គ្រួសារសកម្មជនបរិស្ថាន គ្រោងទៅបួងសួងនៅព្រះអង្គដងកើ នៅថ្ងៃស្អែកនេះ ដើម្បីបួងសួងសុំឱ្យវត្ថុស័ក្តិសិទ្ធិជំរុញចិត្តតុលាការដោះលែង និងជួយថែរក្សាគ្រួសាររបស់ពួកគាត់ដែលកំពុងជាប់ឃុំ ឱ្យចៀសផុតពីការឆ្លងជំងឺកូវីដ-១៩។
ការគ្រោងទៅបួងសួងរបស់គ្រួសារសកម្មជនបរិស្ថាន ធ្វើឡើងបន្ទាប់ពីអគ្គនាយកដ្ឋានពន្ធនាគារនៃក្រសួងមហាផ្ទៃ កាលពីថ្ងៃទី២០ ខែឧសភា ប្រកាសថា មណ្ឌលអប់រំកែប្រែទី១ ឬពន្ធនាគារព្រៃស មានអ្នកជាប់ឃុំឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។
ភរិយារបស់លោក ថុន រដ្ឋា សកម្មជនបរិស្ថាន គឺអ្នកស្រី ប៉ាត់ រស្មី ប្រាប់ វីអូឌី នៅថ្ងៃពុធនេះថា មូលហេតុពួកគាត់ទៅបួងសួងនៅព្រះអង្គដងកើ មុខព្រះបរមរាជវាំង រាជធានីភ្នំពេញ ដើម្បីសុំឱ្យព្រះអង្គជួយថែរក្សាគ្រួសារអ្នកដែលកំពុងជាប់ឃុំនៅពន្ធនាគារចៀសផុតពីជំងឺកូវីដ-១៩ ដោយសារចាប់តាំងពីផ្ទុះជំងឺកូវីដ-១៩នៅក្នុងពន្ធនាគារ ពួកគាត់មិនបានទទួលដំណឹងសោះឡើយពីអ្នកជាប់ឃុំ។
អ្នកស្រីថា៖ «យើងគ្រាន់តែបួងសួងសុំឱ្យអ្នកនៅក្នុងពន្ធនាគារសុខសប្បាយ ចៀសឆ្ងាយពីកូវីដ! យើងមានការបាម្ភមែនទែន ព្រោះរហូតមកដល់ពេលហ្នឹង យើងមិនដឹងដំណឹងពីគាត់ថានៅក្នុងនោះគាត់ហូបចុកម៉េច សុខទុក្ខម៉េច ហើយអនាម័យម៉េច! និយាយទៅ យើងអត់ដឹងដំណឹងគាត់សោះ សូម្បីមន្ត្រីពន្ធនាគារក៏អត់បានទាក់ទងមកប្រាប់ពីសុខទុក្ខប្ដីនាងខ្ញុំដែរ»។
ប្អូនស្រីកញ្ញា ឡុង គន្ធា សកម្មជនបរិស្ថានមួយរូបទៀត គឺកញ្ញា ឡុង សុខលីន លើកឡើងដែរថា ពួកគាត់នាំគ្នាធ្វើពិធីបែបសាសនា ដោយសារអស់ជំនឿលើប្រព័ន្ធយុត្តិធម៌ និងសុំឱ្យព្រះអង្គដងកើជួយថែរក្សាបងស្រីដែលកំពុងជាប់ឃុំក្នុងពន្ធនាគារចៀសផុតពីជំងឺផ្លូវដង្ហើមមួយនេះ។
កញ្ញាបន្តថា ការទៅបួងសួងនៅព្រះអង្គដងកើនេះដែរ ដោយសារគ្រួសាររបស់ពួកគាត់ជឿលើបុណ្យបាប ដោយថា អ្នកដែលធ្វើទង្វើមិនល្អនឹងទទួលបានផលតបស្នងបែបនោះវិញ។
កញ្ញាថា៖ «ខ្ញុំមានក្ដីបារម្ភខ្លាំងពីបងខ្ញុំ ពីសុខទុក្ខគាត់ ពីព្រោះនៅនោះបន្ទប់ចង្អៀត! ឮថាមានអ្នកឆ្លងអ៊ីចឹង ខ្ញុំខ្លាចគាត់ឆ្លងជំងឺហ្នឹងដែរ! ហើយអត់ដែលបានដំណឹងពីគាត់ទៀត អ៊ីចឹងខ្ញុំបារម្ភខ្លាំងមែនទែន។ ខ្ញុំចង់ឱ្យគេ [អនុញ្ញាត] ឱ្យគាត់ប្រើទូរសព្ទ ដើម្បីទាក់ទងប្រាប់ដំណឹងសុខភាពគាត់ ខ្ញុំចង់ដឹងគាត់នៅម៉េចដែរ! ហើយបើអាច ខ្ញុំចង់ឱ្យគេអនុញ្ញាតឱ្យគាត់មកនៅក្រៅឃុំអ៊ីចឹង»។
កញ្ញា ឡុង សុខលីន បន្តថា បងស្រីកញ្ញានិងអ្នកជាប់ឃុំដទៃទៀតមិនបានប្រព្រឹត្តកំហុសឡើយ ដោយកញ្ញាចាត់ទុកការសម្រេចចោទប្រកាន់និងឃុំខ្លួនលើសកម្មជនបរិស្ថាននិងអ្នកធ្វើការងារសង្គមកន្លងមកថា ជារឿងអយុត្តិធម៌សម្រាប់គ្រួសាររបស់ពួកគាត់ទាំងអស់គ្នា។
