ប្រជាពលរដ្ឋមួយចំនួនរស់នៅឃុំស្វាយយា ស្រុកស្វាយជ្រំ ខេត្តស្វាយរៀង ចោទអតីតនាយកសាលាបឋមសិក្សា កៀនតាស៊ីវ ថាបានរំលោភយកដីសាលារៀន និងធ្វើប្លង់កម្មសិទ្ធិជាទ្រព្យសម្បត្តិផ្ទាល់ខ្លួន អំឡុងពេលលោកមានតួនាទីជានាយកសាលាមួយនេះ។
អ្នកស្រី យ៉ាន់ ចាន់នី រស់នៅភូមិកៀនតាស៊ីវ ឃុំស្វាយយា ស្រុកស្វាយជ្រំ ខេត្តស្វាយរៀង ឱ្យដឹងនៅថ្ងៃទី១ ខែមិថុនានេះថា ដីសាលាដែលមានទំហំជិត១ហិកតានៅផ្នែកខាងមុខ ត្រូវបានអតីតនាយកសាលា កៀនតាស៊ីវ ឈ្មោះ លោក សេង ហៃ លួចធ្វើប្លង់កម្មសិទ្ធិកាលពីឆ្នាំ២០១៨។
អ្នកស្រីបន្តថា រហូតមកដល់បច្ចុប្បន្ននេះ អតីតនាយកសាលារូបនោះបានផ្ទេរអចលនទ្រព្យដែលជាមរតករបស់សាលាមួយផ្នែក ឱ្យទៅកូនចៅជាអ្នកគ្រប់គ្រងបន្តវិញ។
អ្នកស្រីបន្តថា៖ «ខំអត់រង្គោះរង្គើទៀត! ដោយសារគាត់ចែកដីឱ្យកូន គាត់ចាក់ដីយកធ្វើជាសម្បត្តិខ្លួនគាត់។ គាត់អត់ទុកជាសម្បត្តិសាលាហ្នឹង ទើបប្រជាពលរដ្ឋដឹងហ្នឹង។ បើសិនជាដឹងយូរហើយ ក៏ប្តឹងយូរហើយដែរ តែរឿងហ្នឹងប្រជាជនអត់ដឹងទេ ទើបតែដឹងពេលគាត់ចែកឱ្យកូនហ្នឹងទេ បានដឹងហ្នឹង»។
អ្នកស្រីបន្តថា តាមគម្រោង ផ្លូវលំនេះនឹងត្រូវរដ្ឋាភិបាលពង្រីកទៅជាផ្លូវល្បឿនលឿនភ្នំពេញ-ស្វាយរៀង នៅពេលខាងមុខ។
បើតាមអ្នកស្រី យ៉ាន់ ចាន់នី អតីតនាយកសាលាដែលចូលនិវត្តន៍រូបនេះ បានទុកផ្លូវដែលមានទទឹងផ្លូវទំហំ៣ម៉ែត្រ សម្រាប់សិស្សនិងគ្រូធ្វើដំណើរឆ្លងកាត់ទៅសាលារៀនដែលស្ថិតនៅដីផ្នែកខាងក្រោយ។
អ្នកភូមិរស់នៅភូមិកៀនតាស៊ីវម្នាក់ទៀត អ្នកស្រី អ៊ុក ចាន់សេរី ឱ្យដឹងដែរថា ក្រោយឆ្នាំ១៩៧៩ ផ្ទៃដីសរុបរបស់សាលារៀននេះមានទំហំប្រមាណ៣ហិកតា ប៉ុន្តែក្រោយមានការកាន់កាប់មួយផ្នែកពីលោក សេង ហៃ និងពលរដ្ឋប្រមាណ១០គ្រួសារផ្សេងទៀត បានធ្វើឱ្យទំហំផ្ទៃដីសាលារៀនមួយនេះត្រូវរួមតូចមកដល់ពេលបច្ចុប្បន្ន។ អ្នកស្រីបន្តថា មូលហេតុដែលពលរដ្ឋតវ៉ានេះ ព្រោះមិនចង់ឱ្យដីសាលារៀននេះត្រូវបាត់បង់។
