ហាញអត្តសញ្ញាណអ្នកជំងឺនេះ ដោយថា កន្លងមក ការបង្ហាញឈ្មោះ អាយុ និងអាសយដ្ឋានស្នាក់នៅជាដើម គឺជាការរំលោភសិទ្ធិឯកជនភាពរបស់ពួកគេ។ លោកថា វិធីនេះនឹងមិនអាចជួយកាត់បន្ថយការឆ្លងរាលដាលរបស់ជំងឺនោះទេ។
មន្រ្តីសង្គមស៊ីវិលរូបនេះបន្ថែមថា អាជ្ញាធរគួរប្រើវិធីបង្ហាញទីតាំងឬតំបន់លើផែនទីដែលមានករណីឆ្លងឱ្យសាធារណជនបានដឹងជំនួសវិញ និងព្យាយាមសាកសួររកអ្នកពាក់ព័ន្ធ និងចាត់វិធានការឆ្លើយតបលើអ្នកសង្ស័យឱ្យបានគ្រប់ជ្រុងជ្រោយនិងទាន់ពេល គឺជារឿងប្រសើរ។
លោក យង់ គិមអេង មានប្រសាសន៍ថា៖ «ការដែលឱ្យគាត់និយាយការពិតឱ្យគ្រប់ជ្រុងជ្រោយទៅ ព្រោះកន្លែងខ្លះគឺប្រហែលជាគាត់ពិបាកនិយាយ ហើយបើឱ្យគាត់និយាយព័ត៌មានឱ្យច្បាស់លាស់ ហើយអាជ្ញាធរព្យាយាមចាត់វិធានការទៅតាមហ្នឹង វាមានប្រសិទ្ធភាពជាងការគ្រាន់តែបញ្ចេញអត្តសញ្ញាណ»។
បើតាមក្រសួងសុខាភិបាល គិតត្រឹមព្រឹកថ្ងៃទី១ ខែមិថុនានេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៣០ ៧១០នាក់ ក្នុងនោះ អ្នកជំងឺជាសះស្បើយសរុបមានចំនួន២៣ ៣៨៩នាក់ និងអ្នកស្លាប់២២០នាក់៕
អត្ថបទទាក់ទង
មន្រ្តីកម្ពុជារិះគន់ UN លើសំណើបញ្ចេញអត្តសញ្ញាណអ្នកឆ្លងកូវីដ-១៩ក្នុងពន្ធនាគារ
មន្រ្តីជាន់ខ្ពស់គណៈកម្មការសិទ្ធិមនុស្សកម្ពុជា បានរិះគន់សំណើរបស់អង្គការសហប្រជាជាតិ (UN) និងសង្គមស៊ីវិលមួយចំនួនដែលស្នើឱ្យរដ្ឋាភិបាលបង្ហាញអត្តសញ្ញាណអ្នកជាប់ឃុំដែលឆ្លងជំងឺកូវីដ-១៩ នៅពន្ធនាគារទូទាំងប្រទេស ដោយថា ធ្វើឡើងតាមតែបបូរមាត់។