ដោយឡែក ម្ដាយរបស់អតីតព្រះតេជគុណ កើត សារ៉ាយ គឺអ្នកស្រី ចាប យ៉ែម មានប្រសាសន៍ថា រាល់ថ្ងៃអ្នកស្រីបារម្ភពីសុខភាពនិងសុវត្ថិភាពកូន ក្រោយពីទទួលព័ត៌មាននៅពន្ធនាគារមានឆ្លងជំងឺកូវីដ-១៩។ ស្ត្រីវ័យ៧៧ឆ្នាំរូបនេះ រៀបរាប់ថា អ្នកស្រីចង់ឱ្យតុលាការដោះលែងកូនគាត់និងអ្នកផ្សេងទៀតមកជួបជុំគ្រួសារវិញ ។
អ្នកស្រីថា៖ «ខ្ញុំមិនដឹងធ្វើយ៉ាងម៉េច បើទៅអត់រួច! ខ្ញុំបន់នៅនេះណាស់ដែរ ព្រះនៅស្រុកយាយនិងព្រះនៅស្រុកឱ្យកូនចៅរួចផុតនិងរំដោះចេញ ឱ្យព្រះអង្គជួយមិនមែនតែកូនខ្ញុំ គឺឱ្យជួយក្នុងក្រុមទាំងអស់បានរួច»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ចាត់ទុកការទៅបួងសួងនៅព្រះអង្គដងកើរបស់គ្រួសារសកម្មជនបរិស្ថាន ថាជាសិទ្ធិរបស់ពួកគាត់។
លោកថា ស្ថិតក្នុងស្ថានភាពនៃការរីករាលដាលជំងឺកូវីដ-១៩នេះ តុលាការគួរពិចារណាក្នុងការដោះលែងឱ្យពួកគាត់ទាំងអស់គ្នានៅក្រៅឃុំបណ្ដោះអាសន្ន។
លោកថា៖ «ចំណុចនេះក៏វាជាការឆ្លុះបញ្ចាំងដែរ អ្វីដែលគាត់ធ្វើ ការដាក់កិច្ចអន្តរាគមន៍ ការអំពាវនាវកន្លងមក ដើម្បីឱ្យមានការដោះលែងនោះ លែងមានជំនឿ គិតគូរអំពីសិទ្ធិសេរីភាពរបស់ក្រុមគ្រួសារ ទើបពួកគាត់មានជម្រើសរើសបន់ស្រន់និងបួងសួងទៅ»។
សកម្មជនបរិស្ថាន រួមមាន កញ្ញា ភួន កែវរស្មី, កញ្ញា ឡុង គន្ធា និងលោក ថុន រដ្ឋា ត្រូវបានតុលាការសម្រេចផ្តន្ទាទោស ឱ្យជាប់ពន្ធនាគារពី១៨ទៅ២០ខែ ក្រោមបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ករណីពួកគេប្រកាសធ្វើយុទ្ធនាការដើរថ្មើរជើងពីវត្តភ្នំទៅកាន់ផ្ទះលោកនាយករដ្ឋមន្ត្រី ហ៊ុន សែន ដើម្បីដាក់ញត្តិសុំអន្តរាគមន៍ឱ្យបញ្ឈប់ការលុប«បឹងតាមោក»ទៀត ដោយថា បឹងនោះជាបឹងធម្មជាតិធំជាងគេនិងសល់ចុងក្រោយគេនៅរាជធានីភ្នំពេញ។
គិតមកដល់ថ្ងៃពុធនេះ មានពន្ធនាគារចំនួន៤ហើយ រួមមាន ពន្ធនាគារខេត្តកំពង់ស្ពឺ ពន្ធនាគារខេត្តព្រះសីហនុ ពន្ធនាគារព្រៃស (ម១) រាជធានីភ្នំពេញ និងពន្ធនាគារខេត្តកណ្តាល ត្រូវបានរកឃើញថា មានករណីអ្នកជាប់ឃុំឆ្លងជំងឺកូវីដ-១៩ជាបន្តបន្ទាប់។
យ៉ាងនេះក្តី បើតាមអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ប្រាប់ វីអូឌី កាលពីម្សិលមិញថា គិតត្រឹមថ្ងៃទី១ ខែមិថុនានេះ ការចាក់វ៉ាក់សាំងការពារជំងឺកូវីដ-១៩ ជូនដល់អ្នកជាប់ឃុំ ដូសទី២ បានប្រមាណជា៣០% ឬជាង១១ ០០០នាក់ ក្នុងចំណោមអ្នកជាប់ឃុំសរុបនៅទូទាំងប្រទេសជិត៤០ ០០០ នាក់៕
អត្ថបទទាក់ទង