បើតាមក្រុមប្រជាពលរដ្ឋ នៅអំឡុងឆ្នាំ២០១៨ អ្នកតវ៉ារាប់រយនាក់បានផ្តិតមេដៃនិងដាក់ពាក្យបណ្តឹងសុំការអន្តរាគមន៍ពីថ្នាក់ខេត្តម្តងរួចហើយមក ប៉ុន្តែមិនមានលទ្ធផល។ ដោយពុំមានដំណោះស្រាយនោះ នៅដើមឆ្នាំ២០១៩ អង្គភាពប្រឆាំងអំពើពុករលួយ តម្រូវឱ្យអាជ្ញាធរខេត្តដោះស្រាយទំនាស់ដីធ្លីនេះជាថ្មីទៀត បន្ទាប់ពីប្រជាពលរដ្ឋរាប់រយគ្រួសារបានផ្តិតស្នាមមេដៃស្វែងរកកិច្ចអន្តរាគមន៍ពីអង្គភាពប្រឆាំងអំពើពុករលួយ។
វីអូឌី ពុំអាចសុំការអត្ថាធិប្បាយជុំវិញការចោទប្រកាន់នេះបានទេពីលោក សេង ហៃ នៅថ្ងៃនេះ។
បើទោះជាបែបណា នាយកសាលាបច្ចុប្បន្នដែលត្រូវជាកូនប្រសាររបស់លោក សេង ហៃ ជាអតីតនាយកសាលាកៀនតាស៊ីវ ទទួលស្គាល់ថា ក្រុមគ្រួសារបស់លោកពិតជាបានកាន់កាប់ដីសាលានេះមួយផ្នែកមែន។
ប៉ុន្តែលោកបញ្ជាក់ថា អ្នកពាក់ព័ន្ធដីសាលារៀនេះមិនមែនតែក្រុមគ្រួសារលោកម្នាក់ទេ ពោលគឺនៅមានគ្រួសារផ្សេងទៀត ក៏មានជាប់ពាក់ព័ន្ធការយកដីសាលានេះដែរ។
តែយ៉ាងណា លោកថា លោកមិនខ្លាចនឹងប្រគល់ដីនេះឡើយ ប្រសិនបើអ្នកជាប់ពាក់ព័ន្ធទាំងអស់យល់ព្រមសងទៅសាលារៀនវិញ។
លោកបន្តថា៖ «ដីដែលគ្រួសារខ្ញុំយកផ្នែកខាងមុខហ្នឹងមាន គឺមានពាក់ព័ន្ធដែរ។ ជាគំនិតយោបល់របស់ខ្ញុំ ហើយខ្ញុំសួរមតិមើល បើភាគីខាងគាត់ [ឪពុកក្មេក] ហើយបើប្រជាពលរដ្ឋដែលពាក់ព័ន្ធទាំងអស់គ្នាព្រមឱ្យ គាត់ក៏ឱ្យវិញដែរ»។
ប្រធានមន្ទីរអប់រំ យុវជន និងកីឡាខេត្តស្វាយរៀង លោក ខៀវ សំអុល ឱ្យដឹងថា បច្ចុប្បន្ននេះ រដ្ឋបាលខេត្តកំពុងដោះស្រាយទំនាស់ដីធ្លីនេះ ក្រោយទទួលបានសំណើរបស់អង្គភាពប្រឆាំងអំពើពុករលួយ។
លោកបន្តថា លទ្ធផលយ៉ាងណានោះនៅមិនទាន់ដឹងច្បាស់នៅឡើយទេ ដោយត្រូវរង់ចាំស្ថានភាពជំងឺកូវីដ-១៩ស្ងប់ស្ងាត់ទៅវិញសិន។
លោកបញ្ជាក់ថា៖ «ប្រជាពលរដ្ឋដែលមានទំនាស់ បូករួមទាំងអតីតនាយកហ្នឹងផង ព្រមឱ្យវិញ ឱ្យតែនាយកឱ្យ។ ប៉ុន្តែចៅហ្វាយខេត្ត គាត់ចង់បានស្នាមមេដៃដែលថាព្រមឱ្យវិញ ព្រោះពួកគាត់អាស្រ័យផលតាំងពីឆ្នាំ១៩៧៩ ក្រែងពួកគាត់មិនព្រមឱ្យវិញ។ បើឱ្យ បានគាត់នឹងកាត់តែម្តង។ ប៉ុន្តែដោយសារកូវីដអ៊ីចឹងទៅ មិនបានដោះស្រាយទេ រឿងផែនការដែលគាត់ឱ្យទៅប្រមូលស្នាមមេដៃរបស់ប្រជាពលរដ្ឋ១៧គ្រួសារដែលពាក់ព័ន្ធដីហ្នឹង»។
មន្ត្រីសម្របសម្រួលអង្គការលីកាដូ ប្រចាំខេត្តស្វាយរៀង លោក នុត បូពិណ្ណារត្ន យល់ឃើញថា ប្រសិនបើដីនេះពិតជាទ្រព្យសម្បត្តិរបស់សាលារៀនមែន គឺត្រូវតែប្រគល់ជូនសាលាវិញ។ លោកសង្កត់ធ្ងន់ថា អ្នកដែលទទួលខុសត្រូវខ្ពស់បំផុតគឺអាជ្ញាធរថ្នាក់ខេត្តនិងមន្ទីរអប់រំ ហើយការរំលោភយកចំណែកណាមួយពីដីសាលារៀនជាការរំលោភគោលការណ៍ច្បាប់។
លោកបន្តថា៖ «ដីសាលារៀនក៏ដោយឬដីអីក៏ដោយ គឺសុទ្ធតែមានប្លង់អស់ហើយ។ ដូច្នេះហ្នឹង បើសិនជាដីហ្នឹងស្ថិតនៅក្នុងក្របខណ្ឌរបស់សាលា គឺគាត់មិនមានសិទ្ធិយកទេ បើសិនជាគាត់យក វាល្មើសនឹងច្បាប់ភូមិបាល និងល្មើសទៅនឹងច្បាប់របស់រដ្ឋ ហើយមានទោសថែមទៀត»។
បើតាមក្រុមប្រជាពលរដ្ឋ បច្ចុប្បន្ន សាលាបឋមសិក្សានិងអនុវិទ្យាល័យ កៀនតាស៊ីវ មានសិស្សកំពុងសិក្សាមកពីភូមិប្រមាណ១០ភូមិ ចំណុះឱ្យឃុំស្វាយយា ស្រុកស្វាយជ្រុំនេះ។ ដោយមើលឃើញពីកំណើនសិស្សចេះតែកើនឡើងពីមួយឆ្នាំទៅមួយឆ្នាំ សាលារៀននេះត្រូវបានបន្ថែមទៅជាអនុវិទ្យាល័យមួយកម្រិតទៀត រហូតមកដល់ពេលបច្ចុប្បន្ន៕
កែតម្រូវ៖ វីអូឌី សូមធ្វើការកែតម្រូវកថាខណ្ឌ៖ «បើតាមក្រុមប្រជាពលរដ្ឋ នៅអំឡុងឆ្នាំ២០១៨ ប្រជាពលរដ្ឋរាប់រយនាក់បានផ្តិតមេដៃនិងដាក់ពាក្យបណ្តឹងសុំការអន្តរាគមន៍ពីអង្គភាពប្រឆាំងអំពើពុករលួយ ដើម្បីប្រឆាំងនឹងការយកដីសាលាធ្វើជាកម្មសិទ្ធិពីសំណាក់អតីតនាយកសាលានេះម្តងរួចមកហើយ ពេលដែលអតីតនាយកសាលានេះចាក់ដីបំពេញទីធ្លាហ៊ុមព័ន្ធធ្វើជាកម្មសិទ្ធិ។ ពួកគាត់បន្តថា នៅដើមឆ្នាំ២០១៩ អង្គភាពប្រឆាំងអំពើពុករលួយ តម្រូវឱ្យអាជ្ញាធរខេត្តដោះស្រាយបញ្ចប់ទំនាស់ដីធ្លីនេះ។» ខ្លឹមសារដែលត្រឹមត្រូវ «បើតាមក្រុមប្រជាពលរដ្ឋ នៅអំឡុងឆ្នាំ២០១៨ អ្នកតវ៉ារាប់រយនាក់បានផ្តិតមេដៃនិងដាក់ពាក្យបណ្តឹងសុំការអន្តរាគមន៍ពីថ្នាក់ខេត្តម្តងរួចហើយមក ប៉ុន្តែមិនមានលទ្ធផល។ ដោយពុំមានដំណោះស្រាយនោះ នៅដើមឆ្នាំ២០១៩ អង្គភាពប្រឆាំងអំពើពុករលួយ តម្រូវឱ្យអាជ្ញាធរខេត្តដោះស្រាយទំនាស់ដីធ្លីនេះជាថ្មីទៀត បន្ទាប់ពីប្រជាពលរដ្ឋរាប់រយគ្រួសារបានផ្តិតស្នាមមេដៃស្វែងរកកិច្ចអន្តរាគមន៍ពីអង្គភាពប្រឆាំងអំពើពុករលួយ។»